米米蓮妖怪作品 -《旅行‧如此‧難以忘‧記 》(百集長篇): 第049集 ~ 輝︰瘋婦認同+1，救命+1，大Lin雄衰到+01
第049集 ~ 輝︰瘋婦認同+1，救命+1，大Lin雄衰到+01
女鬼嚟架！(女鬼都唔得呀！哼，唔理你喇！)
下次唔敢喇！(仲要有下次！？)
「關你個貓樣咩事啫？」我係咁諗。但係喺阿欣面前，我又點會話佢家姐丫？
唉，算喇，講返呢邊先…
上次講到班死仔攰到衝晒上我床度訓，我去完廁所返出嚟，諗住閂埋個窗簾就訓啦。
點知見到隻「長頸女鬼」同我打招呼，佢又冇乜嘢嘅，我諗都係禮貌嚟啫…
佢真係就咁打完招呼就返咗落樓下，但係個死人阿明原來仲未訓，仲笑我添，咁我咪同佢都「打個招呼」囉。
點知條死仔，打打吓都訓得著，真係吹佢唔脹。
俾佢咁攪一攪，我又唔想訓，一條友，百無聊賴咁，咪出去行吓，買罐汽水飲吓囉。
………
點知又見到「美奈子」，佢個樣就唔恐怖，但係一諗起佢D之前嘅動作，真係毛管都棟起晒…
我又唔識同佢溝通，所以咪指一指佢個口囉，意思係想同達叔傾吓計。
好在，佢似乎都明，但係我一見到佢開始擘大個口，我就即刻另轉頭去買咗汽水先。
嘩，大佬，真人嚟架，你估漫畫咩，真係好Q恐怖架！上次真係嚇到尿都標埋！
「喂！你搵我呀？」達叔出咗嚟，拍拍我膊頭講。
之後我哋就你一言我一語咁。
「無呀，你忙唔忙呀？我訓唔著，想搵人傾吓計喳嘛。」
「哦，好！我都係平時咁執頭執尾喳嘛，你有咩想講就即管講啦。」
「呢個旅程都幾奇怪，見鬼怪好似仲多過見人咁，都唔知發生咗乜嘢事。」
「哦，平時見唔到就話啫，見到就當然多啦，根本成個世界都係鬼怪，只不過人類平時唔會見到喳嘛，唔係點解呢度14層樓，得4層係俾人住啫，仲要好多鬼怪唔鐘意住酒店，鐘意流連喺條街度。係呢！你個額頭做乜嘢損咗嘅？」
「今朝囉，去拜神之前喺條街度見到隻好恐怖嘅老女人鬼，我咪做護身咒囉，點知緊張到篤到個額頭損晒都唔知。」
「護身咒！？你識護身咒？老女人鬼？咩樣架？」
「識呀。佢咩樣呀？老女人囉，最恐怖係佢個頭，毛孔好似火山窿咁，仲有D好似脷咁嘅嘢，喺個窿度伸出嚟，舔喺佢個頭頂度漏出嚟嘅奶，真係講起嚟都覺得嘔心。」
「哦，我知邊個喇，佢住樓下喳嘛。」聽到達叔咁講，我個樣就好似「大口仔」咁。
佢之後再講︰—
「佢個樣就恐怖D，但係佢應該冇惡意架，身世仲好慘添，其實呢度有兩層係俾D無家可歸嘅鬼住架，「龍也」都係住佢隔離喳嘛，佢都好錫「龍也」 架，佢係一隻好怕醜嘅鬼，好似今朝喳嘛，佢話有個男仔俾咗張裸照佢睇，嚇親佢喎，仲同我傾咗成個晏晝呢樣嘢添，至於佢嘅身世，只能講係一個唔正常嘅悲劇， 我諗你睇佢個樣都大概知道咩事架喇…」
後面嗰句我都聽唔清楚嚧，淨係知道裸男照單嘢令我有D尷尬，所以我嘗試轉一吓話題…
我見達叔佢都係香港人，仲好似識好多嘢咁，咪試吓問佢囉。
「南龍北鳳，你有冇聽過呀？」
佢個樣好似好雀躍咁，但係好快就平復返落嚟，仲另另頭咁，我覺得好奇怪咪再問囉。
「東虫西聖，火鳳仙人，乜虫大師…呢？」我一輪嘴咁狂問。
我發覺一講到有關「北鳳」嗰邊嘅嘢，佢就好似有嘢想講咁。
「我要返去做嘢，下次再傾啦。」
達叔佢似乎係想逃避D乜嘢咁，我雖然唔係好想強人所難，但係又真係好好奇咁，想再問，點知…
