米米蓮妖怪作品 -《旅行‧如此‧難以忘‧記 》(百集長篇): 第040集 ~ 輝︰驚唔過「肥妹」個口…
第040集 ~ 輝︰驚唔過「肥妹」個口…
「梗係捉鬼啦，唔通去叫雞咩？」阿狗佢串「大袋」
「話唔定真係架，哈哈。」而我就笑咁講。
………
之後，我哋一齊落咗樓下搵「光管陳」，點知佢未返到嚟，應門嘅係「黃仔」。
不過噏咗幾句廢話之後，「光管陳」好快就返咗嚟，仲先同阿明公公講嘢…
佢真係當「黃仔」係死架喎，佢有佢講，當「黃仔」透明咁。
當「光管陳」佢問起阿倫同「細鬼」，我感覺到應該佢哋出咗D事，但係我唔敢直接講…
因為佢哋兩個好可能係去過「雞竇」，如果冇關係，我又講咗出嚟，咪好似爆人陰毒咁，呢D嘢我唔做嘅。
之後「光管陳」話二十分鐘樓下等，我哋幾個無奈咁回應咗聲「好」就落咗去樓下等。
………
阿明去咗打電話，應該係想將「黑色符」同公公嘅事講返俾世伯伯母佢哋知。
我就跟咗阿狗同「大袋」去搵阿妮傾計，佢哋講講吓，阿狗竟然真係想約阿妮去睇戲，唔係真係想追佢呀？
佢係妖怪嚟架喎，我雖然都有D驚佢發爛，但係唔可以俾佢害到阿狗架，所以…
「你既然係妖怪！就唔好害阿狗啦！好嗎？」我衝口而出。
阿妮開頭呆咗一陣，之後就想忍都忍唔住咁喊咗出嚟，男仔整喊女仔，仲要係靚女，根本就係死罪，不能被寬恕…
不過我一早預咗佢哋兩個衰仔重色輕友架喇，嚟啦，打我啦！
點知佢哋不但子冇打我…
「咩你唔知咩？阿妮一早同我哋講晒佢身世啦。」「大袋」佢仲咁講。
「小妮，不如你唔好喊住丫，你同阿輝都講吓你身世丫，佢都可以做你朋友架。」阿狗都咁講。
「小咩妮呀？好難聽呀！唔好扮晒好熟呀吓。」
「車，你理得我啫，小妮都冇介意，關你鬼事咩？」
阿妮就有D怕醜咁，之後慢慢講咗佢D身世我聽…
「我本來係個小女孩，出世之前父母已經死去，只有我婆婆照顧我，6歲嗰年認識咗「小狐」，「小狐」係隻身負重傷嘅九尾狐妖，喺我同婆婆悉心照料底 下，佢總算勉強可以生存落去，但係喺我8歲嗰年，婆婆染上不治之症，似好快就要死去咁，而我亦同時患上重病，「小狐」為咗報恩，將我同佢嘅身體融合起嚟， 總算可以多照顧婆婆一段時間，就係佢一直陪住我成長，而家我哋係同體嘅，不過佢從來都唔會使用我身體，一直只係默默咁保護我，而我從來都冇想過做壞事，我只係想幫人，希望可以同你哋做個朋友啦。」
我聽完之後，有D慚愧…
「對唔住呀，我估唔到真係有咁多好妖，不過我意思係，如果你係妖，就唔應該同阿狗佢來往，我意思係情侶式拍拖呀，始終人妖殊途丫嘛。」
阿妮佢面紅紅咁，應該係怕醜。
「死架！我呢？點解係同佢，唔係同我拍拖呀？」「大袋」講。
「死開啦你！阿輝呀，小妮又冇應承過同我交往，我哋只係想再認識吓大家喳嘛，未來嘅嘢，大家都確定唔到，但係我都好希望可以同佢做個朋友，我諗你都會架可？」
「Sorry呀，大袋，因為…其實…我覺得…佢哋兩個好襯呀。」
阿妮個面仔又紅咗D，連死人阿狗都扮晒怕醜咁，真係頂佢唔順。
突然，櫃台電話響起，阿妮接個電話…
「有人客打電話落嚟叫嘢食呀，我要去做事先喇。」之後同我哋講。
原來阿明都返咗埋嚟，「大袋」個衰仔仲係死心不息，建議大家跟埋去食堂度，咁我哋咪都跟埋去囉。
上到食堂，又見到嗰個「肥妹」喺度，仲要食到成檯面嘢，食嘢食成咁，話佢唔係妖怪都冇人信啦。
死仔「大袋」佢竟然衝咗埋去佢度，肯定又想攪事，所以我哋三個嗱嗱聲就跟埋去坐低。
佢條死仔竟然仲撩個「肥妹」…
佢撩撩吓，我見到阿狗佢望去「肥妹」後面好似有D嘢咁，咪跟住望囉，點知…
個「肥妹」原來得個殼，後面完全空心嘅，睇到都覺得驚，仲想嘔添…
「哈哈哈，原來條肥婆唔識中文，死肥婆，樣已經衰，仲食得咁醜樣，前世肯定係隻豬…」
「你，夠，膽，講，多，次！」
「肥妹」好似發嬲呀！死喇！
我驚起嚟，唔知自己噏乜…
「唔係啫，鍾意食嘢嘅女仔，不知幾靚，幾吸引，唔好信佢亂噏啫。」
咁嘅說話都講得出，我自己D毛管都棟起晒。
除咗「大袋」一對感謝嘅眼神之外，有兩對鄙視我嘅眼神望咗過嚟，就連遠處嘅阿妮同阿明公公都笑咗出嚟。
我心諗，死就死啦！
「小姐，你叫咩名呀？點解識講中文嘅？」
「肥妹」佢呆咗咁望住我，死喇死喇，仲要有D傾慕我咁款…
「唔好鍾意我呀，唔好鍾意我呀！」我心裡面就一直係咁講。
「我叫柏木阿芙，你叫我阿芙啦，先生，你把聲好似Leslie呀…」
LESLIE！？唔通係…
「香港嘅Leslie呀！佢係我偶像嚟，因為佢，我先會專登去學廣東話架，我當年都唔知睇過佢幾多場演唱會喇，諗起都好開心，先生，你把聲真係好似佢呀，好溫柔，好舒服。仲記得當年聽到佢話退出樂壇，我幾傷心呀，不過都要支持埋佢個「告別樂壇演唱會」，我就係嗰時變成而家咁架喇…」
「變成而家咁」呢幾個字我已經唔識驚，我反而好驚「你把聲真係好似佢呀，好溫柔，好舒服」…
我真係驚到入心入肺，驚佢真係鍾意我，我就PK喇。
…
神一樣嘅打救嚟喇！
「夠鐘喇，阿芙，小妮，我哋夜D再傾啦，我哋約咗我哋老師出去一吓呀！」阿狗佢出聲，講都未講晒，我哋就一齊急急腳走。
不過離遠聽到阿芙佢…
「咁我食住嘢等你返嚟丫！」
佢講嘅係「你」唔係「你哋」，呢次「大檸樂」喇！
(待續)
下集預告︰
四個女人赤裸裸肉騰騰咁圍住阿倫同「細鬼」