米米蓮妖怪作品 -《旅行‧如此‧難以忘‧記 》(百集長篇): 第068集 ~ 明︰阿公呀！點解呀？…13樓又乜事呀？
第068集 ~ 明︰阿公呀！點解呀？…13樓又乜事呀？
我呆咗咁，一直企喺大堂度，諗住小倩…
………
到我回過神嚟，望一望四周圍，原來佢哋都已經走晒嚧，淨返得阿妮同「喪狗」…
不過好快佢哋都諗住離我而去，阿妮佢竟然拉咗「喪狗」入…殘廁！？
光天化日，竟然可以俾個咁靚嘅女仔強姦，「喪狗」佢都真係行運行到腳趾尾喇。不過…
我竟然連呢D咁精彩嘅嘢都冇去八卦，但係…其實點解佢哋唔好好地搵個房呢？唉…
我都冇心機理佢哋，之後，我就咁自己一個靜靜地搭(車立)返上12樓…
我突然諗到，不如去一去班衰仔個房睇吓，睇吓會唔會玩一陣，心情會好D啦。
點知去到門口，聽到佢哋好嘈，我已經唔想入去，所以咪好自閉咁一個人返自己房諗住訓囉，點知…
我去到自己房門口，聽到裡面有D雜聲，唔通係「細鬼」！？佢竟然咁乖咁早返房訓？
唔通佢都見到阿公？仲同佢傾緊計？我竟然有返D好奇心，所以我咪靜靜雞俟埋道門度偷聽囉…
「大波兄，你係咪傻咗呀？」
「你唔好理我啦！我都係想完吓我嘅心願啫！」
原來係「光管陳」同阿公講緊嘢，仲有好似有少少激動咁添。
「咩心願呀？」
「我得一粒孫，佢一出世，我就有個心願，就係想睇住佢成人。」
「你都睇到佢而家十八歲啦，做咩仲唔去投胎呀？」
聽到呢度，我覺得好愕然，阿公唔係講過話佢下面識人，排咗個快期，一個月後先投胎咩？
「我講緊結婚呀！未結婚點算成人呢？」
「結婚！？快極都要D時間啦！邊可能趕得切呀！加上你呢次唔去，可能要排期排到2047年架！」
「47年啫！我等得嘅！」
「唉…你咁硬頸，睇嚟我都係勸你唔掂架喇…」
「嚓嚓~！嘭~！」
我終於忍唔住，插卡，推門，衝咗入去！
「阿公！你…你傻架咩！？點解…點解要咁為我呀？」
我本來已經唔係好開心，仲要聽到阿公為我而放棄投胎機會，我真係含住兩包眼淚…
「你…你點解喺度架？你聽到晒？」阿公咁問，仲好快就諗住兜返添。
「哈哈哈哈，傻仔嚟嘅，我同你陳老師綵排嘅鬼節個話劇喳嘛，咪當真先得架，我講過…」
「唔係囉，阿明你都聽到晒啦，我都勸佢勸到冇力喇，你嚟啦！」「光管陳」突然插嘴。
「哎吔，呢個時候你先嚟踢爆我，我…」
「唔關「光管陳」事，你究竟最遲幾時要投胎呀？」我緊張到乜都唔理喇，連「光管陳」三個字都講咗出嚟。
「Eee…」
「講呀！」我含住眼淚咁大嗌。
「明仔呀，唔好咁惡鬧公公啦，講咪講囉，聽晚搭正凌晨呀，離而家仲有成日架！」阿公佢咁回應。
「咁好啦，而家你返去下面等啦。」
「咪住先！咦…」阿公突然大嗌，仲好專心咁望住我個樣。
「你係咪要我後悔一世呀！？」我繼續鬧阿公。
「鳳初兄，你睇吓明仔個樣。似唔似呀？」
「似唔似D咩呀？」我講。
「咦，係噃！你個衰仔眼犯桃花，面泛紅光咁，係咪識到女仔呀？」「光管陳」問我。
「你…你…你哋又知嘅？」
「睇你個姣樣就知啦！」
「咁…咁又點啫？你都係要去投胎呀！唔好叉開話題！」
「我唔制呀！聽日之前你要介紹你女朋友仔我識，唔係我就唔投胎！」
阿公竟然咁講，我有D尷尬，不過如果真係可以，我都真係想做得到。
「好！好呀！哈哈哈哈！」
