米米蓮妖怪作品 -《旅行‧如此‧難以忘‧記 》(百集長篇): 第065集 ~ 明︰我喊！？睇「星」老前輩出手啦！
第065集 ~ 明︰我喊！？睇「星」老前輩出手啦！
我望住自己隻手，怪「佢」點解唔伸出去捉住小倩…
(你應該望埋對腳呀！點解唔追出去攬實佢呀！？)
或者…「你」講得啱…
「喂，你哎吔女朋友，小倩呢？」
阿輝同「寶寶」嚟到，但係我仲喺沈溺喺一片慚愧同後悔當中。
「走咗。」我只係咁回應咗兩個字。
「走咗！？定係俾鬼捉咗呀？你嚟搵佢，而家搵到佢喇，你又…」
「佢係鬼。」個「鬼」字一出，我知道自己只係想有人認同我嘅決定…
但係最諷刺嘅係…就連我自己都說服唔到我自己，我想問自己…
「鬼又點啫！？」阿輝講咗我心裡面嗰句。
「有乜分別…」我只係同緊自己講，諗緊鬼同人有乜分別。
阿輝佢之後再冇出聲，淨係喺度陪住我。
………
迷糊間，突然有兩個人行到我面前，原來係「星」老前輩同「肥龍大師」。
「你哋…點解都喺度嘅？」
我問完，佢哋回應咗我，「星」老前輩就用力噤住阿輝額頭嘅損口…
雖然聽到阿輝大嗌，好似好痛咁，但係又真係好返晒咗。
「至於明仔你呢，就係一個訊息。」
「咩訊息呀？」我真係好想知，好想係同小倩有關嘅訊息。
「頭先喺我哋身邊行過嘅嗰隻女鬼，係你三世姻緣嘅伴侶。」
「你…你講小倩！？咁…咁你哋唔幫我捉住佢嘅！？」
「後生仔，總係將責任推俾其他人嘅，要捉住佢嘅，唔應該係我哋，而係你。」
呢句講得好啱，根本就係我放走咗小倩…
之後，前輩講咗好多說話，我都好用心去聽，仲俾我知道原來小倩一直喺度等緊我…
冇錯，我第一次見到佢，其實已經有種似曾相識嘅感覺，真係…真係…
我已經忍唔住流咗眼淚。
「咁…咁…我係咪應該要去搵返小倩呀？」
「佢行嗰邊，應該係去「千年石妖」千歲大壽嘅壽宴。」
「千年石妖嘅壽宴！？小倩會唔會有危險呀？」
「放心啦！如果係有，一早佢就喺度生存唔到啦！」
「聽我講！聽日同一時間，喺女更衣室裡面等啦！我哋會陪你哋會一會佢！」
當我哋正想走之際，又有兩個人行緊過嚟…
一個面尖身長而瘦，一身深藍色嘅道服，腰間有個葫蘆…
一個面大身圓而肥，一身麻衣，右邊手揹住一個大布袋…
點解D高人總係鍾意一肥一瘦一高一矮咁行埋一齊架啫？真係見到都有D嬲，我亦不禁望一望老前輩同「大師」。
再之後，我望返過去呢兩個男人度，呢兩個男人一睇就知唔係等閒之輩…
仲應該係人嚟，唔係妖怪，但係一樣嘢係肯定嘅…就係佢哋唔會係正派。
「咦！「星」老怪，乜你仲未死咩？」肥矮男講。
「高瘦樣衰嗰個就係「西斜」，個名叫余二十，妖術高超，係個高手，不過係條「粉腸」嚟；肥矮仲樣衰D嗰個就係「南轅」，個死人名叫袁丰田，係化獸師，或者叫化妖師，成個「大蕃薯」咁，廢物嚟！」「星」老前輩冇理肥矮男講嘢，淨係咁同我哋講。
「死老坑，把口咁臭嘅！」高瘦男講。
「咩話！你夠膽講多次！」肥矮男大嗌。
「唔使理兩隻狗，丫，唔啱，廢事侮辱咗D狗仔。唔使理兩隻怪物先啱，我哋走！」
啱啱先講完，肥矮男就一吓掟咗個布袋出嚟，一隻怪物就咁慢慢咁喺布袋走出嚟。
「咁口臭丫喇！試吓我啱啱捉嘅「樹藤狼怪」啦！」
怪如其名，呢隻怪物，狼頭狼身，下盤卻係會郁動嘅樹藤，鋒牙利齒，口水長流，似係想食人嘅咁…
