米米蓮妖怪作品 -《旅行‧如此‧難以忘‧記 》(百集長篇): 第064集 ~ 輝︰睇我表演啦…都係算喇，睇阿明條死佬喊啦！
第064集 ~ 輝︰睇我表演啦…都係算喇，睇阿明條死佬喊啦！
咦！阿欣嗰邊咁多勁人，睇嚟我可以放心喇！
(你似乎淨係擔心阿欣有冇俾人姦囉！)
梗係擔心啦！試吓你條女俾人姦丫！不過…
我呢邊咁，差D想姦人都再唔得喇…
「骷髏鬼」佢哋揸住把鐮刀，望住我個「下部」，我大脾內側當堂涼咗一涼。
「你哋想點呀？」我唯有咁問。
「唔緊要啦！同佢「格劍」囉！我買你贏架！」
係阿明呀！佢講咩都唔緊要喇！見到佢，我就開心喇！更開心嘅係…
佢成功將「骷髏鬼」嘅視線轉到佢「下部」喇！多謝你呀，阿明！
「隱身咒啦！」唔通真係睇住佢俾鬼切咩？一場朋友係要咁嗌吓嘅。
但係我真係估唔到佢咁勇猛，一句「食蕉啦」就衝咗埋去同「骷髏鬼」肉博…
仲叫我同佢每人一隻鬥快打爆添，身為一個男人，面對挑戰，當然唔縮得啦！
「好！」
見到阿明已經撞開咗一隻「骷髏鬼」。
我即刻就點額頭，「隱身咒」，踏石頭，踩樹身，凌空跳起，「護，身，咒！」
一對膝頭跪落去我隻「骷髏鬼」度，佢即刻訓低咗，仲俾我坐住咗。
原來坐住佢做「護身咒」，佢會一直俾火燒架，正呀！點知…
我一聽到阿明佢嗌「在前列淋冰」，即刻乜火都冇晒。
仲俾條死仔阿明佢先打爆佢隻「骷髏鬼」添…
唉，不過算啦！總算攪掂晒五隻「骷髏鬼」…
之後，我哋就走去搵阿明嘅哎吔女朋友—小倩。
………
「寶寶」佢帶咗我哋去一個挖石場，奇怪嘅係途中竟然完全冇阻滯。
「可能…守衛都去咗噓噓呢！」「寶寶」咁講。
之後，佢仲好刻意拉走咗我去第二度搵，等阿明一個人行去前面。
呢招會唔會有D太明顯呀？阿明根本就係行緊去小倩度…
所以，我咪行行企企算囉，點知…
我哋行開咗冇幾耐啫，就遇到一大堆「骷髏鬼」。起初佢哋見唔到我哋架…
「鬼呀，走呀。」我細細聲講。
但係最衰我急咗啦，一見到佢哋就轉身走，點知踢到舊石頭，俾佢哋發現咗我哋。
「人呀！追呀！」佢哋大大聲叫。
我同「寶寶」即刻就走返去搵阿明。
好快就搵到佢哋，但係佢竟然仲同小倩黐纏緊…
「喂！夠未呀！？D鬼追到嚟喇！你哋睇吓後面！」
之後，我哋又再逃跑，阿明又再走開，拍戲咩？點解唔一齊走呀？
不過講真，「重色輕友」呢D嘢，真係常識嚟，俾著係我，都會咁做。
趴你個街丫！真係又拍戲咩？有一男一女唔追，全部鬼追晒嚟我哋呢邊。
「寶寶，你識唔識打鬼呀？」
「唔識！」
「咁你識咩呀？」
「錦鯉識游水，我識食鬼！」我真係想話佢白痴。
「唔怪得你同阿明咁啱傾啦。你講「食鬼」，係真係可以吞咗佢哋落肚丫嘛？」
「係呀，不過食過一次咋，佢哋好難食架！」我真係俾佢激死！
「後面有十幾隻鬼，我一陣出招會收一堆，其他你吞咗佢，OK？」
「哦！」
我立即轉身，造出「九字護身法」。
「收！」
一收，點知中得一半，大鑊！但係…
「寶寶」亦都擘大個口，個口大到呢！仲有好強嘅吸力添！
所有「骷髏鬼」迅間俾佢吸晒入口！我真心無奈，無奈到想鬧爆佢！
早D講，早D做丫，大哥！無端端要我跑十公里，真係想死。
「輝哥哥，好難食呀！」真心覺得抵佢死。
「難食嘅嘢先有營養呀，寶寶你食多D啦，快高長大呀。」
攪掂晒D「骷髏鬼」之後，我哋就四圍搵阿明佢哋…
我哋好快就搵到佢，但係點解得返阿明佢一個嘅？
「喂，你哎吔女朋友，小倩呢？」
「走咗。」呢句說話好冷。
