米米蓮妖怪作品 -《旅行‧如此‧難以忘‧記 》(百集長篇): 第061集 ~ 輝︰地下城呢邊雨過天青…點解又有個迷霧森林架！？
第061集 ~ 輝︰地下城呢邊雨過天青…點解又有個迷霧森林架！？
欣！死淫鬼，走開呀！唔好蝦我阿欣呀！我要過嚟救你！我要過嚟救你呀~~！
(你冷靜D先啦！仲有添呀！你理掂你自己先啦！你睇吓你側邊！)
我慢慢冷靜返落嚟，而家四周圍都係蠍子。
「肥僧」，我應該叫返佢做「虫節大師」。
佢出奇地冷靜，嚴肅嘅表情話俾我聽，只要有佢喺度，乜嘢妖魔鬼怪都唔使驚！
佢同「星」老前輩講嘅一番說話，其實都幾感動到我…
「…而家！就睇吓我修練嘅成果啦！」
一連三吓電環震擊，全場所有蠍子迅間被打爆！
佢仲立即衝上神壇，想一吓擊斃巨型魔蠍…
但係唔成功，反而「蛇蠍老人」將巨型魔蠍嘅精華吞咗落肚…
再吞噬埋蛇杖嘅精華，「蛇蠍老人」皮膚就慢慢變成蛇鱗…
背部長出一條巨大蠍子尾，兩爪亦變成鬼爪，非常鋒利…
而家應該叫佢做「蛇蠍魔人」。
佢成型之後，立刻衝向「虫節大師」，佢哋連續過招數百吓…
百招過後，只見「虫節大師」受制於「蛇蠍魔人」嘅連環猛擊。
奇怪嘅係，「星」老前輩依然處之泰然…
即使而家「大師」已經被追打至跪喺地下，右臂亦被石化咗…
我真係想唔通，想唔透呀！
但就喺我想唔透嘅呢個時間，「大師」突然左手用力握住蠍子尾，全身發電…
「蛇蠍魔」被電至受傷，亦必須放棄蠍子尾，閃避到另一邊…
就襯「蛇蠍魔」尾巴重生之際，「大師」迅即再一次使出「紫電靈丸」！？
唔係！佢將呢招改成「雷神絕殺黑龍波」！威力更加強大！
猛力射向「蛇蠍魔人」！全場震撼！
「嘭~！」
「蛇蠍魔人」當場爆裂而死…呼…
………
突然神壇之上傳來一陣無形壓迫感…
我望上去，見到另一個世外高人…
佢腰間一把長刀，顯然非同凡響，佢仲望向我哋…
「大師」隨即叫出「師兄」二字，應該冇錯喇，佢就係「東歪」，司徒不正！
佢突然拔出長刀，但係唔係攻擊我哋…
長刀並唔係金光﹑銀光，或者白光，而係充滿妖邪之氣嘅紫光…
紫光一出，整個地下城嘅蠍子屍體隨即和應…
紫色妖氣從屍體發出，衝向長刀，「蛇蠍魔人」屍首嘅妖氣尤其厲害…
只見「星」老前輩及「虫節大師」並冇任何動作，但卻熱淚盈眶…
剎那間，妖氣已經全部被長刀所吸走，呢位高人亦冇理我哋…
轉過身就揮袖而去。
………
高人離去之後，不出數秒，「星」老前輩及「虫節大師」眼流已徐徐流下…
「我以為會有一句…至少一句說話會同我講，哈…哈丫！點知…連講聲「再見」都冇，哈哈哈丫…」
「師父…」
佢哋雖然冇解釋，但係我睇得出…睇得出佢哋份師徒恩情…
亦睇得出佢哋嗰份從希望，變成失望嘅樣，我同阿輝都不禁沈默起嚟…
………
時間總係收復心情嘅最好良藥，阿明佢睇睇手錶，發現已經成七八點…
佢立即同兩位「高人」講聲再見就扯咗我走…
「有機會再見啦！」
………
我哋好快就去咗正確嘅地鐵站…
