米米蓮妖怪作品 -《旅行‧如此‧難以忘‧記 》(百集長篇): 第054集 ~ 欣︰飛機度黐線架，連家姐都唔見埋，點算呀？
第054集 ~ 欣︰飛機度黐線架，連家姐都唔見埋，點算呀？
真係好期望…可以喺我落機嗰一刻…見到輝輝佢…含情脈脈咁樣等待住我呀！
我哋同「風婦」老前輩告別之後，就去咗「先生」屋企攞咗個驅妖器，驅妖器係一支好細小嘅笛，連住一條頸鍊，呢條頸鍊就由家姐戴住咗。
我哋幾個當然中途都有繼續傾吓計啦，原來「嬸嬸」同「先生」嘅家族好有淵源架喎，「嬸嬸」家族表面係賣麵為生…
其實係專門製造法術道具嘅，而「先生」就成日借D倚去「嬸嬸」屋企買法術道具，順便會食返個麵。嘻嘻，「先生」仲講笑咁講︰—
「你估我真係想食佢D麵呀？我係想見多佢幾面咋。佢D麵呀？哈哈哈哈~」
「衰人！我D麵好難食咩？」其實「嬸嬸」個樣不知幾冧。
我見到佢哋咁，個心都覺得好甜，我同輝輝老咗之後都可以好似佢哋咁就好喇。
「先生」話佢同「嬸嬸」會喺再之後一日過嚟搵我哋。
攞咗個驅妖器之後，我就同家姐返屋企收拾行裝，準備聽日下午出發…
我執執吓嘢，睇返個電話先知，原來呢兩日我都冇聯絡過輝輝，而佢就打咗好多次電話俾我。
不過都好丫，佢打過俾我，即係佢安全啦，要快D過到去搵佢先得。
唔知係咪真係攰咗成日呢，我一訓上床就訓著咗嚧。
雖然尋日經歷咗好多唔同嘅嘢，但係…輝輝佢好衰架，就連夢境都要霸佔埋人哋，佢仲…錫人哋添呀，攪到人哋面都紅晒！
我發完同輝輝嘅甜夢之後，一覺訓醒，時間都已經差唔多正午喇，我都未試過咁爛訓，嘻嘻，點都好啦，出發喇！
「爹哋，媽咪，我哋出發喇！」
「小心D呀！」
「得喇！過到去打電話俾你哋丫！」
爹哋媽咪有事要做，冇送我哋機，我同家姐就係咁講聲再見就出發去機場。
好快咁就辦理好晒D登機程序，可以上機喇，不過好奇怪，呢班咩機嚟架？好似未聽過佢個名咁嘅。
上到機，坐定定就等起飛，家姐讓咗個窗口位我坐，佢就坐我隔離。
飛起之後，唔知係咪叫氣流定係氣壓問題呢，耳仔覺得一陣陣嘅唔舒服，所以我咪帶返個耳筒聽吓歌囉…
我托住下巴，俟埋窗邊望出去，睇住飛機慢慢離香港而去，旁邊就越嚟越多雪白嘅雲層…
我望向遠處，感覺好寧靜，好舒服，而耳筒裡面就播住…《誰令你心痴》︰—
何事無聊地嘆氣 可會說我知 ~
手中的康乃馨 仍能贈妳一枝 ~
何事呆呆地看我 我看不透妳的真心意 ~
如喜歡他 何不想想法子 ~
點解好似係輝輝佢唱俾我聽咁嘅？攪到我都跟住唱埋添。
Darling I want you 你竟不知 ~
熱烈似火情意 會狠狠將我燒死 ~
像個小影迷 要你的簽字 ~
默默向風呆企 去等心中戲子 ~
曾無限次 欲話我知 卻也停止 ~
聽到呢句，我D眼淚已經再忍唔住喇，好唔爭氣咁流咗出嚟，其實我好驚…我好驚以後見唔到輝輝呀！
I'm just a woman fall in love ~
「細妹，你做乜喊呀？」
「冇呀，有沙入眼喳嘛。」我強忍眼淚回應家姐。
「飛機上面有沙？哦！咁你陪家姐去洗手間洗個面先丫，好嗎？」
「哦！」
之後我就同家姐去咗洗手間。
「「沒有人」？」家姐睇到個門口牌咁寫覺得好奇怪。
「得一格咋，細妹，你去先丫。」
「哦！」
