米米蓮妖怪作品 -《旅行‧如此‧難以忘‧記 》(百集長篇): 第038集 ~ 明︰「神人」！？「肥妹」發爛！
第038集 ~ 明︰「神人」！？「肥妹」發爛！
「鬼頭」俾一個雄偉嘅「佢」捉實咗，當我聽到「何氏吸魂手」五個字，再望清楚「佢」個樣嘅時候…
「佢」已經使出咗一招「爆裂神拳」，「鬼頭」俾「佢」一吓打爆咗，而我就呆咗咁望住「佢」，發現…原來…
「佢」就係我死去嘅阿公。
可以再見返佢，我心裡面腦裡面一時間充斥住無限句想講嘅說話，眼淚亦已經浪吓浪吓咁，成個身體都郁唔到…
只可以憑住我一張震緊嘅咀發出聲音︰—
「阿…公…」。
聽到阿輝同阿公嘅對話，見到阿公佢行埋我度，聽到佢講「唔使驚」三個字，我已經忍唔住眼淚…
再聽到佢講阿姨用嘅「黑色符」係用嚟召喚佢嚟保護我，我真係喊咗出聲。
我以為一世都冇機會再見到佢，我好想好想同佢講「對唔住」，但係我個口快過我個腦同個心…
「我仲以為阿姨佢嬲我害死你，佢用道「黑色符」嚟害我…」我第一句竟然係講呢D。
當聽到阿公佢講話阿姨佢最錫係我，我先諗返起，細個嗰陣阿姨成日帶我周圍去玩，即使每次講到阿公係我累死…
其實都係笑住口講，根本唔係責怪我，我到咗呢一刻終於明白，心結亦終於解開…
再加上原來係阿姨佢要求阿公延遲投胎嚟保護我，我個心就更加難過，原來世事並唔係咁簡單咁主觀去睇就得嘅…
當放開執著，原來可以睇到更多嘢。
阿公佢講返出嚟，我先知點解係我累死佢，原來冇公德心都係可以累得死人，我似乎又學多咗D嘢，個人又成長咗D。
…
「你想唔想睇吓我個後尾枕丫？」
我聽到要睇佢個爆開咗嘅頭，突然一個恐怖景象喺腦海衝出嚟，令我喺感動之中抽身返出嚟。
「唔使！爆頭好恐怖嘅，我…對唔住呀，阿公！」我亦終於乘機將我埋喺心底裡面成十年嘅說話講咗出嚟。
我睇住阿公佢熱淚盈眶，但又死要面唔想流馬尿咁…
「傻仔，你唔小心啫，生有時死有命，公公點可以怪你呢？」
我見到佢呢個樣同聽到佢咁講，我真係喺個心度笑咗出嚟。
感動過後，心甜過後，當我冷靜落嚟，我就諗返起頭先令我起晒雞皮嘅嗰兩招嘅名…
我就同佢講「何氏吸魂手」個名唔好聽，但當我聽到佢話用佢個名嚟命名嘅時候，我就知尷尬喇…
我父母同姓嘅，阿公佢叫做「何大波」。
………
之後，「喪狗」同「大袋」拍門入咗嚟搵我哋，我同阿輝就介紹咗阿公俾佢哋認識。
講完之後，阿公返咗入「黑色符」度，我帶埋佢同阿輝佢哋三個一齊去咗搵「光管陳」。
話時話，「光管陳」都冇講過一陣會去邊，唔知會去咩地方呢？不過而家有阿公保我，我又安全咗D喇喎，正！
………
「啪啪啪~！」
我哋去到三樓「光管陳」個房度敲門搵佢。
「邊個？」
出嚟嘅竟然係「黃仔」。
「你哋搵陳Sir呀？佢叫你哋等陣喎，你哋入唔入嚟坐陣丫？」
「黃Sir，陳Sir佢去咗邊呀？」「喪狗」問。
「佢成日都唔見咗人，成日都話要搵個重要嘅人喎，都唔知佢攪乜鬼噃。」
「同你同房，係我都唔想喺房啦，未煩過咩？」「大袋」細細聲喺度噏。
