米米蓮妖怪作品 -《旅行‧如此‧難以忘‧記 》(百集長篇): 第066集 ~ 欣︰我見到「河童」呀！仲終於見到輝輝喇！
第066集 ~ 欣︰我見到「河童」呀！仲終於見到輝輝喇！
阿明咁好嘅…輝輝對我咁講就好喇！
(睇嚟佢聽唔到我講其他嘢噃。)
點解今日冇人回應嘅？算喇！都係講返自己呢邊先。
上次講到兩個傳教士揸住本聖經就咁喺度驅鬼，但係…
又一隻女鬼喺佢哋後面出現咗，仲想殺佢哋，不過…
螳螂捕蟬，黃雀在後，究竟…隻「黃雀」係邊個嚟架呢？
「唔使我啦！睇表演啦！」荷瑪咁講，我哋都好愕然，即刻就另返轉頭。
我哋都見到…一隻爪一手從後摙住女鬼條頸！
「你哋唔係呢度住客！唔該即刻走！」
會咁講嘅，應該係呢度職員丫，但係佢…
雙眼通紅，紅粉緋緋，美艷中帶點妖邪之氣，佢…係阿妮！？
「唔好意思，呢兩位係我朋友嚟。」又一把聲喺(車立)口傳過嚟。
我哋再望過去，係一個頭髮齊蔭蓋眼嘅女性，佢…好重妖氣。
「啪，啪，啪！」阿妮佢三吓手就打暈咗「求救小姐」同兩位傳教士。
「阿欣，阿麗，你哋放心啦！佢哋三個都冇事嘅，只會好似發咗個夢咁。」
「雪女貴客，下次如果有朋友嚟，唔該請先登記丫！」
呢句說話表面好似好有禮貌，實質話中有刺。
「如果…我係都唔登記呢？」雪女陰沈嘅一句話。
「咁就唔好怪我唔客氣喇。」阿妮講嘢原來咁勁。
「阿魅，阿魎，阿魑阿魍佢哋喺13樓等緊我哋，我哋上去喇。」
阿妮突然雙手捉住呢兩隻女鬼。
「唔好意思，我唔係啱啱講過咩？佢哋未登記！唔可以上樓！」阿妮佢好嬲。
雪女冇回應，但係六樓突然成層變得好凍，仲結冰添，似乎係雪女所製造嘅。
「你唔想呢度D人被凍死，就好適可而止喇！唔好惹我呀！」雪女聲線好凶狠。
「哼！貴客好似想發脾氣添噃！不過呢度嘅人，都係我嘅貴客，冇一個係你嘅出氣袋！」
「匙~ 匙~ 匙~ 匙~」突然地下出現一個水氹，D水不斷向下流…
大家都靜咗落嚟，就似係等待水氹中嘅嘢走出嚟一樣。
水氹中突然鑽出一個頭嚟，係…係河童！？係典型嘅一隻河童！
佢突然向我哋伸出一個牌照，仲依依喲喲咁，整套動作就似係警察一樣。
我唔知點解好想問佢一個問題…但係我識嘅日文有限…
「Can you speak English？」家姐竟然開口咁問，唔通佢都想知我所想知嘅嘢？
「Of course！」河童竟然咁回答。
「Who are you？」
「You can call me Kappa but my name is Pakka，I am a police！」
「Who’s know？」
「Diu Li know me！」
「Who is Diu Li？」
「Diu Li is Chinese！」
「細妹，Diu Li係中國人？係邊個嚟架？好出名架？」家姐突然轉頭嚟問我。
「佢好似唔係講緊中國人，佢好似係話Diu Li係中文，佢好似鬧緊你呀。」我答。
「你條死河童，講粗口鬧我！？」家姐調返轉頭去鬧河童。
「對唔住！對唔住！對唔住！」
「仲要原來識中文添！？」
「唔係呀！乜你唔知咩？鬼怪嘅力量去到某個程度，就會有呢個技能。」
「咩技能呀？」
「呢個技能叫做「翻譯通」！如果你見隻怪識講你哋D話，又唔似係你哋D人，咁你就要多加小心喇，佢嘅能力唔少嘢架！」
