米米蓮妖怪作品 -《旅行‧如此‧難以忘‧記 》(百集長篇): 第062集 ~ 明︰仲有鬼要打添呀，睇我表演啦！…小倩！小倩！
第62集 ~ 明︰仲有鬼要打添呀，睇我表演啦！…小倩！小倩！
唔緊要啦！同佢「格劍」囉！我買你贏架！
(估唔到你咁睇得起我！)
睇得起你「細佬」啫！甩咗再叫我啦！我講返我呢邊先！
神壇上嘅「師兄」，突然拔出長刀，喺度係咁吸係咁吸…
嗰D紫色氣…係屍氣嚟呱。
佢都幾環保噃！不過就冇乜禮貌，竟然當我哋透明…
上一集我仲以為佢望緊我哋添，原來係望緊「蛇蠍魔人」條屍…
我真係想鬧佢「老母」，點解生佢出嚟，唔教教佢D禮貌。
點知佢一吸完，我都未出聲鬧佢啫，就轉過身走咗嚧。
我見「星」老前輩同「肥龍大師」佢哋眼濕濕咁…
雖然我唔知佢哋有乜好喊，不過正所謂「男兒流血不流淚」…
「男兒有淚不輕談」，「男兒口大食四方」，唉！算喇！我都知邊句啱用喇…
不過…就連我都俾佢哋整到眼濕濕…
原來我係想講「人唔傷心唔流眼淚」。
點都好啦！唔開心嘅嘢總係會過去嘅！
所以我咪想借住扮急，出吓聲，希望有D人聲，大家唔使咁唔開心啦！
「我遲到，我遲到喇！再見！再見！有機會再見啦！」我扯咗阿輝走…
點知，老前輩佢哋走得仲快過我哋，之後先後兩次再見到佢哋…
我心諗佢哋可能係想暗中保護我哋，哈哈，其實係我想佢哋保護就真！
到咗「理嘉城」，我見小倩唔喺櫃位，咪四圍搵佢囉。
我好自然咁去咗上次佢帶我「飛」嘅嗰度…
入到去就見到「寶寶」，佢仲話等咗我好耐。
「寶寶，點解你喺度嘅？」
「結衣(小倩)姐姐佢俾「千年石妖」捉咗呀！你快D同我去救佢啦！」
我呢一刻…唔知點算好，但係見到阿輝都跟咗入嚟…
「阿輝，你嚟得啱喇！貴寶寶！阿輝！寶寶，你叫佢輝哥哥啦！」
「寶寶，咁你帶我哋去「桂家村」啦！」
「發生咩事啫？」阿輝問。
「你合埋眼先啦！寶寶會帶我哋去「桂家村」。」
講完之後，我自己都合埋咗眼，「寶寶」一手搭住我，就開始「飛」喇！
呼~~呼~~呼~~到咗！
咦！？阿輝呢？
「傻佬明！傻佬明！」「桂家村」前面個森林度傳嚟阿輝把聲。
「阿輝！你去咗邊呀？」我走近森林入口就大叫。
「我喺個迷霧森林度呀！」
「你唔好郁，我哋嚟搵你丫！」
講完呢句，我就同埋「寶寶」入咗森林。
呢度好大霧，又多長草，我哋要盲摸摸咁向阿輝把聲方向行…
「輝哥哥梗係俾隧道嘅「扭曲樹靈」拉咗落去森林。」
「扭曲樹靈！？」
「「扭曲樹靈」負責維護「迷霧森林」，「扭曲隧道」係人類世界同呢個世界嘅傳送渠道嚟架。」
我好愕然，好似好多嘢想唔明白咁，尤其係小倩點解有能力嚟到呢D地方嘅？
「我擔心輝哥哥佢會遇到「骷髏守衛」…」「寶寶」再講。
「「骷髏守衛」！？又係咩嚟架？」
「「千年石妖」係呢個世界嘅霸主，佢操縱晒一切，「骷髏守衛」係一堆已經俾佢洗腦嘅亡靈，負責監察整個「迷離世界」嘅秩序，不過正確嚟講，佢哋嘅所作所為都係呢度嘅「秩序」，「桂家村」佢哋唔敢攪，因為有沙婆婆，不過佢哋就成日喺度捕捉D迷路嘅人類食。」
佢咁講，我更加擔心阿輝…
………
「哈哈哈哈，夠薑就再嚟丫！」
我聽到阿輝把聲喇！撥開長草一睇…
見到兩隻「骷髏鬼」正想對佢…
「你哋想點呀？」阿輝問「骷髏鬼」。
「唔緊要啦！同佢「格劍」囉！我買你贏架！」我好開心搵到阿輝，就咁就大嗌咗出嚟。
「估…唔到你咁睇得起我！」阿輝見到我嚟咗，似乎佢都好開心。
「睇得起你「細佬」啫！甩咗再叫我啦！我喺度睇水！」但係…
