米米蓮妖怪作品 -《旅行‧如此‧難以忘‧記 》(百集長篇): 第055集 ~ 輝︰我跟住阿明，上錯咗架地鐵，仲見到一個「肥僧」。
第055集 ~ 輝︰我跟住阿明，上錯咗架地鐵，仲見到一個「肥僧」。
作為人哋男朋友，係應該有交帶嘅，所以我一有時間，就會打俾欣欣，但係由始至終，電話都未通過一次，只能說…其實我很擔心…
(唔好咁多廢話啦，你係咪嚟接我細妹架？)
死喇，諗住可以懶深情咁講呢番說話，去掩飾我去唔到接欣欣都唔得添，點算好呢？好！轉話題。
作為人哋嘅朋友，係應該有交談嘅，所以我一有時間，就會問候阿明，但係由始至終，阿明都冇答過我一次，只能說…其實我很傷心…
不過我睇得出…其實佢真係好緊張，佢D廢話﹑「懶攪笑」同「每事問」，都只不過係個掩飾…
實際上，佢心裡面同我一樣，緊張到個人已經亂晒，我哋都知道呢一次嘅旅行，已經脫離咗玩樂二字…
我哋仲好有可能返唔到香港，再見唔到自己屋企人，所以…我哋只能夠喺我哋嘅文章裡面苦中作樂…
(夠喇！唔好玩懶深情啦！我雞皮都起棟起晒喇！講故啦！)
對唔住！對唔住！講返個故先。
上回講到，「光管陳」話個甩麻仔係「日本鬼王」，佢個樣就真係唔似，仲好似個廢物添，但係我諗人生就係咁，咁唔公平…
丫，或者調返轉頭講，話非常公平都得，相對架啫，我係講緊…力量如果越大，個樣就會越衰…
雖然麻甩仔非常樣衰，但係個氣勢就真係磅礡，仲殺氣騰騰，妖氣沖天咁。
求其放條蛇都詭異恐怖過人，「大袋」仲要俾佢條蛇咬中，唔通佢唔抵得「大袋」仲樣衰過佢？
不過應該冇可能，佢應該係我見過世間最樣衰嘅男人，「大袋」最多排第二。
哈哈，點解我可以咁輕鬆講佢？無他嘅，當一個人從危難中僥倖生存過嚟，就會好似我咁，呢D就叫「屎忽鬼」。
無錯，我哋已經安全喇！就係公公佢救咗我哋，正確D講，係隻「母夜叉」救咗我哋…
「吔媽嗲」三個字，憑住嬌嗲女聲一出，喺塵世間，試問有邊個男人能夠抵擋得住？
我亦因此深深明白到「黑布蒙頭」嘅真諦，聲音同身材已經足夠令男人俯首稱臣。
哈哈，「酒吞童子」始終走唔甩「童子」嘅命運，哈哈哈哈…
大家冇事走得甩，自己都開心到黐咗線添，等我冷靜返落嚟先，冷靜冷靜冷靜冷靜冷靜冷靜…
頭先講到「童子」受唔到「母夜叉」呻吟叫聲，所以「蕉」一聲就唔見咗。
另一邊，公公佢真係盡顯男性嘅魅力，仲上演埋我頭先所講嘅大戰「黑布蒙頭」，佢連「母夜叉」都攪掂埋…
但係，唔知邊度嚟咗D格仔？阻咗呢個精彩嘅鏡頭。
最後，公公仲用咗一招「辣手摧花」了結咗「母夜叉」，呢度之後亦變返晒正常一樣。
回復原狀之後，「光管陳」第一時間係擔心「大袋」被咬傷嘅位置，但係好奇怪，「大袋」竟然連一D傷口都冇，就連「光管陳」都百思不得其解。
我突然諗起欣欣班機就到，所以就問：—
「阿Sir，我可唔可以行開吓，去接一接我女朋友呀？」
「唔好喇，你又唔識日文，接你女友就包起我身上啦。」
如果我唔係呢幾日認識佢深咗，我肯定唔俾佢去接我女友，佢個樣成個拐子佬咁。
(咩拐子佬呀？佢似強姦犯呀！)
