米米蓮妖怪作品 -《旅行‧如此‧難以忘‧記 》(百集長篇): 第067集 ~ 輝︰見到阿欣喇！我仲想…點知…唉！
第067集 ~ 輝︰見到阿欣喇！我仲想…點知…唉！
「聽我講！聽日同一時間，喺女更衣室裡面等啦！我哋會陪你哋會一會佢！」
又女更衣室！？佢係真係當咗女更衣室係通道，定係另有企圖呢？不過…
唔係喺外面等都得咩？點解仲要講明係裡面呀？
當我仲諗緊呢樣嘢之際，又有兩個高人行緊過嚟，佢哋…
又係一肥一瘦！？真係有D無奈。
肥嗰個把口好臭，一嚟就口出狂言咁問「星」老前輩「乜你仲未死咩？」
之後，前輩當然冇理把臭口，反而講咗佢哋嘅來歷，估唔到佢哋就係邪派高手「西斜」同「南轅」。
不過我覺得前輩所講嘅「粉腸」同「大蕃薯」啱形容佢哋多D。
「死老坑，把口咁臭嘅！」「粉腸」講。
「咩話！你夠膽講多次！」「大蕃薯」大嗌。
D人總係咁好笑嘅，明明自己人口臭先，又要惡人先告狀；有D仲攪笑，係要人鬧多佢一次嘅。
之後，「大蕃薯」發老脾，仲學人玩放「狗」添，隻「狗」個樣我都未望清楚，前輩就一手送咗佢俾「寶寶」食…
仲話「有肉有菜，好有益架，啱晒小朋友」咁喎，擺明串爆佢啦！
「仲有冇呀？大蕃薯！」前輩果然係一個串嘴嘅老人家，激到「大蕃薯」死。
點知「粉腸」又整隻乜乜乜「崑崙石獅」出嚟，隻嘢個樣係好似好勁，但係喺前輩面前就好似舊豆腐咁。
前輩一吓就將舊「豆腐」劈返埋去「粉腸」度，仲質佢食「豆腐」，不過「豆腐」始終係「豆腐」，一吓就散晒。
「好喇！我哋走喇！」前輩恥笑住佢哋咁帶我哋走，但係條「粉腸」同舊「大蕃薯」就只有啤住我哋走。
………
我哋好快返到去機舖，同兩個前輩講聲再見，我就同阿明返咗酒店。
一返到酒店，我就見到我最想見嘅人喇！係我女朋友—阿欣呀！
佢坐咗喺梳化食緊嘢，我一望到佢，直頭開心到黐咗線，見到佢嘴角仲有D茄汁，我真係衝埋去錫落去…
可惜我慢咗，衝到埋去淨係好用力咁攬實佢，唔知點解，冇見幾日啫，感覺真係唔同晒，其實…
我都係第一次咁樣攬住佢咋，但係…原來…都幾「銀」吓噃！仲淋淋地，又幾舒服噃！
「喂！你當我死架！？光天化日非禮我個妹！？」
又係阿欣家姐，咪就係佢成日阻住晒囉！唔係點解我哋拍拖咁耐，乜差都冇做過啫！
之後「大袋」嚟咗，仲激一激佢，我不知幾爽呀！點知阿欣家姐又發老脾，一手就扯咗阿欣走。
「死靚妹丫！阿輝！想唔想有D時間同阿欣佢共處一室？」「大袋」咁講，我當然LUR飯應啦。
之後，我哋兩個就衝咗上樓搵阿欣，阿明仲呆呆地，我冇理佢，阿狗表示唔參與。
「6樓左邊手第二間呀！」阿妮果然識做。
一上到去，見門未閂，即刻就衝埋去，「大袋」一手就扯走欣家姐個頭箍…
欣家姐當然嬲到爆啦！啱喇！就係要佢嬲喳嘛，佢仲追埋出去添，正呀喂！
「阿欣呀！不如我哋入去坐吓先囉！」阿欣亦都好順我意，更正呀喂！
「啪！」閂門！上床！度坐…
「噗噗，噗噗，噗噗，噗噗~」我D心跳聲大到就咁都聽到。
係時候喇，係時候出手喇，我先試試運用我嘅內勁，將阿欣佢UN埋我身邊…
咦！似乎成功噃！我越UN，佢就越埋我身，張床彈吓彈吓咁，感覺已經好正，不過…
我成身D血都開始衝動，死喇！衝到我成身硬晒…
上面條頸，下面條「頸」，上面個頭，下面個「頭」，無一幸免…
得返你咋，右手！加油呀！我右手手指慢慢躝過去…
死喇！谷爆喇！我隨手就執起個搖控，成個人彈起，一吓就噤開咗部電視…
「哈哈哈哈哈哈！」
電視機裡面嘅笑聲就好似喺度串緊我咁，我真係後悔到想死呀！但係真係谷到面紅耳赤，唉…
唔得！唔可咁就完嘅！我即刻就用盡全力噤個靜音制！
Yeah！成功！冇晒聲！我再即刻坐返落張床度…
整個房突然靜晒，我一轉身就望住阿欣對眼，用盡我畢身最大力量，將我全身所有嘅電力…
傳入阿欣眼裡面…
(喜歡你~ 那雙眼動人~ 笑聲更迷人~)
我見到佢白滑嘅肌膚，晶瑩紅唇，水汪汪咁嘅黑色眼睛，仲有怕怕醜醜咁嘅眼神，根本就係等緊我…
(願再可~ 輕撫你~ 那可愛面容~)
我好慢好慢咁將自己個頭侯埋去，個腦充血到爆喇！最後！我真係…我終於…
(挽手說夢話~ 像昨天~ 你共我~)
鍚到佢個嘴喇！Yeah！！！
………
「嘭！」道門突然打開，阿欣驚到縮起嚟…
我頂！又係佢家姐！「大袋」呀！拖多一陣啦！
「即刻出去！出去執返你朋友呀！」欣家姐惡到癲咗，我同欣欣耍個手就出咗去。
………
「吓！？「大袋」你乜事呀？」
「救…命…呀…」
「唔好意思呀。」
佢俾欣家姐打到遍體鱗傷，真係聞者傷心，聽者流淚囉！
我只能講聲，「多謝你呀！」
而我個嘴就仲甜緊，真係回味！
之後，我帶咗佢去房療傷，即係處理吓傷口咁囉！
我以為我都已經好勁啦，錫到女仔嘴仔，點知…
阿狗突然返入房，笑淫淫咁，我哋問佢做乜笑到咁淫呀？
「嘻嘻！見你哋兩個係我好朋友我先講咋！」
「即係乜嘢啫？」
「我「濕」咗身喇！」
「屙尿屙濕身！？」
「唔講嗰句都講埋喇，我同阿妮啱啱做過愛喇！」
「你講大話！你講大話！點會咁快啫？你早洩呀？」「大袋」好似黐咗線咁。
「咁我哋相愛，梗係會做愛啦！加上…做愛嘅嘢你哋唔會明架喇！」
講真，我都好羡慕，我都可以同阿欣試吓就好喇，不過又講真，點解真係咁快嘅？我都好想了解吓。
睇嚟我醫到「大袋」外傷，都醫唔到佢內傷架喇…
我睇佢咁款，嬲極都惡唔到咩出樣，就由佢哋同房啦，我自己就返去自己房…
但係…點解好似唔見咗阿明嘅？佢唔係戇居到走去為情自殺呀？
(待續)
下集預告：
你…你傻架咩！？點解…點解要咁為我呀？
註腳︰首歌係BEYOND嘅《喜歡你》