米米蓮妖怪作品 -《旅行‧如此‧難以忘‧記 》(百集長篇): 第033集 ~ 欣︰輝！家姐佢暈咗呀！

第033集 ~ 欣︰輝！家姐佢暈咗呀！

落咗的士，見到身邊有道兩邊開啟嘅大鐵閘門，「嬸嬸」行咗去閘門旁邊，門就突然打開。

打開之後，見到裡面有個中年大嬸喺度，似係等緊「先生」同「嬸嬸」返嚟咁。

「先生」同呢個大嬸講咗兩句就帶住我哋行入去，佢對大嬸講嘢嘅語氣，雖然唔至於話係差，但係，就感覺到有份主僕關係喺度。

裡面有間多層洋房，洋房旁邊有個亭園，一片草地，一張木檯，幾張木櫈咁，望過去另一邊，應該係個車房…





仲有兩架靚車泊咗喺度，估唔到「先生」真係咁有錢，我見到家姐佢個樣都同我一樣，覺得好驚訝。

之後，我哋一齊行咗入屋裡面，屋裡面嘅裝修好整齊，好似示範單位咁，不過擺設同結構睇落去都好得意，一睇就知同佛道二教好有關。

「妹妹，係咪好得意呢？嬸嬸我揀架。」「嬸嬸」講。

「唔怪得知你可以同個咁嘅解籤佬一齊啦，都係呢D品味。」家姐好細聲咁講。

雖然我唔知「先生」同「嬸嬸」聽唔聽到，但係我就好尷尬咁對住佢哋笑咗先，順便講吓其他嘢分散下佢哋注意。





「係呀，係呀，好靚呀。」

之後跟住佢哋行樓梯到上層，行完一層又一層，到咗天台，「先生」就返落樓下攞D嘢，我哋三個就睇住個「捉鬼塔」喺度等。

呢個天台四方四平，除咗得幾盆花，就係一片空地，地下有個好大嘅八卦圖案，頭上就係一片天空，今日嘅天色好似幾好噃，希望一切順利啦。

「呢度一直都係留嚟用嚟消滅鬼怪用架，到而家為止大約都係用咗十次左右。」「嬸嬸」講。

「十次！？」家姐好驚訝咁講。





「冇計啦，我哋唔可以亂咁打到D鬼怪魂飛魄散架，如果唔係壞事做盡嘅惡鬼，打散佢哋嘅魂魄會折福架！所以，我哋都唔係做過好多次咋。」

「嬸嬸」佢梗係以為家姐覺得十次係少，其實我睇家姐咁嘅驚青樣，應該係覺得十次太多就真。

「先生」跟住就上咗嚟，佢帶住一個好大嘅藤喼，一上嚟就打開佢，裡面好多法寶，佢第一時間就抆起一件好多符咒嘅黃色袍…

但係估唔到件袍一D都唔舊，仲好潮吓，佢著係身，又幾有型噃。

之後，先生佢攞咗個「捉鬼塔」放咗喺大八卦圖案中間，喺八個角位又放咗D好似酒樽咁嘅嘢。

「嬸嬸」佢又喺個喼度攞咗D嘢出嚟，首先俾咗兩張滿佈符咒嘅大披肩俾我同家姐，之後再去放置一D物品喺其他地方…

我同家姐就企到定一定咁等，驚阻到佢哋丫嘛。

「先生」之後再將D紅色嘅線拉緊喺八個樽度，再用八塊銅鏡放喺D樽嘅隔離，唔知有咩用呢？





「嬸嬸」返埋我哋度，帶我哋企喺「先生」後面，似係所有嘢都準備好晒喇。

我望一望家姐，估唔到連佢都咁平靜，一聲都冇出過。

「唔記得帶錶，而家幾點呀？」「先生」問。

「十一點五十八分！」「家姐」講。

「好！準備！搭正就嗌啦！」

「先生」佢右手執起一把銅錢劍，擺好功架，個樣好認真，真係成個「林正英」咁，好有男子氣概，我諗「嬸嬸」係鍾意佢呢個樣就真。

之後呢一分鐘多D，大家都好靜，時間好似過都好慢好慢咁，淨係見到家姐佢好認真咁望實隻錶。





「夠鐘！」「家姐」大嗌出嚟。

「先生」即刻就大嗌一聲︰—

「喝！」

再大腳踏落個地度「噗」一聲，天空突然風雲色變，無論顏色同雲層都起咗好大變化…

之後突然一條閃電劈咗落「捉鬼塔」度，「嘭」一聲，成個塔爆開咗。

我見到有幾條紫色嘅煙喺個塔嘅位飛咗出嚟，D紫煙好似想走出個八卦圖案範圍咁…

但係就俾「先生」之前放置好嘅紅線同埋銅鏡造成咗一道紅光牆壁阻止咗。

「你捉咗我係你好彩！你困住我係你法寶厲害！但係你想打散我？冇咁易！哈哈哈哈！」





一把好似有幾個人一齊發出嘅聲音，又尖又有回音，聲音就一直喺堆紫煙度傳出嚟，令到我個心都寒埋，成個身都震晒…

我眼見堆紫煙慢慢凝聚埋一齊，慢慢變咗一個實體形狀出嚟…

「大惡鬼」終於現出佢嘅真身，家姐一見到隻惡鬼嘅真身，連聲都冇出過，就直接被嚇暈咗，跌咗喺地下。

我見到後，雖然冇暈，但係就腳都軟埋，亦都坐埋喺地度，因為…隻「大惡鬼」…根本唔係「先生」之前所講嘅咁，佢個樣實在太恐怖…

(待續)

下集預告︰

今日第一堂，就帶你哋去深入虎穴