我都未完全望真佢，佢就一支箭咁衝埋我哋度…
「靚仔，你肚唔肚餓？」「星」老前輩係問緊「寶寶」。
「吓！？」「寶寶」回應。
之後，老前輩就左手一伸，向上拉開「寶寶」個口，右手再一伸，「嘭」一聲打落「狼怪」個頭度…
順手就將成隻「狼怪」隊咗入「寶寶」個口度。
「寶寶」咕嚕咕嚕咁就吞咗成隻「狼怪」。
「有肉有菜，好有益架，啱晒小朋友，好唔好味呀？」
「食得太快，食唔到味道呀，老爺爺。」
「仲有冇呀？大蕃薯！」「星」老前輩問肥矮男。
只見肥矮男咬牙切齒有D唔忿氣咁。
「死老坑！懶係勁！試吓我隻「崑崙石獅」啦！睇你點食石頭！」高瘦男講。
佢即刻做個手印，地下就突然地震，慢慢一副石棺就喺地下升上嚟…
石棺迅間化成灰燼，淨係見到D灰塵飛來飛去咁，白蒙蒙一片…
慢慢好似見到D嘢，灰塵散開，一隻石身獅子出現咗，「哇拗！」
我唔係好識道術都感覺到呢隻嘢，最少可以打死十隻「狼怪」。
「食「狼怪」夠飽喇可？使唔使食D石頭入個胃度磨一磨佢？」「星」老前輩再問「寶寶」。
「星」老前輩果然係高手中嘅高手，完全冇驚過，仲好淡定添，而「寶寶」當然係耍手另頭啦。
之後，唔啱，唔應該叫之後，應該叫即刻，隻石獅子衝得比隻「狼怪」仲要快…
一迅間就衝到前輩面前，仲即刻揮動石爪攻擊前輩，但係…
「兜，巴，星，龍，掌！」我眼見前輩一巴打埋去石獅子個頭度…
成個頭…估唔到就係咁簡單…成個飛甩咗，仲飛埋去個高瘦男度…
高瘦男冇任何反應，石獅子頭就咁飛埋去佢個頭度，「噗」一聲…
我心諗，你唔係咁都冇事呀？點知…佢真係一D事都冇，連一滴血都冇…
淨係石獅子頭爆開咗，而家一地都係。
高手過招，真係唔同D，而家佢哋八目雙投，即係四個高手互望。
「好喇！我哋走喇！」老前輩叫我哋走。之後肥瘦男企咗喺度，並冇阻我哋。
………
我哋好快返到去機舖，亦好快講咗再見。
………
之後，我就同阿輝返咗去酒店。
唔經唔覺，原來已經好夜喇，我哋返到去，喺樓下…我見到…
阿欣！阿輝同佢對望之後，就即刻上前擁抱。而我就喺度諗…
兩年前，我第一個喜歡嘅女仔，冇錯，就係阿欣！
我仲記得我當時買咗個叉雞飯，就咁走咗入去隔離間「牡丹樓」度坐低食…
食食吓見到佢…佢好靚，好清純，笑容仲好甜…
(那次我於餐廳的一角~ 偷看你~)
自嗰次之後，我就成日襯食晏同放學去等佢，偷偷望佢…
(這麼遠親你~ 我視作無比的福氣~)
少女情懷總是痴，其實少男都一樣，無論晴天陰天雨天，我都會等住見佢一面…
(晴天~ 陰天~ 雨天~)
仲記得有次落大雨，佢去咗個亭度避雨，我衝咗前去…
(你在何地~ 代表我天氣~)
放低咗把遮就走咗，我仲匿埋一邊，睇吓佢會唔會用…
(煩擾~ 完美~ 造夢也都因你~)
當時我好開心，因為佢真係同佢嘅朋友一齊用咗…
(晴天~ 陰天~ 雨天~)
阿輝認識佢嗰日，其實我一早諗好咗放學去向佢表白…
(我在何地~ 亦都會等你~)
哈哈，但係點都好啦，而家有阿輝鍚佢，我就放心喇！但係…
(如果不給你嫌棄~ 才是我運氣~)
比著以前，我每次聽到呢首歌，都會諗起同一個片段，亦同樣好回味…
但係到咗今日，我竟然一諗到其他女仔，就會覺得慚愧…
我發覺…我個心…淨係可以容納你一個—小倩。
(待續)
下集預告：
死人頭！仲唔過嚟攬住我？