米米蓮妖怪作品 -《旅行‧如此‧難以忘‧記 》(百集長篇): 第048集 ~ 欣︰家姐？貓女？瘋婦？

第048集 ~ 欣︰家姐？貓女？瘋婦？

阿輝佢好似去咗睇女仔呀！
(細妹，唔好扁嘴啦，都話佢信唔過架啦！)
(女鬼嚟架！)
女鬼都唔得呀！哼，唔理你喇…講返我呢邊先，我呢邊都好緊張架！

而家呢度伸手不見五指咁，好黑好黑，陰風陣陣吹埋嚟，仲凍凍地添…

咪住先，D風邊度嚟架？我好似見唔到呢度有通風位噃。





感覺好寒好凍，如果阿輝佢喺我身邊就好喇。

黑暗之中夾雜咗好多怪聲，好似不斷叫我同家姐行入去咁。

「躂，躂，躂…」

一盞又一盞嘅燈著咗，而家成間大屋變成咗一間…瘋人院？

…





遠處有個醫生同個護士喺度傾緊計，好似當我哋唔存在咁，我同家姐就身處喺一條冷巷度…

冷巷兩邊都係D有個四方窗口嘅門，我同家姐都覺得好奇怪，同時亦都好驚有嘢會突然彈出嚟嚇我哋…

我哋好小心咁慢慢行前去，嚟得呢度，其實都預咗要見D鬼怪架喇。

唔知點解，我哋兩個都好直接咁覺得房裡面係有D嘢喺度嘅，亦好好奇咁想去睇吓…

所以，我哋兩個就一齊慢慢行埋去第一個房度，我哋一步一步咁行埋去…





行到去第一個門口，我喺個窗口位度妝入去，裡面似乎係咩都冇咁，我再望吓左望吓右…

「哇呀！」

突然有一個女人發咗癲咁衝咗埋玻璃前面向住我哋大叫，好在，係隔住玻璃咋。

佢一直喺我哋前面大呼小叫咁，個樣癲得好恐佈。

「死癲婆！夠膽就出嚟攪我，唔係就收口啦！」

家姐雖然係咁講，但係我睇得出其實佢都係想壯吓膽啫。

「嘻嘻，嘻嘻，嘻嘻嘻嘻…」





個女人烏低咗身，笑到癲癲喪喪咁，嗰種笑法，真係令人好心寒，好壓抑。

好在，我哋總算抽得到身，我哋都無再理佢。

我哋望返去遠處，見到嗰個醫生同個護士仲傾緊計，個感覺好唔尋常…

我哋一邊望住個醫生同個護士，一邊慢慢行過去另一邊門度睇吓…

被人嚇過一次，我哋會再小心D架喇，正想望返去呢邊玻璃窗口…

「叭冷」一聲，玻璃跌晒落地，另一個神經病人撞爛咗個玻璃窗口，對手同個頭都衝咗出嚟…

「嗚呀，嗚呀…」

佢向住我哋係咁叫，仲好似想捉我哋咁…





我俾佢嚇咗一跳，家姐就俾佢嚇到呆咗，頭亦垂低埋，好似入咗定咁，停晒喺度唔郁…

家姐係咪暈咗呀？

我正想睇吓佢咩事之際，遠處嘅醫生同護士笑到好詭異咁，仲好大聲…

我唯有另返轉頭睇吓咩事啦，佢哋而家望住我哋，佢哋個樣面青口唇白咁，兩個似乎根本就唔係醫生同護士…

而應該係另外兩個精神病人，佢哋而家一個拎住把手術刀，一個攞住把菜刀，似乎係想對我哋不利…

我想做護身咒都做唔切，就連護身符都跌咗落地，我眼見佢哋而家就衝緊埋嚟喇！

呢一刻，我淨係好想嗌「救命」，但係根本發唔到力去嗌…





護士衝到埋嚟就停咗喺我面前，醫生就一把大刀斬落去卡住道門嘅嗰個女人個頭度，成個頭俾佢斬咗落嚟…

奇怪嘅係一滴血都冇。我心諗，唔通個醫生係想救我哋！？

我望到呆晒，唔知點算好。

個醫生拿住咗個女人嘅頭對住咗我，加埋個護士，而家係三個唔知係人定係鬼嘅怪物望住我喺度奸笑…

我就好似肉隨鉆板上咁，根本冇能力反抗，「先生」﹑「嬸嬸」又唔喺我身邊，家姐就呆咗保護唔到我，阿輝佢又唔喺度…

我除咗個身同皮膚一直喺度震，就只能一直不停咁流眼淚，我真係好驚…

…

個醫生突然提起菜刀，我垂低頭，雙手俺耳，就等待住死亡嘅來臨…





「擦！」
「哇丫！」
「擦！」
「嗚呀！」
「唔好呀！我唔敢喇！」
「擦！」

一男兩女嘅聲音，奇怪嘅係…竟然冇家姐把聲，周圍好似靜晒落嚟咁…

…

我擘大眼一望，醫生﹑護士同女人頭三個都死咗喺地下，郁都唔郁，場面雖然恐佈，但慶幸嘅係我竟然冇死到…

我再向上一望…

「家姐！？」

家姐對眼…晶凝通透！黃色？瞳孔點解會咁嘅？貓眼？家姐雙手指甲好尖好利，唔通呢三隻嘢係咁樣嘅家姐殺嘅？

「啪，啪，啪…」

掌聲突然喺第一個神經女人個房度傳出嚟，嗰個房嘅門竟然…

自己打開咗，嗰個神經女人喺個房度一邊拍手，一邊行緊出嚟，佢之後企定定咁望住我哋…

「貓女，哈哈哈，貓女！」個女人咁講。

究竟發生咩事？家姐佢又點解會咁架？

(待續)

下集預告︰

「鬼武士！？」