米米蓮妖怪作品 -《旅行‧如此‧難以忘‧記 》(百集長篇): 第039集 ~ 欣︰一對血紅色嘅手…

第039集 ~ 欣︰一對血紅色嘅手…

「先生」佢慢慢抬起個頭，但係雙眼…卻係反白嘅…

佢隨即跌喺地下。

「嬸嬸」衝上前去睇吓「先生」有冇事，我就攬實家姐，「先生」睇嚟似係受咗D傷或者係太攰咁。

當我以為一切都完結嗰陣，我睇到一條紫色嘅煙喺「先生」後面飛走咗，似乎仲會有下文咁…





不過，而家總算大家都平安落嚟，我就冇再理佢，見到「嬸嬸」扶起咗「先生」佢。

「阿龍，你有冇事呀？唔好嚇我呢個伯爺婆呀。」「嬸嬸」眼眨淚光咁問「先生」。

「之前個背脊個傷患囉，可能頭先動作太大，傷口爆開咗，而家赤赤痛囉，嗚哇！好痛呀！」

「先生」望到「嬸嬸」佢喊，就開始安慰佢。

「傻豬嚟嘅，你唔信我咩？有咩好喊啫，都幾十歲人啦，呢次唔死，隨時都差唔多係時候架啦，乖喇，唔好喊喇，有兩個妹妹睇住，好醜怪架…」





佢講到我睇住佢地嘅時候，我免得「嬸嬸」尷尬，所以就扮睇唔到，順便叫醒家姐佢，但係，原來家姐一早醒咗喇喎。

家姐喺度笑佢哋兩老，而我就問佢︰—

「你幾時醒架？」

「我係嚇咗一嚇，暈咗一陣，但係頭先打到咁嘈，一陣我就醒返喇，我都有見到「解籤佬」佢哋嘅大戰嘅過程呀。」

「你冇嚇親丫嘛？擔心死人喇。」





「傻妹，家姐仲要保護你，唔俾人蝦你家嘛，點可以有事啫。」

「嬸嬸」扶住「先生」行咗過嚟。

「妹妹，我哋返落樓下休息吓先啦。」

…

之後，我哋四個返咗落屋裡面嘅大廳。

「做咩咁「渣」架，「解籤叔叔」？」家姐講。

「「解籤叔叔」！？睇嚟我嘅實力令你對我有D改觀噃，我就話幾十歲人有D舊患新傷啫，你又咁「渣」，見吓鬼就暈架？」

「你見咁多梗係啦，我第一次見咁核突恐怖嘅嘢架咋，真係嚇死人呀！」





「呢隻已經叫核突恐怖嚇死人，呢次你去日本，仲大把有得你見呀，行到埋你面前，甚至摸吓你嘅時候，你仲驚呀。」

「唔好嚇佢哋啦。係噃，衰佬，我都唔記得咗添，你頭先做咩唔帶埋「青龍劍」上去打隻死嘢呀？」「嬸嬸」答口。

「車，隻死人嘢，唔配我用家傳之寶，我赤手空拳都打到佢永不超生啦，整臭我把「青龍劍」咪弊。」

「「青龍劍」！？咩嚟架？係咪好犀利嘅武器嚟架？」我問。

「「青龍劍」係我阿爺個阿爺個老豆搵返嚟嘅一舊青綠寶玉，經過當年一班好勁嘅道術之士多年嘅試煉同打磨，終於成為而家嘅樣，係我屋企嘅傳家之寶，外形係把斷咗嘅劍…」

「斷咗！？咁點用呀？」家姐問。

「拮人斬人當然唔得啦，不過斬妖除魔就好勁，再加上要配合「九龍伏魔訣」嘅，所以唔係人人用得架，「紫龍神劍」一招配上「青龍劍」，就叫做「紫青合一」，到時成把劍形會出返晒嚟，見鬼殺鬼，見妖斬妖架。」





「好勁呀！仲有冇其他架？」我講。

「冇架喇，最勁係佢。」

「你聽佢講丫，成日認叻。「青龍劍」係同另外三把神劍齊名嘅，當年好出名，叫做「四劍平天下」，呢四把神劍震懾晒所有妖魔鬼怪，不過我都係聽我D師父佢哋講，我都未見過其他幾把神劍…」「嬸嬸」解釋多返D。

「咪係囉，得返佢一把仲喺世上，咁仲唔係佢最勁。」

「咪炸亂哥柄啦！雖然我冇見過，但係聽過，其中一把我真係唔記得咗佢哋點講，不過另外兩把我記得，一把叫「鳳凰火炎」，係一把三尖兩刃嘅劍，好似個「炎」字咁嘅樣嘅，係火鳳派嘅寶物，不過十幾廿年前，好似話俾上一代嘅「火鳳仙人」江雲林個大徒弟偷咗，而家佢個細徒弟陳鳳初都喺香港架，好似喺…聖乜乜度教書架…」

「唔係聖迪達呀？」

「係呀，不過我都唔知佢教邊科，道士可以教咩科呢真係，唔會係英文咁攪笑呀，哈哈。」「先生」講。

「你又炸亂哥柄啦！等我講埋先啦，另一把叫「九陽草薙」，原本係模仿「天叢雲劍」所鑄造，因為造劍者都係術士之流，就將錯就錯，將把劍世代都以太陽嘅光嚟煉劍，所以稱之為「九陽」，係德川家族御用鑄劍師所造，不過已經唔知去咗邊，亦冇咩人識，反而「妖刀村正」，到今時今日都咁多人識。」





「嬸嬸」似乎已經講完，我哋咪傾吓其他嘢囉，「先生」佢就好似好回味頭先D內容咁，氣氛都好和諧。

之後，「先生」行開咗，「嬸嬸」就話去一去廚房。佢哋兩個都行開晒，我同家姐就仲坐喺廳。

突然，一對手揸住隻杯喺家姐遮住咗嘅右邊遞前嚟，家姐另轉頭一望…

「哇！」一聲大叫咗出嚟。

而我就見唔到乜嘢嚟，不過見到一對血紅色嘅手，呢對手肯定唔係「先生」﹑「嬸嬸」或者佢哋嘅工人嘅，究竟…對手係邊個嘅呢？

(待續)

下集預告︰





香港嘅Leslie呀！佢係我偶像嚟…