…
「喂，你哋咁早到咗嘅？」「光管陳」返咗嚟，喺冷巷同我哋講。
佢行到埋嚟，應該係見到阿公，碌大咗對眼對住阿公。
「知道晒喇？我冇爆你出嚟架，做咩跟埋嚟嘅？」
阿公淨係笑咗幾吓，「黃仔」就搲爆頭都唔會明「光管陳」噏乜，因為佢見唔到阿公。
「好喇，你哋有冇見過譚永倫同施計從呀？」佢講緊阿倫同「細鬼」。
「冇噃，佢哋冇返房。」我同阿輝就一齊應佢。
「佢哋頭先死死氣咁同我一齊返嚟，應該返完上房冇幾耐咋。」「黃仔」答口。
「咁你哋準備吓先，二十分鐘後樓下等，OK？」「光管陳」約實我哋。
「好~！」我哋幾個一齊好無奈咁回應，因為我哋一早準備好晒先落嚟家嘛，點知又要等。
…
冇理由返房架，所以我哋落咗樓下…
我又見到阿妮同兩個傳教士，唔通佢哋唔使訓嘅？「喪狗」佢哋埋咗去同阿妮傾計…
我襯有D時間，就即刻打返俾老媽子。
「喂，老媽子呀，我知道晒發生咩事喇，阿姨同你講晒未呀？」
「吓，講晒喇？咁好啦，阿公佢好好，好靚仔，而家喺我身邊，使唔使俾佢同你講丫？」
「丫，佢話佢唔可以透過電話同你傾計喎，佢話佢會保護好我架喇，你放心啦，係呀，我今晚有D嘢攪，呢幾日有時間再打俾你報平安啦。」
………
我講完電話就返埋櫃位搵返佢哋。
「有人客打電話落嚟叫嘢食呀，我要去做事先喇。」阿妮同「喪狗」﹑「大袋」講。
「係呀，咁好啦。」「喪狗」回應。
「唔係噃，仲有D時間，不如我哋都上去食堂丫，睇吓有咩玩都好呀。」「大袋」又加把口。
「食堂可以有咩玩丫？唔通有女玩咩？」我都講埋一份。
「唔係丫，上去打發吓時間都好。」阿輝話。
………
之後，我哋上咗去，又見到個「肥妹」喺度，我心諗佢應該都係妖怪嚟，唔係邊有食得咁癲呀？
不過阿妮喺度，我當咗佢係好妖嚟架喇，應該會保護我哋，又有阿公喺度，應該冇嘢呱。
死人「大袋」佢竟然衝咗埋去坐喺「肥妹」隔離，唔係想玩「肥妹」呀？
我驚「肥妹」唔玩得，一陣發脾氣，食咗我哋都得噃。
之後我哋三個都慢慢坐咗埋去。
「肥妹」一直喺度喪食嘢，成檯都係嘢食，不過D嘢食，一舊又一舊唔知咩咁，一PATPAT，睇到都唔想食啦，好嘔心呀。
「HELLO，小姐，你好，你都好食得吓噃，好好食架？」「大袋」個死人樣真係好衰。
「肥妹」應該唔識中文呱，唔係真係驚個死仔玩出禍，我見「肥妹」佢都冇理過我哋，一直喺度食…
之後，我見到阿輝跟住「喪狗」佢望一望「肥妹」後面，佢哋都表現出一副驚青同嘔心嘅樣，我就跟住望後去啦，點知…
見到…「肥妹」後面…原來係空心嘅！即係一邊食一邊跌返落嚟，地下有個大面盤載返住，我再望一望檯面…
我好真接咁就聯想到成個檯面D嘢食都係循環再食嘅，我真係睇到好想嘔…
「哈哈哈，原來條肥婆唔識中文喎，死肥婆，樣已經衰，仲食得咁醜樣，前世肯定係隻豬…」「大袋」個死仔真係唔識死。
「肥妹」突然好兇咁啤住「大袋」。
「你，夠，膽，講，多，次！」
(待續)
下集預告︰
當年好出名，叫做「四劍平天下」，呢四把神劍震懾晒所有妖魔鬼怪