唔好再講喇！再講，我真係追前去唔俾佢去接我女友架喇！
之後，「光管陳」獨自出發接欣欣，我哋就一齊返咗酒店先，再安排食夜晚餐飯。
希望「光管陳」佢真係可以接到欣欣啦，但係…死喇！我乜資料都冇俾佢，欣欣又唔識佢，佢點搵欣欣呀？
唉，唯有希望佢自己有方法搵到欣欣啦。
我哋好快就返到去酒店，大家亦各自返去自己房或者做自己嘢，但係…我見到阿明佢鬼鬼鼠鼠咁，似乎係想偷走出去…
阿狗就去咗同阿妮拍拖，「大袋」就去咗同廁所「拍拖」，佢哋都跟唔到嚟，我擔心阿明起嚟，驚佢好似「細鬼」佢哋咁俾鬼迷住，咪跟住佢睇住佢囉。
唔經唔覺，原來太陽都已經落咗山，天色變得好暗，我見到阿明佢好快咁喺一個地鐵站口落咗去，但係…奇怪喇…呢個站口點解好似第一次見咁嘅！？
我冇理咁多，一於就跟埋阿明去，落到去大堂，呢度人影都冇隻。
死喇！我唔記得帶錢添，不過我見到阿明佢都好似冇俾錢就入咗閘，所以我都跳咗入閘。
「唔好意思呀！」
身為香港受高等教育嘅學生，係應該要喺做錯事嘅時候，講返句「唔好意思」嘅，不過點都好，總之我就已經跟咗入去啦。
落到月台，呢度依然人影都冇隻，我見到阿明好快咁就衝咗入列車，我咪即刻跟埋入去囉，一入到去，列車門就即刻閂埋咗…
「咦！阿輝，你做咩跟埋嚟呀？」
「我擔心你俾鬼迷呀！」
「哈哈！點會呀！我俾女迷就真！」
「女！？」
阿明之後將佢認識小倩嘅經過都講晒俾我聽。
雖然我估計小倩好有可能唔係人，但係我暫時冇同阿明講，因為始終男女愛情呢家嘢係好盲目家嘛。
「咦！奇怪喇！點解仲唔開車嘅？」
我哋之後不斷大叫「有冇人呀！？有冇人呀！？」
講廣東話，冇人理都好正常，但係竟然連一把話我哋黐線嘅人聲都冇，呢個就真係奇怪，之後，我哋連緊急安全制都噤埋，但係…都冇用，而家我哋確定被困咗喺車廂裡面…
突然…地下一輪震動，「龐龐~！」
之後…再一輪震動，「龐龐~！」，就似係有D龐然大物踏地一樣…
「唔會係恐龍呀？」
「哇丫，哇丫，哇丫~」
怪聲喺車尾傳嚟，地面就一直一吓一吓咁震動，震動越嚟越犀利，似乎係有D嘢向我哋走緊過嚟，仲越走越近…
聲音亦都越嚟越明顯，我同阿明你眼望我眼咁，大家都唔知點算，但係就好自然咁就造咗「九字護身法」，聲音越嚟越近，隆隆巨響慢慢向我哋撲來…
但見一個僧人衝來，圓面光頭，滿面鬍鬚，身型肥大，如熊似象，步履沈重，一身白色麻衣，揹住一個布袋，頸上一條木珠頸鍊，每粒木珠都比我拳頭還要大…
佢威風凜凜，卻又殺氣騰騰，究竟佢是敵是友呢？
(做乜嘢突然文謅謅咁呀？)
個人驚起嚟，當然亂晒龍啦，將就吓啦，而家個肥僧已經行到嚟我哋面前…碌大對眼望住我哋…
「(嘰呢咕嚕，嘰呢咕嚕)！」一把粗豪嘅聲音。
再「(嘰呢咕嚕，嘰呢咕嚕)！」
佢應該係講緊日文，但係我哋都聽唔明，佢…佢…佢究竟想點呀？
我望一望佢後面，我見到一大堆…有D飛起嘅靈魂，有D躝緊嘅爬蟲，有D身上有數百隻眼，有D得返半邊面…係…係…係一大堆鬼怪衝緊過嚟呀！
(待續)
下集預告︰
「紫，電，靈，丸！」