米米蓮妖怪作品 -《旅行‧如此‧難以忘‧記 》(百集長篇): 第046集 ~ 輝︰女鬼，鬼頭，長頸鬼，唉！

第046集 ~ 輝︰女鬼，鬼頭，長頸鬼，唉！

周圍環境突然變成繁華鬧市之後嘅景況我諗阿明都講得好清楚，我暫時冇咩補充。

「光管陳」整個咁嘅訓練俾我哋，我覺得好正，好醒神，直頭咩鬥心都出晒嚟…

睇嚟我哋可以活學活用喇，「九字護身法」，呢幾日，就靠晒「你」喇！

但係…阿狗佢竟然提議喺一堆鬼面前踢波！？我一時間真係唔知佢想點。





阿狗突然除咗件衫，大叫「保我一陣！」，佢之後將件衫摺來摺去，綁來綁去…

而家，件衫成個波咁，但係我都係唔係好明做緊乜嘢？

「獨鈷，金剛，外獅，內獅，外縛，內縛，智拳，日輪，隱形，收！」

阿狗佢竟然已經熟練「九字護身法」到呢個程度，一次過做晒出嚟…

仲將個護網「收」到件「衫波」度，而家真係成個波出晒嚟。





「正！等我嚟開波！」

「大袋」見到個波，興奮到即刻就想凌空喺阿狗隻手度將個波射出去，佢仲助跑埋，拉行晒弓，凌空飛身過去…

說時遲那時快，但係唔夠阿狗縮得快，「大袋」條衰仔射咗個空，成個人塌咗喺地下…

D鬼見到佢跌低咗即刻就想衝埋去，呢個時候，阿狗即刻就凌空放低個波，一腳就抽埋去！

如我哋所願，一堆鬼真係一吓就被KO。阿明佢興奮到癲咗咁，即刻就沿住條波路去返個波嘅位，轉身就啄起個波。





「起身喇！大袋！接波！」

佢擺明係玩「大袋」，啄咗落佢個頭度，但係「大袋」竟然陪佢癲…

飛身去頂頭鎚，興奮嘅係，個波即使只係輕輕擦過D鬼，D鬼都會散晒。

我見到咁，冇理由唔去湊吓熱鬧丫，我玩嘢，真係整個「慢流尾袋」佢哋嘆吓…

點知D鬼攪笑到跳起嚟跌返落個波度，都仲要俾個波嘅護身咒打爆咗。

當阿狗想再傳波之際，個死人「大袋」又發癲喇！

「等我嚟抽爆佢哋隻大佬！」

佢搶咗阿狗個波嚟抽射，我估佢係想抽嗰隻喺空中嘅女鬼，女鬼的確係俾佢嚇到，但係個波就唔知射咗去邊，呢次PK喇！





阿狗想再造「九字護身法」都嚟唔切，周圍D鬼變晒做一條條嘅妖氣，一下子就返晒去隻女鬼身上…

女鬼亦已經衝咗埋去雙手叉住咗「大袋」條頸，一直衝向遠處嘅石壆…

如果真係撞到石壆，我諗隻女鬼唔食咗佢，佢D骨都會散晒，而我哋根本跟唔上隻女鬼嘅速度。

「摸佢心口！」
「護身咒呀！中指篤頭！」

我諗呢兩句嘢大家都知係邊個講啦，「大袋」總算醒目，聽咗後者建議，佢中指點到額頭…

女鬼就突然「依娃」一聲，全身好似中咗火彈咁彈開咗，「大袋」總算平安落嚟。

阿狗即刻就想收拾隻女鬼…





「獨鈷，金剛，外獅…」

但係…原來唔知幾時…仲嚟多咗隻…「鬼頭」！？點解佢會仲喺度架？佢向住阿狗衝咗埋去！

「六脈齊發！蝦！」

三棟三橫嘅金光穿過「鬼頭」同女鬼，雖然佢哋唔係即刻被打散，但係就停頓咗落嚟叫痛咁嘅款。

「光管陳」突然飛返出嚟，「噼啪」兩下就收咗兩隻鬼。

「差D出事，我哋而家快D返去酒店先，一陣再慢慢講。」「光管陳」講。

之後，我哋兩個扶一個咁將阿倫同細鬼扶起，跟住「光管陳」同公公一齊返去酒店，沿途大家都不停發問。





「鬼頭唔係俾阿公打爆咗架咩？」
「點解頭先會出現鬼頭嘅？」
「其實會唔會話邊個咒獨立都可以用呢？」
「條腰仲赤赤痛呀！點算呀？」
「嗰四條女真係值得回味！點樣先可以見返佢哋呢你估？」
「我哋而家喺邊呀？」
「D女呢？」

「光管陳」一副無奈樣…

「七條友，七條問題，我答邊個好呢？鬼頭我懷疑唔止一兩隻，可能係有人控制嘅，呢幾日隨時都可能再見到，大家小心D喺啦。D 咒印單獨用力量有限，與其一吓吓咁試，不如做足D啦。條腰你好快D好返添呀，唔係呢幾日有排你慘呀！女！？廢話唔答。返酒店啦！」

「我呻吓啫，幾時問你啫？」「大袋」總係唔講嘢會死咁。

………





返到去酒店，大家一齊放低咗阿倫同「細鬼」喺阿明房，「光管陳」就喺度幫佢哋驅一驅邪氣，我哋就四個就同公公一齊返咗我房。

「你記得搵肥妹呀？人地等咗你成晚喇！」
「係噃，肥妹真係慘，佢都好「靚女」丫！」
「阿欣同佢你會點揀呀？」
「係囉，你未訓咪去搵下人地傾吓計囉。」
「邊個再講，我就襯佢訓咗，奄咗佢！」

去到我房，班死仔可能真係太攰喇，涼都冇沖就衝晒上床，我去個廁所返出嚟，佢哋都訓晒嚧，仲訓到古古聲…

我都諗住訓啦，咪行去閂埋個窗簾囉，點知…

使唔使咁多呀！？又一隻！？一個女人嘅頭，一條好長嘅頸，一隻好長嘅手，喺窗外同我打緊招呼…

不過佢唔似係想害我，仲好似好親切咁，我塊面都攰到痺晒嚧，塊面襯吓襯吓咁，有D尷尬咁同佢打招呼…

但係我想問，點解佢偷窺我哋都可以咁理所當然咁嘅，真係想嗌句「妖怪大晒咩！？」

（待續）

下集預告：

隔離有間鬼廟，唔惹得過…