「你再講，我就叫埋肥妹上嚟同你講，聽講佢對你好有興趣架喎。」
佢…竟然咁講，呢句說話太邪惡喇，我估唔到竟然喺達叔把口講出嚟，睇嚟佢知道嘅嘢真係唔少，我唯有收口。
佢之後走咗，我飲埋罐汽水就返咗去訓。
………
一訓就訓到第朝，亦即係我哋嚟咗呢度嘅第三日，我檬檬鬆鬆咁見到阿狗…
「而家幾點呀？做乜嘢你換晒成套睡衣嘅？」
阿狗原來半夜返咗自己房沖涼換衫，原來佢都見到隻「長頸女鬼」。
我哋好快咁梳洗好就出門去搵返其他人…
………
一落到樓下，大家原來都已經齊晒人。
我突然諗起我女朋友阿欣，佢應該係今日會過嚟架喎，唔知有冇時間接到佢機呢？
「光管陳」佢叫我哋唔好去地藏廟嘅隔離，佢話係間鬼廟嚟，阿明佢呻呢次旅行點解遇到咁多鬼怪…
其實，我又何常唔係尋晚已經問過一次呢個問題丫，佢哋一輪廢話應佢，我就冇理佢哋，跟大隊就上咗旅遊巴向地藏廟出發。
………
一到咗，成班衰仔又好似尋日咁，各有各行，「光管陳」話肚痛，自己行咗去搵廁所，但係…
班衰仔竟然向住隔離間鬼廟走咗去呀！
「喂！「光管陳」話唔好過去嗰邊呀！」我叫住佢哋。
「我都唔想呀！不過佢哋成班都過去，我哋唔去唔得。」阿狗講。
「咪跟去囉，我哋而家識D嘢，應該夠撐嘅！」「大袋」竟然仲大言不慚。
「六脈齊發，射爆佢！」阿明仲陶醉緊尋晚個撞手神。
大哥呀！九發變六發，未發已經打咗折扣啦，仲點旨意你呀？
不過，阿狗講得啱，真係唔跟唔得，最衰係帶頭嘅阿華同達明，唉，唯有跟去啦。
…
呢度門亭個鳥居好大座，仲好莊嚴，參道寬闊，亭園顯赫，四周圍樹木都好茂盛，就好似去咗另一個世界咁…
嚟呢度參拜嘅人仲多過地藏廟同七福神廟嘅總和，呢度冇乜中小學生，大部份望上去都似係D名流貴族﹑社團組織或者D身家顯赫嘅人，感覺好唔尋常。
我記得「光管陳」講過越多人供奉嘅神靈力量越大，相反，鬼都一樣，佢話過呢度係鬼廟，所以我就咁望埋去呢度供奉嘅人數，我真係不禁心寒起嚟。
但係，若果係鬼廟，點解咁多人供奉嘅？
喺呢度逗留，我雖然好唔舒服，但係一來，要盡力保護大家，二來，我真係好好奇究竟咁多人參拜嘅係咩神？所以我決定跟佢哋走得更入裡面。
我哋分咗兩大堆人，阿明同阿狗跟一堆，我就同「大袋」跟一堆。
………
「鬼武士！」我大叫咗出嚟。
我同佢哋行咗去左邊一個較細嘅參神位，呢度有個好雄偉嘅武士像，佢個頭係骷髏頭，不過係石做嘅…
佢把刀生晒銹，但係動作就好似想殺人咁，呢邊冇乜日本人，淨係得我哋七﹑八個同學喺度。
「咦！又話日本好乾淨嘅？我頂你個肺丫！」
「哈哈哈，哈哈哈！」
大Lin雄踩中咗狗屎。
但係，個死仔竟然…
大鑊喇！我諗我哋呢次大鑊喇！佢條友黐線架，佢竟然將D狗屎抹落去個武士像塊面度…
我即刻衝埋去用少少水整濕D紙巾抹返啦，希望個「武士」冇事啦，唔係，希望我哋冇事啦，我起勢咁捽…
「仲有冇水？仲有冇水？仲有冇紙巾？仲有冇紙巾？」我好緊張咁問佢哋。
點知佢哋竟然答「冇」！我望一望個像，而家好似…仲…衰過頭先，佢成塊面都係…濕淋淋，一躂躂咁…
陣陣惡臭飛晒出嚟，佢哋仲話︰—
「唔好理啦！」
「走啦！」
我俾佢哋扯走咗，但係我見到個「武士」，似乎呢次大件事喇，「佢」發緊嬲呀！佢對眼紅到發晒光…
(待續)
下集預告︰
路邊D長茅石像突然郁起嚟，雙眼發紅光咁