我入到去洗個面，點知…
「啪」一聲，成塊鏡跌咗落嚟，我立刻想用雙手托住佢，但係…
我一見到鏡後面D嘢，即刻就驚起嚟鬆開咗手，成塊鏡就咁跌咗落地下…
「叭冷！」
跌爛晒，幸好，我著住嘅係牛仔褲，鏡嘅碎片冇整傷到我，但係，點解…呢度會有條貓嘅屍體喺度架？
我一諗起貓，就即刻諗到家姐，「叭冷」聲咁響，家姐竟然冇拍門問我發生咩事，我更加緊張佢喺出面發生咗事，所以即刻就衝返出去。
衝到出去，家姐真係唔見咗，佢去咗邊呀？
「家姐！家姐！唔好嚇我呀！」
我四圍咁搵佢，感覺好奇怪，點解好似冇人理我咁嘅？
家姐又唔知去咗邊，佢又唔喺自己位，空中服務員又唔見一個，就連乘客…
佢哋冇理由聽唔到塊鏡爛咗嘅聲音架喎，點解好似…
我真係唔知點樣形容先啱，我就係咁，一路搵一路搵，一直向機後廂走去…
我見到有個位置有道簾遮住，門框邊有一堆符咒，感覺詭異恐怖，但係我都想入去睇睇家姐喺唔喺裡面…
我慢慢行咗入去，呢度好黑，但係客廂中間似乎係有一對人對坐喺度，佢哋中間有D發光嘅物體…
我見背住我坐嘅人嘅身型有D似家姐，所以我就慢慢行埋去叫佢：—
「家姐！家姐！你係咪家姐呀？」
佢冇回應我，而我就越行越埋，越行越埋…
「家姐！你係咪家姐呀？」
我已經行到佢背後，我輕輕力拍佢背脊，佢…佢突然另轉頭過嚟…
「丫！」
一個骷髏頭另咗過嚟，將我嚇得要死，但係…
佢似乎只係一條骸骨，佢對座嘅一個人伸手向前，將骸骨撥到地下，再抬頭望我，佢…
佢似係一個女巫師或者占卜師之類嘅人，佢對住我笑，仲請我坐低。
「坐低啦，妹妹。」
我想轉身就走，但係唔知點解我變得痴痴呆呆咁，迷迷糊糊間，我坐低咗…
雙手仲自動放喺檯上面，整個人完全不由自主，我見到檯上面嘅係一個發光嘅水晶球…
「媽呢媽呢空，幫呢個女仔睇吓佢哋未來！」
我喺個水晶球度見到…我見到自己被鐵鍊鎖住，身邊都係D血紅色嘅魔鬼，佢哋手上都有一支長叉，一吓一吓咁…
我好痛！好辛苦呀！救命呀！家姐！我完全郁唔到，只可以感受痛楚同埋淨係可以喊，嗰種感覺…真係比死更難受。
「嗚！哇！」
我突然從痛苦中擺脫，眼前嘅呢個女巫，頓時樣子變得怪異，仲不停咁轉變面孔…
我嚇得就連呼吸都變得不規則，佢身體慢慢拉長，向我後方衝去，唔係，正確嚟講，應該係被吸去。
「細妹！」
我冷靜落嚟，另轉頭一望，原來係家姐用「捉鬼塔」捉咗呢隻女巫妖怪救咗我。
當我想起身擁抱家姐之際…身邊突然…一堆綠光出現，現場即席變得光亮，但…
但都係一個又一個綠色螢光嘅人形物體慢慢行緊出嚟，凶狠嘅眼神，配合憤怒嘅咆哮，佢哋根本就冇可能係帶有善意嘅…
而家嘅我，身處喺一堆圍數最少有二三十隻嘅鬼怪當中，嗰種恐怖同絕望感已經充斥咗我整個身體…
「Weeeeeeeeeeeeeee~！」
呢聲笛聲，再次令我從恐懼中解脫，原來係家姐用咗驅妖器呀！
「綠光鬼怪」聽到呢個笛聲，霎時停止行動，仲變得非常煩躁不安。
另一邊，我見到家姐雙眼發光，眼神比起「綠光鬼怪」更加凶狠，四周圍清楚聽到「喵，喵，喵~！」一連三吓貓叫嘅回音聲…
「綠光鬼怪」已經被嚇得退避三舍，似乎唔敢再對我做任何動作。
「邊個夠膽蝦我細妹！」
(待續)
下集預告︰
一個僧人衝來，圓面光頭，滿面鬍鬚，身型肥大，如熊似象…