「丫！高人！你哋做乜又喺度嘅？」
「高人唔使搭車咩？我哋去對面搭！」
講完，佢哋就走咗去搭對面架列車。
………
我哋好快就到咗「理嘉城」…
「丫！高人！點解你哋又喺度架！？」
「兩邊線都經同一個站家嘛！我哋見唔開心，咪嚟呢度打陣機散吓心囉！」
真係被佢哋「吹脹」！
當然佢哋有佢哋打機，我哋有我哋去搵小倩啦，阿明話要介紹佢女朋友俾我識喎。
點知，佢…突然衝咗入…
「喂！你黐線架！女更衣室嚟架！」
佢好似聽唔到咁，我跟到佢去門口，道門冇閂到，我咪偷偷地望入去囉，又點知…
我見到佢同一個小朋友傾計，個樣好似好凝重咁…
我都忍唔住行埋入去…
「阿輝，你嚟得啱喇！貴寶寶！阿輝！寶寶，你叫佢輝哥哥啦！」
阿明佢介紹咗「貴寶寶」我識。
「寶寶，咁你帶我哋去「桂家村」啦！」
「發生咩事啫？」我問。
「你合埋眼先啦！寶寶會帶我哋去「桂家村」。」
我跟住佢咁講，就合埋咗眼，突然好似耳邊呼呼聲響…
我忍唔住咪開眼囉，點知…
呢度邊度嚟架？虛擬空間？黑暗中有咁多扭曲影像嘅？
之後，我去到一個似係森林嘅地方。咦！？呢度又邊度嚟架？咁大霧嘅？
阿明佢去咗邊呢？
「傻佬明！傻佬明！」我向四周圍大嗌。
「阿輝！你去咗邊呀？」阿明喺我見唔到嘅遠處大叫，仲有D回音添。
「我喺個迷霧森林度呀！」我再大嗌。
「你唔好郁，我哋嚟搵你丫！」
「好！」
………
「嘶嘶唦唦，嘶嘶唦唦~」
附近似係有D嘢喺草叢行緊過嚟，但係…D聲音…
點解咁怪嘅！？唔似係人聲！我即刻就匿埋喺一棵大樹後面…
唵住口鼻，睇吓究竟係咩人。
我見到…為數四五個嘅…
黑衣骷髏頭，雙腳就如樹根，手上都揸住把割草鐮刀…
「頭先明明有人聲架喎，我仲聞到有人嘅氣味架！點解唔見人嘅？吾~吾~」
「捉到佢就好喇！可以有排食喇！」
「唔得！唔得！要俾大王食先呀！」
好在…我已經唔係咩道術都唔識嘅阿輝，我造好咗…
「隱身咒」！
「你睇我唔到！你睇我唔到！」
我見佢哋真係好似睇唔到我咁，我當然得意忘形啦！
佢哋五隻小鬼，雖然怪形怪相，但係妖氣一D都唔強，就連鬼頭都不如…
加上我唔知邊度嚟D好勝心，我好想試吓…
用「光管陳」教我嘅「九字護身法」去打爆佢哋呀！
我企個好位就…
「臨，兵，鬥，者，皆，陣，列，在，前！」
「九字護身網」已成…
「收！」
「中！」
「仆！」
我講我仆！中得三隻，嗰三隻係被包住，郁唔到，但係另外兩者…
迅即變成戰鬥狀態，目露兇光，妖氣立刻爆發…
衝埋我度，我驚起嚟，立即造出「護身咒」！
「嘭」一聲，兩鬼著火彈開…
呢吓咁正，我當然驕傲自滿，再得意忘形啦！
「哈哈哈哈，夠薑就再嚟丫！」
只見兩鬼不但唔驚，仲露出奸笑，似係食硬我咁…
佢哋…竟然…仲諗住出茅招…
揸住把鐮刀，笑淫淫咁…
係噃！佢個身唔掂得我啫，武器得噃！
仲望住我下身添！？你哋想點呀？
(待續)
下集預告：
「家明，如果我係鬼，你會唔會同我喺埋一齊呀？」