「咁你嚟做咩呀？」
「差人梗係捉賊啦！」佢轉身走向女鬼。
「而家唔係是必要你講，但係你所講嘅嘢我將會唔記得，將來亦都唔會上庭，因為我就係法律，而家拉你！」
「!@#$%^&！」兩女鬼回應。
「咩罪拉你？你廢架？你唔係非法進入過人哋身體咩？仲恐嚇過人哋添！」
「!@#$%^&！」
「咩話？雪女保你？佢係律師定法官呀？佢試吓阻我丫喇，我先打爆佢個頭，再告佢阻差辦公添呀！」佢用手銬鎖住兩隻女鬼就轉過身嚟。
「你就係雪女呀？跟我返去落口供！」河童轉過頭問雪女。
講完之後，佢哋四隻就跳咗入水氹，水氹亦都好快唔見咗，不過…
雪女臨走前，前蔭吹起，我見到佢恐怖嘅眼神，就似係話會返嚟報仇一樣。
………
「冇事喇呀？警察嚟處理咗喇吓？」
一個男職員走咗過嚟。
「呢位係達叔，呢度嘅老闆，呢位係阿輝女朋友，阿欣，佢家姐，阿麗。」阿妮介紹大家。
「你哋好！你哋D嘢唔好食喇，我哋帶返呢三個客入房，我哋去樓下食丫。」達叔咁講。
之後，大家一齊帶咗「求救小姐」同兩位傳教士返房後，就落咗樓下大堂…
達叔佢好好人，買咗好多嘢食俾我哋兩姊妹食，我哋就係咁喺大堂度享受美食。
因為太多嘢食喇！自己又肚餓噃！我咪係咁食係咁食囉，點知…
我食到成嘴都係嘅時候，突然見到…
輝輝呀！死喇！好醜怪呀！同佢拍拖咁耐都試未過俾佢見到我咁樣架！
我迅速用閃電手攞張紙巾抹嘴，同吞埋個口裡面D嘢！
我心諗，死人頭！仲唔過嚟攬住我？係咪嫌我污糟呀！？點知阿輝佢…
佢真係突然衝咗過嚟攬住我，仲好實添，我當堂呆咗…
拍拖咁耐，我哋都好規矩，從來未試過咁親近架！我而家…我而家…
個人好熱呀…一方面…我唔知點算好…一方面…我又幾享受呢個擁抱噃…
「喂！你當我死架！？光天化日非禮我個妹！？」
輝輝佢俾家姐扯開咗。
「咦！咩你哋返咗嚟喇？」輝輝朋友—阿狗同「袋袋」都落咗大堂，佢哋對住輝輝同阿明講，仲望到我哋添。
「Hello！阿欣，好耐冇見！呢位靚女，你朋友呀？」
阿狗向住阿妮耍手另頭話唔係佢講，咁當然，就係「袋袋」佢講啦。
「你哋梗係呢個阿輝嘅朋友啦！我係阿欣家姐！」家姐態度好似唔係太好。
「嘩，原來咁巴喳架喎！」又係「袋袋」講。
「關你咩事呀？賤男！」
「你又知我賤嘅？你想唔想我「賤」你丫？「賤」足你成晚都得呀。」
「袋袋」佢雖然係講笑，但係家姐似乎仲嬲，一手就扯咗我返上房。
不過，輝輝好快就同袋袋搭咗第二部(車立)嚟搵我，好在我哋未閂得切門啫。
輝輝嚟到，乜都未講，「袋袋」就一手扯走家姐個頭箍，之後即刻走咗去…
阿姐即刻好嬲咁追返去搶，嗰個係佢最心愛嘅頭箍嚟架！
「阿欣呀！不如我哋入去坐吓先囉！」輝輝咁講，我咪同佢入房囉。點知…
「啪！」度門閂埋咗。而家個房得返我同佢，我個心突然就跳得好勁喇…
「噗噗，噗噗，噗噗，噗噗~」
我同輝輝坐埋同一張床度，張床又好衰咁噃，係咁彈吓彈吓，我哋都唔知點解，越彈就越埋…
唔知呢D係咪就係「異性相吸」嘅定理呢？
我眼尾見到輝輝隻手好似想唔規矩，咁…我咪等佢隻手埋嚟先囉…
點知佢…突然揸起個搖控，噤開咗電視，但係個樣就好似好後悔開咗電視咁…
嘻嘻~
(待續)
下集預告：
做愛嘅嘢你哋唔會明架喇！