米米蓮妖怪作品 -《旅行‧如此‧難以忘‧記 》(百集長篇): 第051集 ~ 欣︰世外高人！？瘋婦神婆！？
第051集 ~ 欣︰世外高人！？瘋婦神婆！？
「點解而家好似武俠小說咁嘅？有冇人可以話俾我聽發生咩事呀？」我問。
「武俠鬼故Crossover，正！」神經女人跳住舞咁講。
「遲D飛機大炮超人都出埋添呀！」「先生」講。
「你都陪埋個癲婆發癲呀？阿妹，你都係講返個故仔先啦。」家姐講。
好，上回講到個神經女人喺房度拍住手掌咁行出嚟，佢仲笑笑口咁…
「貓女，哈哈哈，貓女！」
個神經女人點解咁好笑？唔通家姐係俾佢變成咁嘅？我滿腦都係疑問，亦唔知問邊個好。
家姐另個頭嚟見到呢個神經女人，仲好似好嬲咁，雙手嘅爪變得更尖銳更鋒利，黃色嘅貓眼睛露出兇光，一棚牙齒變得尖削而有力。
家姐佢「哇丫」一聲，迅速咁衝向神經女人度，速度比之嗰前隻瘋鬼醫生仲要快，唔通家姐想殺死埋呢個女人？
我唔想家姐再殺人呀，即使係鬼，我都唔想佢咁做，所以我好唔忍心見到咁嘅情況…
「唔好呀！」我合埋雙眼噤住對耳大嗌。
但係好奇怪，而家全場靜晒，冇晒聲音，所以我就開返眼睇吓發生咩事啦…
原來，家姐已經衝咗埋去，但係，個神經女人佢…竟然用佢隻左手一手揸住咗家姐個頭，家姐博命想爪佢都爪唔到…
「騰！」
呢一吓聲令家姐震咗一吓，之後停咗落嚟，郁都郁唔到，再之後佢成個人仲不停係咁震。
我見到咁，我一時間真係手足無措，淨係知道家姐應該有危險，我好想去救佢，但係我手無縛雞之力，我又可以點丫？
呢個時候，我見到地上面我之前跌低嘅一道靈符，我怱忙間執返起道符，再向神經女人衝埋去…
「吔丫！」
「搭~！」
我手臂俾人捉住咗，我望向捉我嘅人…
眼淚就即刻流咗出嚟，係「先生」呀！
「妹妹，放心！冇事嘅！」「先生」咁講。
「前輩，晚輩有事相求，所以出此下策！」「先生」向個神經女人講。
「前輩！？個女人係你前輩！？」我驚奇一問。
家姐跌咗落地，好似冇事，但係就好攰咁。
「我問完前輩嘢先答你呢D問題。」「先生」再向我講。
「前輩，晚輩有二事相求，其一，煩請先睇吓呢個籤文。」
「先生」將一張紙條俾咗個神經女人，再將所有我幫輝輝求籤嘅所問同佢之前嘅所講都一一向呢個女人和盤托出。
神經女人望兩望再諗一諗，之後又再癲笑起嚟…
「錯晒，錯晒，完全錯晒！」
…
「哈哈哈，錯晒就好喇！」「先生」竟然咁講，我真係摸不著頭腦。
「第二件事，我早就發現地下個女仔身上有一妖靈，不過唔係惡靈，想問隻妖係咩嚟？仲有，可唔可以大派用場呢？」「先生」再問。
「你睇唔出咩？我唔係講咗喇咩？貓妖！守護之靈！」個神經女人停咗癲笑，好認真咁講。
「晚輩愚昧，多謝前輩提點。」「先生」好恭敬咁講。
神經女人踎低睇睇家姐佢。
「妹妹，放心啦，我之前咪話你男朋友仔有危險嘅，既然前輩話我錯晒，即係佢應該冇危險啦。另外，我帶你哋嚟呢度最主要原因就係引出呢隻貓靈，應該可以喺嚟緊嘅旅程度保護你哋。」「先生」對我咁講。
「但係…呢位女仕究竟係咩人呀？」
「哈哈哈，係咁嘅，天下之大，除咗東南西北中五位高人，仲有二絕，稱之謂「風婦臣婆」，係全世界占卜星相最勁嘅兩個女人，不過後人都當咗佢哋一個係瘋婦，一個係神婆，神婆係黑人，我都唔知佢喺邊，不過瘋婦就係我哋眼前呢一個。」
「但係…得罪講句，瘋婦講嘅嘢真係可信咩？」
「我諗係我講得未夠清楚，佢本來唔係咁嘅樣，「風婦」係風華絕代個「風」，佢哋係一個氏族嚟，隱居深山，居住地叫「風木林」，所以先叫佢「風婦」，而我哋前面呢一個係風木林氏族世代中最勁嘅星術士，佢叫做蔡百儷，係世外高人嚟，長青不老係佢哋嘅特點，唔好睇佢成個少婦咁，其實成八十歲人架喇。」
「世外高人！？童顏老婦！？」
我好愕然，我再望一望個神經女人，發現佢披頭散髮，風中散髮咁，雖然係凌亂，但係睇落去又真係有D姿色…
佢望住家姐好認真嘅樣，又真係成個高人咁。
「妹妹，你哋家族咪有個驅妖器嘅，俾個呢個妹妹仔佗丫。」「風婦」對住「嬸嬸」咁講。
「係嘅，前輩，我返屋企攞個俾佢佗丫，不過耐冇用，而家當咗驅蚊器嚧。」
「嬸嬸」個樣好尷尬，梗係好耐冇俾人叫過「妹妹」頂喇。
我都慢慢行咗去睇吓家姐佢點。
「有乜嘢事，噤一吓個驅妖器，咁隻貓靈就會被激親，佢就會出嚟保護你哋架喇。」
「風婦」突然捉住我隻手講，嚇死我呀。
講完之後，佢「嘻嘻哈哈」又再癲笑，行咗入去黑影堆就唔見咗人嚧。
…
「OK，攪掂晒，可以返屋企喇。」
「但係…老前輩佢喺度生活到咩？」我問。
「邊個夠膽話我老呀呀呀呀呀呀？？？」黑影中傳出陣陣震耳欲聾嘅聲音。
「冇呀！佢話我咋！我哋走先喇靚女前輩！」「先生」講。
「嘻嘻嘻嘻哈哈哈哈！」黑影中又傳出咁嘅聲音。
之後，我哋就離開咗鬼屋。
「D女人真係…幾十歲人都係要人讚佢靚嘅！」
「咁得唔得丫？」一把女人聲從「先生」旁邊講，原來「風婦」出咗鬼屋。
「得！梗係得啦！靚女梗係要俾人讚靚女啦！哈哈哈！」「先生」當然非常尷尬。
「前輩你去邊呀？」「嬸嬸」問。
「去便利店買D嘢食囉，近排都鍾意咗食宵夜，望咩啫望，高人唔使食嘢咩？」
我哋送別老前輩之後，家姐都醒返，我將頭先發生嘅嘢都講返晒佢知…
我哋而家就先返「先生」屋企攞個驅妖器，之後再返自己屋企，準備聽日出發去救輝輝喇，好緊張呀！
(待續)
下集預告︰
大地鼓動！出嚟啦，大地神劍！