米米蓮妖怪作品 -《旅行‧如此‧難以忘‧記 》(百集長篇): 第052集 ~ 輝︰大戰黐線激烈，連鬼王都出現埋！
第052集 ~ 輝︰大戰黐線激烈，連鬼王都出現埋！
放心啦欣欣，我自己攪得掂架喇！
上次唔好意思個死人大Lin雄整到個「武士」污糟晒，我都係想幫佢抹返乾淨啫…
點知越幫越忙，冇水冇紙巾，攪到佢而家成塊面都係「茄」。
個人覺得佢嬲到想斬人都好正常，你睇佢而家，塊面咁樣，成對眼仲紅到爆晒根發晒光咁，睇嚟我哋又領嘢喇！
班死仔扯咗我出門口之後，呢度唔知點解變得暗淡無光，連天色都變得好詭異，完全唔似人間…
我離遠見到阿明佢哋，咪即刻問發生乜事囉︰—
「睇嚟我哋入咗混沌世界，似係隻「夜叉」造出嚟嘅，不過點解就唔知喇！你哋都入咗個「保護網」度先啦！」
阿狗講完，我哋就入晒個「保護網」度，但係奇怪喇，我哋嗰邊就話攪咗鑊粥出嚟啫，佢哋嗰邊又攪乜嚟呀？
「其實發生咩事呀？」
「黃仔」原來一直跟住我哋，點解我唔知嘅？
我都唔得閒諗太多喇，原本嚟參拜嘅人都變晒做行屍，而家行緊埋嚟我哋度，仲好似想拆我哋個網添…
我即刻就幫手造「九字護身法」，諗住頂得幾耐就幾耐啦，如果依家「光管陳」喺度就好喇。
一講曹操，曹操就到，天上「呯嘭！」一聲，「光管陳」就隨住一條白光飛落嚟呢度，睇嚟我哋有救喇！
「大家揸實校章，用校章當武器對付佢哋就得！」
班死仔又要驚，又要玩，你一吓，我一吓，縮一吓，前一吓咁打落D行屍度，總算保護到自己。
打打吓，我見到路邊D石像突然郁起嚟，佢哋仲揸住D長矛，兜頭就飛埋嚟我哋度…
好在，「光管陳」同公公都喺度，我哋先化險為夷咋。
氣都未得閒抖啖啫，夜叉廟嗰邊又一聲巨響，成隻「夜叉」喺屋頂飛咗出嚟…
成班同學第一次見到鬼怪，當然嚇到呆咗，於是乎大家都縮埋一齊。
我哋嗰邊嗰隻「骷髏武士」都唔經唔覺行咗出嚟。而家我哋俾D鬼怪重重圍困住。
「呢隻嘢由我嚟！」公公去咗同「夜叉」打。
「佢就由我攪掂啦！」「光管陳」就好似神打一樣…
「蹼蹼蹼蹼蹼蹼蹼蹼~」
「哈」一聲，全場震晒，佢變成另一個人…
「鍾馗呀！」
公公嗰邊就由阿明講啦，我嘅角度講「鍾馗」呢邊啱D。
「骷髏武士」見到佢咁，迅即將一刀變成兩刀，雙手揸實利刃對住「鍾馗」一笑，就似係高手相遇一樣。
「骷髏武士」之後凌空飛起嚟，使出一招「骷髏十字斬」，佢當然唔識中文又冇講嘢啦，係我老作俾佢嘅…
「鍾馗」一劍橫擋，大叫「格擋式！」再回敬一劍「直刺式！」
呢個唔係我老作，「伏魔劍十九式」係「光管陳」之後講返俾我聽嘅…
理返我身邊一陣先，呢邊都嚟料喇，一隻石像鬼拆爛咗阿狗個「保護網」，正想攻擊我哋…
點知…「大袋」一拳就打開咗佢，「大袋」原來喺不知不覺間已經學好「九字護身法」…
但係，不得不提條友個腦真係用嚟養蠶架，佢將個護身法織到成身都係，成個木乃伊咁…
樣就已經衰，佢仲要以為自己超人咁，同D鬼對打…
打都唔緊要，人哋雖然係鬼啫，但係人哋個身係石頭嚟家嘛，自己打落去都痛啦，正一白痴仔。
阿狗就唔同啦，佢一邊織網先保護好大家，一邊叫大家做最簡單嘅「護身咒」，再叫大家準備做「隱身咒」…
佢再用少少時間織咗條長緶出嚟打D石像鬼，話時話，點解佢好似咁多時間做咁多嘢咁嘅？
唉，唔理佢哋喇，造返D嘢保護吓自己先，但係…
似乎做唔切喇！後面有一隻石像鬼飛埋嚟想打落我度，我就咁擘大眼睇住佢打落嚟…
「汪！汪！」
呢兩聲好響亮，比狼狗吠得仲要響，震攝晒全場鬼怪，而家…喺我面前嘅…係…
