米米蓮妖怪作品 -《旅行‧如此‧難以忘‧記 》(百集長篇): 第063集 ~ 欣︰真係尷尬呀！…吓！？又有女鬼！？
第063集 ~ 欣︰真係尷尬呀！…吓！？又有女鬼！？
阿明咁衰嘅！小倩流晒眼淚都唔去追人…
(細妹，唔好睇人哋嗰邊住喇！鹹濕鬼仲喺度呀！)
係噃！而家…
「大肥鬼」佢向我走過嚟，「遮鬼」就向家姐走去。
「!@#$%^&*。」「大肥鬼」講咗D嘢，仲向我伸出一隻手…
「佢哋究竟想點呀！？細妹，小心呀！」
我差D唔記得咗，呢度係日本，原來「大肥鬼」係講緊日文。
其實我同家姐都學過吓日文，不過一時之間個腦真係轉唔到。
「蘇咪媽些，!@#$%^&*？」
我雖然好驚，但係我見佢哋再冇任何非禮動作，所以嘗試咁問。
但係…佢哋竟然話…
佢知道佢哋醜樣，但係冇惡意架，只係見我哋跌低，想扶起我哋。
真係尷尬呀！更尷尬嘅係…原來人哋根本唔識講廣東話…
上一集D非禮說話原來只係我自己驚得頭，胡思亂想，真係唔好意思呀！
「肥哥哥」同「遮哥哥」原來仲好有禮貌添…
佢哋扶起我哋，仲幫我哋執起D跌低咗嘅行李。
「咦！阿欣，阿麗，你哋做乜嚟咗呢層嘅？」
係阿妮呀！佢見我哋男朋友都係朋友就親切D嗌我哋囉。
不過，家姐就似乎唔係咁鍾意人哋叫佢阿麗囉。
「嘻嘻！你哋梗係俾呢度D人客嚇親喇！」
「係呀！不過係我哋唔啱，以貌取人添！」家姐咁回答。
我真係俾家姐激死，「肥哥哥」同「遮哥哥」仲未走架，好在人哋唔識聽架啫。
之後，阿妮就帶返我哋上6樓嘅酒店房。
………
呢個房唔算好大，但係都幾舒服架。
阿妮就返咗去做嘢，家姐就即刻鬧荷瑪。
「你咁衰架！頭先好在冇事啫，唔係點算呀？點靠你保護我哋呀！？」
佢講到呢句，我其實都有個疑問，但係原來一直都冇問過。
「荷瑪，其實你點解會喺家姐身上嘅？係為咗保護我哋？但係點解呀？」
「報恩囉！十年前，我初到地球，點知一落飛船，就俾架貨車車死咗，當時你兩姊妹見到我條屍，跪咗喺我面前喺度係咁喊，係咁喊，喊到你哋媽咪嚟到，幫手安葬咗我。之後我落到地府，地府話我唔係地球生物，唔收留我，咁我咪返上人間囉，點知你哋人類嘅靈位硬到死，都唔好訓嘅，我又淨係識你兩姊妹，咪嚟搵你哋囉。 我見你家姐個PATPAT淋淋地，咪訓喺裡面囉，點知佢個人越大個PAT越大，而家變成豪宅…」
「喂！夠喇！咁你頭先又唔出嚟報恩！？」家姐怕醜到紅晒塊面。
「你哋唔係安全喇咩？頭先根本唔知你哋驚乜，人哋樣衰都有罪咩？」
「咁你都可以出一出嚟，等我哋唔使咁驚家嘛！」
「我出嚟！？你殺咗人哋呢次！」
荷瑪又好似講得好啱噃。
「仲有呀！我真係好攰呀！」
「其實你攰乜啫？已經成日喺我身體度訓啦！」
「咪拜你所賜囉！你知嗎？一個女人由「貓樣」變做「美女」，仲要係「美少女」，你諗吓要幾多工程先得？要幾多化妝品呀？塊面幾攰呀？」
作為一個女性，真係冇可能唔明白。荷瑪真係講得好有道理。
我諗家姐都明白，所以佢都再冇博嘴，反而咁講︰—
「咁下次我識變架喇！你返去訓先啦！」
之後，同我一樣咁愛乾淨嘅家姐就走咗去沖涼，而我呢…