「骷髏鬼」而家望住咗我囉，PK喇！
「隱身咒啦！」阿輝大叫。
我心諗成日忍忍忍，今次我忍屎忍尿都唔「隱」呀！
「男人大舊衰」！唔係！「男人大丈夫」先啱！
「食蕉啦，骷髏鬼！」我立即造出「九九九」。
「蝦！」
「六脈齊發」都一一打中「骷髏鬼」。
「挑我機丫喇！」
「阿輝！左邊你，右邊我！睇吓邊個打爆佢哋先！」
「好！」
「護身咒！」之後我成個身飛埋去撞隻「骷髏鬼」…
佢硬食咗我一吓火傷，「隱身咒！」，我又行到佢後面…
「鬥，在，前，列，臨，兵！」我一邊造，一邊嗌。
「做乜鬥在前列淋冰呀，攪到我下身好凍呀，我冇晒火喇！」
我見到阿輝佢精到坐住隻「骷髏鬼」嚟出「護身咒」…
隻「骷髏鬼」就一直俾火燒，好在我出呢招止一止佢D火啫…
唔係我點贏呀！哈哈！
同時間，我嘅「六脈齊發」中正我隻「骷髏鬼」背脊，
佢「嘭」一聲就俾我打爆咗！一個字，爽！
「我贏！哈哈！」
之後我哋夾手夾腳攪掂晒其餘四隻「骷髏鬼」，第一次咁有成功感！
不過，事不宜遲，我仲要救我嘅小倩呀！
攪掂晒之後，「寶寶」就帶我哋去小倩被囚禁嘅地方。
………
呢度係一個挖石場…
「呢度點解咁怪嘅？」
「係囉！一直暢通無阻嘅？」
「可能…守衛都去咗噓噓呢！」「寶寶」咁答。
之後我哋分道揚鑣，我自已一個搵…
………
「家明！家明~~」遠處傳嚟一把女聲…
係小倩把聲呀！我即刻向住聲音方向跑過去…
(誰輕輕叫喚我~ 喚醒心中愛火~)
我見到被困住嘅小倩呀！我唔知邊度嚟D神力…
(幸運只因有著你~ 不再流浪與蹉跎~)
一吓就拉爛咗鐵欄，再即刻抱緊小倩，而家…
(來深深抱緊我~ 讓癡心加上鎖~)
係我第一次…同我鍾意嘅人…深情對望…係深情對望呀！
(落寞歡欣聽著妳柔情蜜語~ 在燃亮我~)
………
「喂！夠未呀！？D鬼追到嚟喇！你哋睇吓後面！」阿輝大叫。
突然一大堆「骷髏鬼」衝緊過嚟！
「寶寶，你叫佢哋嚟架？」小倩問。
「唔係呀！」
「個廁所好大架咩？咁多鬼一齊去嘅！？」
阿輝一路跑，一路叫。而我就…
拖住小倩，同佢哋兩個分開咗走…
………
終於避開晒D「骷髏鬼」。因為一切都嚟得有D怪，所以我就咁問︰—
「小倩，你哋係咪呃我呀？其實你係咪根本冇俾「千年石妖」捉到呀？」
當然，我嘅語氣係好溫柔架！
佢嘴嘟嘟咁，仲眼濕濕添…
「哼，係呀！我專登嚇你嘅！鬼叫你咁遲都唔嚟搵我呀！」
雖然佢喊緊，但係…唔知點解，我好開心呀！嗰種感覺，好幸福呀！
但係…
「明呀，頭先…我喺鐵籠度望住天空，問過老天爺爺…我想同你講…」
佢個樣突然變得好凝重，但係我就好開心，好期待佢嘅下一句冧話。
「咩呀？你講啦！」
「家明，如果…我話如果…我係鬼，你會唔會同我喺埋一齊呀？」
「鬼！？唔好講笑啦！鬼又點會有影噃！」其實我已經心裡面呆咗。
「個影係我造出嚟呃你架。」
突然…晴天霹靂，我個心就好似停頓咗咁。
我唔介意同鬼做朋友，不過…同鬼…點樣做情侶啫！冇未來家嘛！
所以…我就只有喺度…「哈哈哈哈哈~~」傻笑，不停咁傻笑…
希望佢講嘅…都唔係真話。
小倩見到我咁嘅樣，似係係我塊面度搵到答案，佢喺我面前…
「我明…我明架…我諗我明架，你…你…你唔使理我架喇…」
佢流咗兩滴眼淚…係清楚嘅兩滴眼淚…
嬌美嘅面容上配上如此嘅兩絲淚痕…
我個心…我個心痛到唔識形容…整個人…就似係被石化咗一樣…
眼淚流喺心裡面，雙眼卻只可以睇住佢轉身離去…
我就連伸手去捉緊佢都冇做到…
(待續)
下集預告：
只見女鬼被「聖經」白光籠罩，唔能夠再做任何動作…