「走咗！？定係俾鬼捉咗呀？你嚟搵佢，而家搵到佢喇，你又…」我都未講完…
「佢係鬼。」
「鬼又點啫！…吓！咩話！？…eee…唔…唔係妖咩？」
「有乜分別呀？」依然好冷。
「妖可以係妖人或者人妖，咁都總算係個人丫，不過鬼，就真係唔係人噃…」
我都唔知點接落去，淨係陪佢企咗喺度，等佢清醒返D先囉。
突然間…迷霧之中…有一肥一矮，一高一瘦嘅人影行緊過嚟…
咦！係「星」老前輩同「虫節大師」呀！
「你哋…點解都喺度嘅？」阿明問，係阿明問呀，佢似乎好返少少喇！
「冇呀！打完機，咪落嚟睇吓你哋囉！」老前輩講。
「哈哈哈！師父俾我炒蛋呀！」
「你仲好講？喺香港，唔讓「彎」係死罪嚟！你信唔信我嚟手就打死你丫嗱？」
「Eee…其實係咁嘅，想送你哋每人一份禮物！」大師轉個話題。
「禮物！？」
「輝仔，你過嚟丫！」老前輩講。
「丫~~~~！」「星」老前輩一隻手指公噤住我額頭嘅損口，痛到我想死呀！
手指放開，我就抖晒大氣，仲赤赤痛緊…
「咦，阿輝，你個損口冇咗喇！」阿明講。
頂佢個肺丫！使鬼佢幫我護理傷口咩，我自己唔識癒合咩？黐線架！好鬼痛呀！
「至於明仔你呢，就係一個訊息。」老前輩再講。
「咩訊息呀？我都冇心機理嚧。」阿明依然唔係咁開心。
「頭先喺我哋身邊行過嘅嗰隻女鬼，係你三世姻緣嘅伴侶。」
「你…你講小倩！？咁…咁你哋唔幫我捉住佢嘅！？」阿明突然變得清醒。
「後生仔，總係將責任推俾其他人嘅，要捉住佢嘅，唔應該係我哋，而係你。」
阿明佢顯得真係好慚愧。
「再加上，你根本唔使追佢，佢都會係屬於你，因為佢真係好鍾意你。你以為女仔走開，係真係想走開咩？你錯喇！佢係想你追佢咋！我唔係你，我唔知點解你唔追佢，原因係咩，相信只有你自己知，但係，我可以同你講，你哋而家係第二世。上一世，你哋青梅竹馬，相親相愛，可惜遭到父母反對，最後雙雙化成毛蟲…」
「有蝴蝶唔化，化做毛蟲都有嘅？」我諗住緩和一吓氣氛，但係阿明就好專心聽。
「有頭髮邊個想做癩痢丫！？你咪咋亂哥柄住啦！我未講完架！雖然係毛蟲，但係始終可以相愛到死。但係今世，你投胎去咗香港，佢投胎嚟咗日本，本來都相安無事，可以喺你呢次旅程認識，跟住相愛，但係…喺佢十二歲嗰年，遇返佢上一世對佢非常痴戀嘅一個男人，嗰個男人今世係個變態鹹濕佬，你女人佢為咗保住自己清白，所以俾個男人逼到跳崖自盡，可恨可悲可歌可泣嘅係…你女人上一世嘅記憶從來冇消失過，佢一直深深愛著你…所以…你女人已經足足等咗你成六年，正確D嚟講，係上一世到今時今日。」
「我明…我明喇，唔怪得我第一次見到佢，就有一種似曾相識嘅感覺…個感覺好真實，好開心…」
阿明佢已經流晒眼淚。我作為朋友，真係好想安慰佢，但係真係唔知點做好…
仲好唔識做咁，自己D眼淚都浪吓浪吓…
「咁…咁…我喺咪應該要去搵返小倩呀？」
「女人係唔縱得架！八十歲前都唔可以俾飽飯佢食呀！」
我就奇怪點解「星」老前輩之前嘅說話明明表現出佢好清楚女人架…
但係點解到而家都冇老伴呢，原來係因為咁，因為佢大男人，係女人見到都怕。
「哈哈！我講笑咋，不過頭先佢行嗰邊，應該係去「千年石妖」千歲大壽嘅壽宴。」
俾佢呃咗添，真係難分真與假。
「千年石妖嘅壽宴！？小倩會唔會有危險呀？」
「放心啦！如果係有，一早佢就喺度生存唔到啦！」
「聽我講！聽日同一時間，喺女更衣室裡面等啦！我哋會陪你哋會一會佢！」
(待續)
下集預告：
「「星」老怪，乜你仲未死咩？」