米米蓮妖怪作品 -《旅行‧如此‧難以忘‧記 》(百集長篇): 第045集 ~ 欣︰由「學校軍營」到「高街鬼屋」。
第045集 ~ 欣︰由「學校軍營」到「高街鬼屋」。
一到夜晚，我哋兩姊妹就同「先生」﹑「嬸嬸」一齊去到金鐘，沿路經過香港公園，穿過壁球總會…
再喺纜車站對面嘅斜路行上去「聖迪達」，沿途路人越嚟越少，街燈亦都越嚟越少，但係我同家姐就越嚟越緊張。
行到去平時成日會經過嘅自然基金會間屋仔度，唔知點解佢哋道橙紅色嘅外牆變得好陰森恐佈…
向左轉望上去「聖迪達」後門嘅大斜路，就連街燈都壞埋，淨係見到一條黑色望唔到盡頭嘅斜路…
斜路旁邊搖動嘅樹影，再加上「聖迪達」外牆上嘅躝藤，令到氣氛更加緊張，有種不寒而慄嘅感覺…
攪到我同家姐都唔敢行上去…但係最後我仍然鼓起勇氣，深呼吸一啖就同家姐戰戰兢兢咁繼續跟住「先生」佢向上行…
行到「聖迪達」嘅後門，係一道舊式鐵閘，鐵閘裡面燈光昏暗，淨係睇到一個男人嘅身影…
「喂，龍居士，終於嚟喇？等你哋好耐喇！咦？仲有兩個妹妹添呀？呢度男校嚟架喎，哈哈！」
閘裡面嘅男人喺度講嘢，直至嚟到呢度，我嘅心情先稍為平靜返落嚟。
「係呀，好耐冇見，近排唔錯丫嘛？今晚專登帶兩個妹妹嚟睇吓D鬼！」「先生」佢咁講。
我哋就對住個男人禮貌咁笑咗一吓。
「嬸嬸」同我哋講呢個男人喺呢間學校做雜工嘅，佢叫阿發。
之後，我哋四個就一直跟住阿發佢行，行過幾個課室，呢度所有課室裡面都係木檯木櫈，課室門都係木造…
我哋再行上一條石梯，就連扶手都係石造嘅，污污糟糟咁，但係就帶有好濃烈嘅古蹟味，成個古堡咁…
上咗一層，左邊手都係課室，右邊手穿過大門係個籃球場，應該就係阿輝佢成日話小息同阿明佢哋打籃球嘅球場…
而家呢個角度望到籃球場出面圍住鐵欄嘅好似係個足球場，我估阿輝佢哋就係喺度練波架喇。
阿發佢冇帶我哋經過球場，直接就帶咗我哋上四樓，再通過一條窄巷，走到呢間學校嘅正門…
再轉左行到去校務處，呢度好多獎項，一個又一個嘅層架都係金色嘅獎杯，唔知阿輝佢有冇份拎嘅呢？
之後，我哋行到去教員室…
「就喺呢度睇啦。」阿發就咁講。
家姐望咗入教員室…
「唔係裡面呀，係呢度望返去下面個足球場度呀。」「先生」咁講。
我望一望個球場，乜嘢都望唔到…
「等阿龍幫你哋開一開法眼先啦，不過你哋要有心理準備呀。其實應該早D幫你哋開眼，頭先經過嘅地牢嗰層係牢房嚟架，專困住D死囚。」
「嬸嬸」咁講，家姐就回應佢：—
「頭先咁近，如果見到D死囚衝埋嚟，真係嚇死人呀！」
「先生」唔知點解變得好平靜，攞咗少少物品出嚟，叫我哋合埋眼…
過咗一陣，又叫我哋開返眼，我之後望返落去球場度，而家球場上面，突然多咗幾十人。
我見到一大隊人，個個都係綠衣綠帽咁，佢哋似係喺度操練緊，唔通呢D就係日本軍人嘅鬼魂？
我想問出口之際，我見到「先生」佢眼貶淚光咁，帶住嘅唔止係傷痛，仲有好多仇恨咁，所以我唔敢問。
「阿龍，你又嚟啦，唔好咁啦。」「嬸嬸」對住「先生」佢講。
但係，家姐就忍唔住出咗口問咗︰—
「呢班日本軍人死咗喺度呀？佢哋做緊乜嘢呀？解籤先生你又做乜嘢想喊咁嘅？」
「呢度係日本軍人侵華時其中一個軍營，其實佢哋都幾慘，佢哋唔知自己已經客死異鄉，喺香港冇人超渡佢哋，亦冇人想超渡佢哋，所以不斷咁重覆返死之前所做嘅嘢。」「嬸嬸」答。
「咁點解你哋唔超渡佢呀？」我都忍唔住口問埋一份。
「先生」終於都忍唔住口，含住眼淚咁回應我︰—
「我做唔到！我不唔單止冇將佢哋打到魂飛魄散，仲冇將我對佢哋嘅仇恨帶俾我嘅下一代，我已經算係咁，我用咗我成世人嘅努力去嘗試原諒佢哋，但係我做唔到。當年…我係親眼睇住一個一直陪我長大嘅姐姐…俾佢哋…監生虐待至死，你…你哋覺得…我仲可以點對佢哋丫？」
「先生」突然咁激動，我哋都唔知點算好。
「唉，唔睇呢度喇，去高街啦，叫咗你唔好嚟呢度架啦。」「嬸嬸」一邊扯住「先生」走一邊講。
「唔該晒你呀，阿發，下次飲茶。妹妹，跟我行丫。」
大家一出學校門口就上咗的士，沿途都冇講任何嘢…
………
好快咁，我哋就到咗「高街鬼屋」。
呢度四周圍都冇咩人，淨係見到一間俾D躝藤纏住晒嘅紅色磚牆大屋，冇錯，呢度就係「高街鬼屋」喇。
「先生」似乎已經冷靜返落嚟…
「頭先唔好意思，我以為都幾十年喇，自己年紀又大喇，應該會忘記以前D唔開心嘅嘢啦，所以其實頭先係我自己想去睇吓啫，點知原來仇恨係咁可怕，咁多年嚟都冇減過，我幫唔到佢哋啫，希望遲D有人可以幫吓手，超渡佢哋啦。你哋都唔好學我咁小氣呀，咁多仇恨有乜好啫。講返呢邊先，呢度就真係俾你哋見識吓喇，一陣我同我老伴都唔會插手，你哋兩姊妹入去啦，呢度，嗱，每人一道護身符，仲記得我教你哋嘅護身咒嗎？」
…
之後，「先生」帶咗我哋入去鬼屋門口，佢哋就企喺門口叫我哋入去，家姐當然唔肯，但係唔知點解…
我思緒好亂，唔知自己想點嘅同時，我已經推開咗門，行咗入去，家姐為咗想保護我，佢都衝埋入嚟。
但係，後面突然傳嚟「嘭」一聲，大門閂埋咗。
呢度伸手不見五指，個感覺好寒，前面嘅冷巷好似無窮無盡咁，黑暗之中仲夾雜住好多怪聲，就好似不斷叫我哋行入去咁。
「躂~躂~躂~…」一盞又一盞嘅燈開著咗，而家整個大屋都係醫院場景，正確嚟講應該係一間瘋人院…
(待續)
下集預告︰
邊個再講，我就襯佢訓咗，奄咗佢！