「居居！？」
呢兩聲之後，「居居」身型變得好龐大，一條長長尾巴，四爪渾然有力…
仲有一個如龍似虎嘅大頭，而家佢成隻白色獅子咁。
我都未睇得切佢全相，佢就一爪，兩爪，三爪…
噤低，打飛，爪爆，一隻又一隻嘅石像鬼俾佢攪掂晒，仲另返轉頭嚟同我講︰—
「汪汪~！」
唔知點解，我完全明白佢想講咩，佢話係達叔叫佢嚟保護我架喎。
行屍同D石像鬼瞬間俾佢攪掂晒。
之後，佢坐定定喺我嘅身邊保護我哋。有佢喺度，我哋可以放心落嚟專心食住花生睇「光管陳」表演喇…
但係…「鍾馗」佢點解好似好弱勢咁嘅…
「骷髏武士」一招「骷髏旋風斬」，「鍾馗」一招「格擋式」…
又一招「骷髏十字斬」，「鍾馗」又一招「格擋式」…
雖然總算抵擋得住，但係「骷髏武士」步步進逼，「鍾馗」節節後退…
最後，仲跌咗喺地下。
「骷髏武士」見到「鍾馗」跌喺地下，似乎想一招就了結佢，佢即刻將雙刀合璧，嚟招「骷髏巨浪斬」…
嘩！呢招有3D特效架！
呢個年代冇理由有呢個特效噃，不過就真係咁立體，成個綠色發光嘅刀波飛向「鍾馗」…
而「鍾馗」佢…真係令大家太失望喇！佢竟然仲係得一招「格擋式」…
「單」一聲，成把劍斷咗，飛咗去九里之外，擋係擋到，但係劍斷咗，手臂亦似乎受咗傷…
「骷髏武士」見到「鍾馗」咁嘅款，隨即嚟招「萬蟻食日」…
一大堆蟲蟻喺佢個身度走出嚟，高速咁走向「鍾馗」，似乎係想吞咗佢…
我哋見到咁，都好想幫手，但係都自知實力差太遠，根本做唔到乜嘢。
呢個時候，奇怪喇！「鍾馗」異常冷靜，佢做咗個手印，地下就突然出現一條裂縫…
白光由下至上射出，一把金劍由地下浮出嚟，令全部蟲蟻迅間被白光燒死。
我亦忍唔住大叫咗一句經典台詞︰—
「大地鼓動！出嚟啦，大地神劍！」
「鍾馗」伸手向前，執起金劍，白光消去，金光初現…
突然一個強烈感覺，你俾我揸呢把劍丫，我都斬得死隻「骷髏頭」啦！
「鍾馗」一個箭步衝向「骷髏頭」…
「直刺式！」
「橫削式！」
「斜斬式！」
「旋風式！」
「順劈式！」
「拖劍式！」
「推刃式！」
一連七劍，全部命中「骷髏頭」，最後仲一吓掟咗把劍上天…
大嗌「擎，天，式！」
當大家都跟住把劍嘅去勢望向天之際，金劍突然從地下裂縫向上噴出嚟，直插入「骷髏頭」下陰…
「骷髏頭」「哇丫」一聲，似乎氣數而盡…
全場人仕都俾「鍾馗」呢招呃咗，邊有人會估到掟上天嘅嘢，會喺地下度出返嚟架啫。
見到呢個情況，大家不但止冇嘩然，仲做埋同一個動作添，就係噤住自己下陰…
呢一吓，真係男人最痛，相信大家都同我一樣，下面依家涼浸浸…
只見「骷髏頭」雙眼變得暗淡無光，隨即變成白灰一堆，隨風四散…
呢邊似乎就係咁落咗幕。
我徐徐回頭望去公公嗰邊，但見「居居」突然咬牙切齒咁，佢望住咗我旁邊嘅「大袋」後方…
我好奇一望，突然感覺奇異恐怖，整個空間好似停頓咗咁，變得好緩慢…
我眼尾見到一個…甩麻仔？(即係講緊今時今日嘅MK仔)
佢頭髮披面，笑容詭異，面尖骨瘦，上身無衣，左手攞住一個藤籃，但係我就全身好似癱瘓咗一樣…
身體不由自主，只能夠強行用眼尾望到佢，恐怖感完全壓制住我，甚至係呢度全部人…
「時~~~」一條蛇突然喺藤籃度飛出嚟，咬住咗「大袋」條頸。
「哇！呀！」
淨係見到「大袋」佢痛到想死咁款，但係大家依然郁唔到，亦乜都唔做得…
喺遠處傳嚟「光管陳」一把謹慎認真嘅聲音︰-
「日本鬼王，酒，吞，童，子！」
(待續)
下集預告︰
奇怪喇？點解冇傷口嘅？