就攞返我本日記出嚟，睇吓訓前有乜好寫囉，而家咁早當然未寫啦。
但係我有個習慣就係每次寫之前都睇返之前部份嘅內容。
順便攞埋輝輝同我喺香港公園影嘅合照同佢送俾我嘅熊BB出嚟先…
最衰輝輝佢啦，出咗去，唔喺酒店，唔係人哋使乜睹目思人噃！
睇住我哋呢張相，我就會諗返當日喺香港公園，你好傻咁大叫我個名…
(可不可~ 用餘下薄弱氣力~ 換取一聲親愛的~)
睇到熊BB，我就會諗返嗰日你同我去「歡樂天地」玩，贏咗呢隻熊BB俾我…
(可不可~ 用無心得到的去換取~ 心愛的~)
我突然仲諗返起…呢兩日我為你嘅頻撲，只係想你冇事咋…
(苦心的~ 不怕愛你有多苦~ 命運亦不顧~)
但係…點解…過到嚟…仲見唔到你噃…
(對你太在乎~ 沒甚麼抱負~ 只想這心花不會枯~)
你知唔知人哋好掛住你架！？衰人！
(我要你在乎~ 沒甚麼真心喜惡~ 只想彼此都不厭惡~)
………
「細妹！你又「精神分裂」呀？」
「咩噃！」
「到你喇！沖完涼出去食D嘢先啦！」
之後，我就去咗沖涼。
………
沖完涼，換過件衫，我哋就出咗去…
不過我哋喺樓下便利店買咗D嘢食就算，我驚輝輝佢返到嚟見唔到我丫嘛。
我哋買完之後好快就返咗上6樓，但係…
我哋先啱啱出(車立)，就突然有一個女人衝埋嚟。
佢跪喺我面前，雙手捉住我，係咁喺度喊…
「救命呀！救命呀！求你救救吓我男朋友丫！」
「呢位小姐，究竟乜事呀？」家姐問。
我都根本唔知點算好，但係佢喊晒口咁，個樣就好似之前嘅我咁無助。
「我男朋友佢俾鬼攪呀！佢而家郁都郁唔到，成個身都好凍咁，我好驚呀！」
「荷瑪，你而家有冇力量呀？」家姐問荷瑪。
「OK！去啦！」
「咁小姐你帶一帶路丫！」
我估嗰位小姐係驚到唔知搵咩人幫，所以一見到我同家姐就搵我哋幫手。
之後大家走到最尾嘅一間房，房門打開咗，一入到去…
呢度好陰寒，冇開燈，淨係見到床上面有個男人訓咗喺度…
亦真係如嗰位小姐所講，佢郁都唔郁，但係佢身邊就奇怪地有D藍光。
「小姐，呢位就係你男朋友呀？」
「係呀！你哋有冇方法幫幫佢呀？」
我試過開燈，但係真係開唔到，呢度仲好凍，凍到好唔正常。
我哋都唔敢行近呢個男人，亦冇即時回應呢個小姐，但係…
突然一吓寒風吹埋嚟…道門仲想閂埋添…
好在我同家姐都有做準備，將我哋買嘅嘢食頂住咗道門。
我哋見唔對路，立即就衝出門口，同時間，我哋見到…
一隻女鬼喺男人身上衝咗出嚟，仲衝埋嚟我哋度…
我哋立即向 (車立)口跑返去，女鬼就一直飄過嚟追我哋…
「荷瑪，荷瑪，出嚟呀！」
喺轉角位，「小姐」唔小心跌低咗，我哋想返轉頭扶佢，但係女鬼已經到喇！
突然，我旁邊有對外國傳教士，佢哋各手執一本聖經…
兩人同時一手伸向女鬼，立即諗出經文…
只見到女鬼俾「聖經」嘅白光籠罩住，唔能夠再做任何動作。但係…
又一隻女鬼喺兩個傳教士身後出現，仲想用鬼爪爪佢哋…
「荷瑪！做乜仲唔出嚟呀！？」
「唔使我啦！睇表演啦！」
我哋見到…女鬼身後面又有一隻利爪，利爪出手比女鬼仲要快…
一手就摙住佢條頸！
「你哋唔係呢度住客！唔該即刻走！」
(待續)
下集預告：
「…三世姻緣…」