米米蓮妖怪作品 -《旅行‧如此‧難以忘‧記 》(百集長篇): 第034集 ~ 輝︰係！知道！不過我呢邊都有D麻煩…
第034集 ~ 輝︰係！知道！不過我呢邊都有D麻煩…
我見到阿明喺一個房度行咗出嚟。
「阿明，你頭先去咗邊呀？」
阿明笑到見牙唔見眼，個樣好似發晒姣咁，肯定係去過睇女嚟啦，好可能仲影過相添，仲可能…
咪住先，佢個樣咁，唔係俾鬼迷呀？不過有「光管陳」，一陣問佢應該就會知。
我見到阿明佢個姣樣，我自己都發埋姣，突然諗起阿欣佢，由尋日到今日，其實我一有時間就會打俾佢…
應該都唔止打過十次喇，但係到而家都未接通過，好似頭先十二點幾，應該係食飯時間啦，冇理由仲訓緊架喎，點知都係打唔通。
以前細個睇D戲，淨係會見到女仔擔心男仔嘅啫，原來…拍緊拖嘅男仔都係會掛住女朋友架喎…
阿明嚟埋我哋四個就返去集合其他同學同老師，睇一睇錶，原來而家都差唔多八點嚧。
行到出大街，我突然覺得周身都唔舒服咁，我好似忘記咗D嘢，我望一望天空，天色都黑齊喇，雖然呢度係繁華鬧市，但係…
我D毛管真係忍唔住棟起晒，呢一吓我驚到好自然咁做起咗護身咒，我發覺…我忘記咗「鬼頭」…
好在，有驚無險，我望來望去都見唔到有「佢」嘅踪影…
「喂，咩事呀？又有鬼呀？」
「大袋」好驚青咁，佢都做埋護身咒。
「阿輝，係咪見到有嘢呀？如果唔係，唔使咁神經質噃，我哋本來就有校章喺身，應該夠力保護我哋，一陣又會見到「光管陳」，有佢喺度，應該咩都唔怕啦。」
「喪狗」相反就好冷靜，而阿明個死傻佬就仲發緊姣，個死人樣仲好似中咗邪咁，一陣搵個靚位一巴車埋佢塊死人面度，等佢醒吓先。
「喂，你哋咁遲架？」Stephan行緊埋我哋度講。
跟住佢埋嚟嘅有七條友，光管陳﹑校長﹑阿張﹑阿龍﹑大Lin雄﹑孖腸同大舊。
「大家分咗三隊各自搵食，我哋而家12個人，我哋去食日本嘢啦。」「光管陳」行到埋嚟講。
「嚟日本梗係食日本嘢啦，唔通...我意思係嚟日本冇理由唔食日本嘢家嘛。」
「大袋」又想串嘴，好在佢兜得夠快，唔係又俾人串返轉頭，我見到最少有七八個人準備緊咁做，而我都係其中一個。
我哋喺商場搵咗間食壽司嘅舖坐低咗，分開咗三張細檯坐，一坐低，「大Lin雄」條友好似前世未食過壽司咁，一條友點晒我哋十二條友嘅嘢食…
不過校長話由佢嗌喎，見佢咁順攤，今日就唔叫佢「淫蟲」，一日咁多啦。
不過班友仔，原來同「大Lin雄」一樣，梗係好肚餓喇，一陣就清晒正常係三十人份量嘅壽司…
個壽司舖老闆唔知見我哋係遊客定係嗌得多嘢呢，佢請咗我哋食每人一件唔知咩魚造嘅壽司。
我一啖就將件壽司咬咗入口，但係即刻就LUR返出嚟，嘩，真係腥到我丫…
「光管陳」都LUR咗出嚟，仲叫我哋走先，佢話有唔妥，佢會處理…
我哋都走晒出門口，不過我就一前望返轉頭想知咩事，我有個咁嘅諗法，唔通...舊壽司係...人肉造嘅？
真係諗起都嘔心，不過「光管陳」好快就出咗返嚟，仲好尷尬咁傻笑緊，佢冇同我哋講發生咩事…
不過「喪狗」條衰仔就應該係同我諗法一樣，佢咋咋啼咁走返轉頭問個老闆發生咩事。
我哋成班人一路行住先，阿狗佢一陣之後就追返前嚟，陰陰嘴笑細細聲咁同我哋講︰—
「你哋知唔知「光管陳」幾(火羅)呀？佢問人哋點解舊壽司咁腥，人哋話係正常嘅，佢之後同人講「如果你唔講真話，我就對你唔客氣」呀，哈哈哈，笑死我，佢之後俾人攀走咗。」
雖然都幾好笑，不過舊壽司腥到咁，講真，我都想質問個老闆係咩魚嚟…
之後，我哋成班人一齊返酒店，「光管陳」話其他同學會跟「鐵拳」﹑「黃仔」同王Sir自己返酒店。
行行吓，「光管陳」走咗埋我哋四個度。
「你哋幾個一陣返酒店，沖完涼就嚟我房搵我，我帶你哋去一個地方，今日第一堂，就帶你哋去深入虎穴。」佢細細聲咁講。
「深入虎穴」呢四個字一出，真係唔到你唔驚，佢咁講，即係肯定又有鬼見啦，我真係要做好心理準備先。
………
返到酒店，「喪狗」個衰仔又去繼續溝佢隻「狐狸」，不過講真，隻「狐狸」又幾靚女嘅，個樣又純，仲有少少書卷氣咁，佢哋都幾襯丫。
見到佢哋咁，我即刻就諗起阿欣，再試吓打俾佢先，點知都係唔通。
之後，我直接就搭(車立)返咗房沖涼，「阿倫」佢就仲未返嚟…
沖完涼，我都好心急想知深入咩「虎穴」，即刻就去搵埋阿明…
我去到佢房，估唔到佢都沖完涼喇，我坐咗係「細鬼」張床度等佢執埋少少嘢就行，「細鬼」佢就仲未返，我見到度張「黑色符」放咗喺阿明床面。
「阿明，你唔驚呢道符係害你喇咩？」
「如果係害到我，早就死咗啦，何況「光管陳」都睇過話冇事，我咪信佢囉。」
「係呢？你今日，其實去咗邊呀？我講頭先機舖嗰度呀。」
佢都未答，突然就…
「乓…乓…乓…」
一陣敲玻璃嘅聲喺窗口傳嚟，聲音一直一吓一吓咁響，我同阿明你眼望我眼咁，呢到係十二樓，點解會有敲玻璃嘅聲喺窗出面嘅？
我滿腦疑問，我用手勢叫阿明準備同小心，我自己就慢慢慢慢咁行過去準備打開個窗簾…
行到埋去，聲音仲未停止，我深呼吸一啖，就一口氣打開道窗簾，我見到…
「鬼頭」呀！佢終於搵到嚟，而家佢隔住玻璃望住我…
(待續)
下集預告︰
俗世裡~ 遇到妳~ 我變得那樣奇~