米米蓮妖怪作品 -《旅行‧如此‧難以忘‧記 》(百集長篇): 第053集 ~ 明︰阿公黐線鹹濕，連衫褲都剝埋！
第053集 ~ 明︰阿公黐線鹹濕，連衫褲都剝埋！
「光管陳」踏地請「鍾馗」，睇嚟佢同呢隻「骷髏武士」又一翻龍爭虎鬥喇！
不過作為人哋個孫，我梗係要睇咗自己阿公先啦，「鍾馗」就由阿輝佢講啦。
眼見「夜叉」佢已經唔係石像，而家飄起空中，喺正我哋前面，整個身體變得活生生咁，一頭長毛白髮，成隻怪物咁…
笑容又鬼死咁乞人憎，仲要居高臨下咁款，如果我夠料，又如果我到手，我肯定打到佢變粉餅。
阿公見到呢隻嘢，變得非常認真，我就咁睇埋去，真係高下立見，阿公當然係「下」啦，我都唔知佢點同人打？
「嘭，嘭，嘭~！」
「鍾馗」嗰邊似乎已經開拖，仲打到鬼死咁嘈，為咗保護大家我都造好咗「六字護身咒」。
「頂你咩，仲係六字，「大袋」都識做九字喇！」
「你識條腸咩！九脈齊發唔好聽丫嘛！打你嘅鬼啦！」
「我真係交叉你個噢丫！我哋就打鬼，你就睇表演！？」
佢哋真係一D都唔識體諒人，其實我不知幾緊張大家，但係我更緊張我阿公丫嘛！
自己之前已經對佢唔住，而家明知佢唔夠隻「夜叉」打，但係自己又幫唔到手，嗰種心情，又有邊個可以明白丫？
「夜叉」突然做出相撲手對陣嘅手勢，之後佢D白髮就直衝埋阿公度，我眼見阿公反應都嚟唔切就俾佢D白髮纏住咗，而家郁都郁唔到…
幸好，「光管陳」雖然疲於奔命，但仍能及時相救，使出一招「回旋式！」，銀劍旋轉飛來割斷白髮，幫阿公解困…
但係就因為咁，「鍾馗」形勢由順變逆，「骷髏武士」借「鍾馗」空檔，連環幾刀將「鍾馗」打得連連避退，形勢十分驚險。
「汪~！汪~！」
兩聲吠聲震壓全場鬼怪，就連「夜叉」一時間都俾佢壓制住。
一隻龐大嘅白獅而家威風凜凜咁，佢似乎係嚟保護我哋嘅，但係…點解獅子會有狗吠聲嘅呢請問？
全場冇人答我，我亦唔好意思再問，只見被白獅打飛嘅石像鬼都一一打到「夜叉」身上，似乎無意中協助咗阿公。
阿公終於定過神嚟，襯住「夜叉」被震壓住嘅呢一吓，佢立刻就使出一招「大波翻雲破」…
阿公似乎帶住必死嘅決心去使出一連串必殺技，佢乘住「翻雲大波」衝向 「夜叉」…
嚟一招「翻雲旋風腿」，再一招「覆雨連環拳」打向「夜叉」，「夜叉」連中數百拳，我承認個「百」字係有D誇張…
但係，「夜叉」竟然…絲毫無損！？
雖然係咁，但係每當「夜叉」身中一拳，佢都會呻吟一聲，阿公亦似乎看到其中端倪，睇到佢嘅破綻…
同時，阿公亦展露出我前所未見嘅淫笑，冇錯，就係好淫咁笑。
「原來你係「母夜叉」！」
呢聲一出，就如曙光初現，睇嚟阿公好有信心打敗到佢！但係，唔好意思，我又有問題…
「母夜叉」雖然係女啫，但係佢咁醜樣，點解阿公可以淫笑得出呢？
係咪人老咗就唔理好醜，但求就手呢？我唔想我老咗變成咁呀！
阿公之後順理成章，連環幾個「大波龍爪手」爪向「母夜叉」胸前，只見「母夜叉」尷尬非常…
就連使勁嘅力都發唔到出嚟，只能一直後退回避，屈服於阿公嘅淫威之下。
後面「單」一聲，唔知斷咗D乜，但係就…
「插~！」
似係有D嘢從「鍾馗」嗰邊打橫飛嚟插入「母夜叉」後欄，佢痛起嚟，向前一震，同時中埋阿公嘅「大波龍爪手」…
「丫丫~」兩聲，銷魂入骨，聽到我都…
衰嘢都係唔講，後面再嚟地震咁款，我眼角見到一把金劍從地下浮出嚟…
