米米蓮妖怪作品 -《旅行‧如此‧難以忘‧記 》(百集長篇): 第047集 ~ 明︰我夠見到啦，可以點丫？聽日去地藏廟求吓神囉。
第047集 ~ 明︰我夠見到啦，可以點丫？聽日去地藏廟求吓神囉。
「踢波」兩個字嚇咗我一跳，條「喪狗」唔係喪咗呀？感覺就好似係老虎頭上釘虱乸咁…
不過話時話，如果我哋係虱乸，咁老虎又耐得我哋咩何呢？諗諗吓，個身都痕痕地添…
條「喪狗」仲要喺度剝衫，我突然就幻想到成堆虱乸擒咗上佢身，嘩，好恐怖呀！
不過，我見佢摺來摺去綁來綁去咁，兩吓手勢就整咗個波出嚟，仲依依庵庵咁，而家，個波真係成個西瓜波咁，好趣緻…
不過似乎唔夠「大袋」趣緻，佢竟然助晒跑咁凌空抽射，「喪狗」一縮手，佢成個人塌咗落地，你睇吓佢而家喺地下幾趣緻。
「喪狗」一開波就射出一條金光，將一堆鬼怪射爆晒…
趴佢個街！踢到咁鬼遠，走死人咩！？
我當然即刻就去攞返個波啦。等我又射吓先…
「起身喇！大袋！接波！」
我見佢未企到起身，射鬼之餘，梗係要「射龜」啦。
點知我哋幾條友仔互傳，三吓唔埋，條「大袋」就企起咗身，一腳「炒飛機」，唉…
仲嚇親隻女鬼，佢嬲起嚟，將所有鬼都收起返晒，自己衝咗埋「大袋」度…
我真係講句風涼話丫，「抵佢死啦！」
不過，條死仔「大袋」總算有D作用，炒機一腳就攪到無晒D鬼，好過我哋一腳腳咁踢啦。
隻女鬼叉住咗「大袋」條頸衝咗埋去石壆，唔知點解，我下意識覺得佢應該咁做…
「摸佢心口！」
不過，我都知我唔啱架喇，為求將功補過，所以我造定「六字護身咒」先…
點知，我見到「鬼頭」又再出現，我驚起嚟咪即刻大嗌「老味死喇！蝦！」
其實我係想講「六脈齊發」，點知走晒音。
我D「脈」仲無端端打中晒「鬼頭」同女鬼，阻咗佢哋「好事」…
而「光管陳」亦都飛埋出嚟埋尾添，呼~ 大家總算平安無事。
之後，「光管陳」就要我哋嗱嗱聲返酒店先，見大家咁靜，我咪問囉︰—
「鬼頭唔係俾阿公打爆咗架咩？」
點知我一問，佢哋幾個都跟住問，攪到「光管陳」都有D尷尬添。
不過，「光管陳」話「鬼頭」唔止一兩隻，仲要可能有人控制…
呢一吓又真係奇怪咗D，我哋得罪咗咩人佢哋要咁做呢？唔係白痴到係輸波俾我哋嗰幾間中學呀？
………
返到酒店，放低咗阿倫同淫蟲「細鬼」喺我房，我都唔想同佢同房喇，咪去阿輝房囉…
中途我仲多口問咗句「阿欣同佢(肥妹)你會點揀呀？」
其實…唉…算啦，阿欣又的確係好好嘅…
去到阿輝房，班死仔玩搶床訓都唔肯返自己房訓，我咪即刻衝上去搶床囉…
阿輝去咗廁所，班死仔就同阿公佢都訓到古古聲，我都諗住訓架喇，但係唔係即刻訓到家嘛…
我趴咗喺張床度見到窗外面又有隻嘢，係隻經典「長頸女鬼」，佢仲對住我喺度揮住手笑…
我都唔知點算好，不過睇嚟佢係冇惡意嘅。
之後，聽到阿輝行返出嚟，我當然扮訓啦，睇吓佢又點處理隻「長頸女鬼」先？
我單住眼望佢，佢又真係戇九到同隻鬼Say Hello，我真係笑咗出嚟…
點知，俾個衰仔聽到，佢仲追住我嚟打添…
隻女鬼不知睇到幾開心，仲拍晒手咁，我真係頂佢唔順，不過打打吓，唔知做乜，我就訓著咗喇…
可能真係太攰，竟然連基本戒心都冇咗，冇理到隻「長頸女鬼」添。
………
不過幸好，尋晚乜事都冇發生，一訓就訓到大天光，我再望一望窗外，陽光都燦到有入眼喇，班衰仔仲未醒。
咦？死喇，十二點幾喇！
「喂，喂，喂，醒喇！」
「醒乜Q嘢啫，啱啱先訓咋！」「大袋」講。
「起身啦，差唔多出發喇！」「喪狗」刷住牙出嚟講。
「而家幾點呀？做乜嘢你換晒成套睡衣嘅？」阿輝醒咗檬檬鬆鬆咁問。
「訓到半夜，醒咗，咪返咗過自己房沖個涼換件衫再返過嚟囉。」「喪狗」答。
「咁你唔喺自己房訓？」我問。
「嘩！大佬，訓前都仲見到隻「長頸女鬼」喺窗出面呀，仲一條友訓？想死咩！」「喪狗」答。
我哋都望一望「大袋」，睇嚟得佢一個唔知發生過乜事。
我哋好快就梳洗好，之後出門搵返大家，今日好似話係去地藏廟呀。
一落到樓下，原來大家都齊晒人喇。丫，但係，點解日日樓下都係一樣架？又係阿妮同嗰兩個西人，悶唔悶D呀？
今晚真係要問吓嗰兩條鬼佬乜九嘢事日日坐喺梳化度先，不過當然，一陣我又要先靜靜雞去搵小倩啦，嘻嘻。
咦，今日…阿欣都好似會過嚟噃。
「你哋聽住呀，一陣去地藏廟就地藏廟喇，唔好過去隔離呀，記唔記得？」「光管陳」細細聲同我哋幾個講。
「點解呀？」當然又係「大袋」先出口問啦。
「隔離有間鬼廟，唔惹得過，明唔明？」「光管陳」答。
「丫！點解呢個日本旅行咁煩架？鬼仲多過人嘅！」我呻。
「你冇聽過D人成日話日本呢個鬼地方咩？」
「你冇睇過鬼太郎咩？」
「你冇聽過鬼姦咩？」
我仲可以講D咩丫？
(待續)
下集預告︰
而家係三個唔知係人定係鬼嘅怪物望住我喺度奸笑…