連「光管陳」都幫我嗌「好」，我點可以唔應承丫，但係…小倩佢會唔會…我可唔可以…唉…
………
「嘭！」我哋道門突然被打開…
「喂！大件事喇！有嘢睇呀！」原來係「細鬼」。
「你又闖咩禍呀？」
「唔係呀！頭先我見到一大班傳教士上咗13樓呀！」
「你點知呀？」
「我頭先去買鹹書，點知見到大堂好多西人，成大班傳教士想密謀做嘢咁，咪走去偷聽佢哋做乜囉，點知原來佢哋一早約好咗話要上13樓驅鬼喎，仲有添呀，原來成日喺樓下嗰兩個西人好有來頭架，係歐洲數一數二嘅驅鬼大師嚟架，而家佢哋同3樓﹑6樓班傳教士一齊上晒13樓呀！你哋去唔去睇吓呀？」
「你有咁好英文聽得咁詳細明白咩？」
「第二樣嘢我唔敢講，我三歲就睇AV，畢身志願就係要做AV男優，所以英文同日文，簡直就係我母語！」
「希望你有志者，事竟成啦吓！我哋一齊上去睇吓啦！不過等等…」
「大波兄，你唔好上去，有我得架喇！你係鬼，我驚節外生枝呀！」「光管陳」講完之前嗰句，另轉身同阿公講。
「OK！咁你幫我睇住明仔。」
「細鬼」睇唔到阿公，佢個樣好奇怪「光管陳」做緊乜。
「出發啦！望！有乜好望啫！？喂，係呀！唔好同其他人講，我哋幾個上去就好！」
………
我哋諗住行樓梯上去，但係原來呢度後樓梯係冇樓梯嘅，真係講出嚟都有D怪，但係…
唔知點解「光管陳」做個手印之後，樓梯就出現咗喇，我哋就係咁行呢條樓梯上去…
一上到去，我就見到…呢層嘅環境好奇怪，冇房嘅，係一個圓型好大嘅大廳…
似係俾人團體活動用嘅地方，就連燈光都好似「的士高」咁，我哋前面係一大堆傳教士。
我喺傳教士人罅中望出去，見到佢哋對面就係一大堆…
鬼怪！？有幾隻典型白衣長髮女鬼，有D有角嘅裸男，有D螢光青色飄吓飄吓嘅靈魂…
仲有好多好多隻唔同嘅鬼怪，而傳教士們就好似做好作戰準備咁，每人都手執一本聖經，或者攞住個十字架…
但係奇怪嘅係，D鬼怪完全冇理佢哋，繼續自己…似乎係享樂緊，佢哋好似平凡人咁玩緊喳嘛，冇乜問題丫。
呢度好大，傳教士同D鬼怪有D距離…
「喂，阿明，你睇到D乜啫，點解好似咁凝重咁嘅？」
「細鬼」咁問，我先記得，原來佢未開法眼，睇唔到D鬼怪，我亦都因為咁，諗到點解D鬼怪見唔到班傳教士喇！
係因為「隱身咒」呀！我估傳教士係用咗唔知乜方法做咗D同「隱身咒」一樣效果嘅嘢。
咦，傳教士出手喇喎…佢哋…唔係用聖經，唔係讀經文，係揸住D銀棒…追住D鬼怪嚟打…
「哇丫~！哇丫~！哇丫~！」
「丫~！丫~！丫~！」
「嗚哇~！嗚哇~！」
一遍哀號，全場…感覺…都好奇怪…我本來以為只有鬼怪會去破壞人類嘅和平，但係…原來…
人類都會咁樣對待鬼怪…我唔知呢堆鬼怪有冇做過咩錯事，但係…我而家親眼所見…呢堆傳教士…
根本唔係我所認識嘅人類…我突然覺得好心寒呀…亦都覺得班鬼怪好慘…我真係好想去救佢哋…
「黐線架？黐線架！」
我真係衝咗前去，推走D傳教士，仲阻咗佢哋打D鬼怪。點知…
呢班西人，連…連我都打埋，其中四個將我監生噤喺地下，再衝一個埋嚟，成支銀棒向我兜頭打落嚟！
「啪~！噗~！碰~！躂~！嘭~！」「光管陳」五吓將佢哋打開晒。
而家我哋三個企喺鬼怪嗰邊，同D傳教士對侍緊，我只係相信一樣嘢，鬼不犯我，點解我哋要犯佢哋呀？
(待續)
下集預告：
到我醒返之後，我發現自己唔知身處喺邊…