阿輝亦傻Q咗，無端端大嗌「大地鼓動！出嚟啦，大地神劍！」，咪住先？佢幾時識得召喚神劍架？
呢邊阿公依然死心不息，對人步步進逼，睇到我都想出手幫「母夜叉」解圍！
嗰邊「鍾馗」大嗌「擎天式」，之後把金劍由下至上噴出嚟，直插入「骷髏武士」下陰…
我睇到咁，都忍唔住噤住自己下面，呢吓真係我都覺得痛！
點解D老人家總係咁重口味架？
「骷髏武士」變成白灰，飛散於空中，睇嚟「鍾馗」已經贏咗「骷髏武士」…
但係，隨之而來嘅係一陣無名嘅恐懼感，空間霎時停頓，全場人都莫名奇妙咁動彈不得…
只有阿公，一條淫到上腦嘅老人家，依然對「母夜叉」窮追不捨，呢D係咪就係所謂嘅向青春奔跑吧呢？
我而家都好想小倩喺我身邊…陪吓我啫，唔好諗衰嘢！
突然…「時~」一聲，呢聲之後，就係「哇呀」兩聲…
呢個慘叫，聲音震天，深深打入我耳裡面，再震到有心有肺，可以聽得出嗰種痛，非同小可…
遠處似係「光管陳」嘅聲講咗一句︰—
「日本鬼王，酒吞童子」。
「鬼王」二字一出，無限嘅絕望感隨之而來，唔通大家嘅人生就係咁玩完？突然…
「呀~丫~吔媽嗲~呀！丫~！」呢幾嗲聲一出，全場恐懼感全消，隨之而來嘅係一身騷軟…
我轉頭一望，見到一個麻甩仔，唔通佢就係「酒吞童子」？
奇怪嘅係…佢同我哋一樣，全身顯得無力，之後佢就猶如熄咗部舊式電視一樣，「蕉~」一聲，就得返一點光，再之後就唔見咗人…
「青頭仔」三個字不禁喺我腦中彈出嚟，「童子」二字亦的確非常貼切，不過唔理呢D喇，大家平安就好喇。
我望返去阿公嗰邊，「母夜叉」原來已經俾佢雙手熊抱住，阿公佢仲剝晒衫褲添，攪乜呀？咁三級！仲要打出個咕咕，打返格仔先。
之後佢大叫「辣手摧花」！阿公！可唔可以改返D正正常常嘅招式名呀！？
「母夜叉」喺阿公心口度爆開咗，天上污雲隨即散去，四處亦變回原狀…
參拜嘅人都變返正常，就好似從來冇發生過之前嘅事一樣，就連我哋其他同學都只係覺得發咗場夢咁。
「祥仔(即係「大袋」)，過嚟俾我睇吓你條頸。」
「奇怪喇？點解冇傷口嘅？」
「不過暫時都係算啦，大家冇事就好。」
「你哋四個放心啦，佢哋唔似你哋咁有跟我學過吓法，你哋睇到一秒廿四格嘅片，對佢哋嚟講只係睇到一格，所以感覺唔真實到連夢都不如，佢哋唔會覺得係乜嘅。」
「光管陳」對住我哋四個一連講咗幾句說話，我諗深一層，又覺得佢講得啱噃，D同學同行屍嘅行動，又真係好似跳片咁，但係…
「黃仔」佢…佢諗聖經嗰時，段經文無斷過架喎，我另過去望一望佢側面，唔知點解…突然覺得好心寒…
不過算啦，佢應該只係條傻佬嚟架啫，應該係我諗多咗。
阿輝突然諗起話阿欣班機就到，佢話想去接機，但係我哋係一團人，老師點會俾佢咁做丫…
所以，佢同「光管陳」講咗，「光管陳」話幫佢接阿欣喎，不過前提係要大家快D離開呢度。
「阿公，你做乜剝晒衫褲呀？好肉酸呀！」
「唔係丫！阿明阿公好健碩，身型好FIT呀！」
「仲超醒添，好在有阿公你咋！」
「係呀，頭先嚇死我呀。「光管陳」快D幫我接到阿欣就好喇。」
「你估我想架咩？你哋睇唔到咋！條八婆狼過我呀！兩三吓爪就整爛晒我D衫褲喇！」
「你估我信唔信你丫嗱？」
班死仔喺度噤住嘴笑。
我哋就係咁，你一言我一語咁就離開咗呢度，先返酒店，再安排食晚飯。希望「光管陳」可以快D接到阿欣佢啦。
(待續)
下集預告︰
媽呢媽呢空，幫呢個女仔睇吓佢哋未來！