米米蓮妖怪作品 -《旅行‧如此‧難以忘‧記 》(百集長篇): 第032集 ~ 明︰去咗「桂家村」丫嘛。
第032集 ~ 明︰去咗「桂家村」丫嘛。
大家好！又係我阿明呀！條「光管陳」到而家都仲講緊佢自己D威水史，我真係頂佢唔順呀！
不過我只係喺心講，唔敢喺口講，你估我唔驚佢呢幾日唔照住我咩？
其實除左講嗰五個屈機高手精彩D新鮮D之外，其他廢話真係都幾悶，一時講吓佢師父幾勁幾勁，一時講吓佢點嚟香港呀咁，真係聽到我想死。
好在，我一早練成咗「樣不對心」神功，我個款就好似好專心咁聽佢講緊嘢，但係其實…心裡面係諗緊第二D嘢。
識諗嘅，梗係諗女啦，何況我仲有小倩佢咁…完美嘅幻想對象。唔好褻瀆我女神呀，諗鹹嘢我唔會諗佢架，諗吓同佢拍拖係幾咁甜蜜好過啦。
「喂，傻佬明，走喇！睇死你唔係專心聽架啦！」阿輝串我。
咁都俾佢發現到，不枉我識佢咁耐。之後，我哋就一齊起行返去集合點。
行行吓，阿輝佢竟然叫「光管陳」收佢為徒喎，我真係呆咗，「光管陳」佢又唔知做乜鬼嘢咁異常地順攤，竟然應承咗，我更加冇嗲…
連我學咗十幾年嘅「打蛇隨棍上」都出唔切，竟然俾「喪狗」一招「食人口水尾」搶咗可以跟佢學法…
我除咗呻笨，唯有嚟招「落地嗱沙」啦，將視線推去「大袋」條傻佬度先。
「哈哈哈，俾人知道晒D衰嘢。」我對住「大袋」講。
「哈哈哈，你自己咪一樣，哈哈哈。」「喪狗」望住我講。
呼~總算出招成功。
………
返到去廟門口集合，原來都成三點幾嚧。
之後「鐵拳」話返尋晚機舖嗰頭行吓，順便食埋晚飯，我真係開心到由個心度笑出嚟，因為可以直接去搵小倩喇。
一去到嗰頭，我認得呢頭D路，就一支箭咁去咗搵小倩。
行到機舖門口，我見到有個房仔開咗門，出面門牌唔知寫乜，但係我估呢個房係員工更衣室，裡面好似有D聲音，咪行埋去睇吓聽吓囉，
咦！係小倩呀！今日佢著咗件好清純嘅白色連身短裙，真係好可愛，好迷人呀。但係…
點解…有個醜樣女人捉住佢隻手嘅？我睇到咁，即刻就無名火起。
「喂！你做咩捉住我朋友呀？」我好大聲咁喝個醜樣婆。
不過佢好似唔知我講乜咁，又冇俾我嚇到，反而對住我淫笑，好似對我有興趣咁，睇到佢個淫樣，真係有D驚。
我好想淆底，但係小倩喺度，我話俾自己聽唔可以淆，最少…個樣唔可以淆。
「佢唔識聽廣東話。」小倩好溫柔咁講。
「喔，係喎，日本人呀可？唔好意思呀。」我對住醜樣婆咁講。
「咁…小倩你…唔知…可唔可以…同我…一齊行吓呢？」我怕醜到紅晒塊面咁問小倩。
「當然可以，你合埋眼先，我帶你去一個地方，不過未到之前，你唔准開眼，可以嗎？」小倩佢側側頭咁笑住同我講。
佢把冇尾音嘅廣東話聲真係好好聽，我二話不說就合埋咗眼。
「當然可以，只要係你講，我一定會做。」
佢用手唵住我對合埋咗嘅眼，佢隻手好冰凍，凍到好似雪條咁，但係…唔知點解…我個身就㷫烚烚咁…
唔知係咪因為佢係第一個女仔，用佢嘅肌膚掂我呢？我真係好想用我嘅身體去溫暖吓佢嘅身體。
「我有超能力，你信唔信？」小倩問我。
「信，只要係你講，我一定信。」我認真得嚟笑住咁答。
「呼嗚~」突然好大風，我個人就好似飛起咗，穿梭緊條時光隧道咁，D風一直喺度吹，我耳邊就泛起~
一首咁溫柔嘅男人歌，
(忘記了最近那次笑聲 從不知天光天黑的道理)
歌詞雖然未必係最完美咁反映我而家嘅感覺，
(回憶中只得漆黑裡伸手觸摸不到的神秘)
但係我合埋雙眼，感覺佢隻手嘅時候，我感覺到嘅係…幸福，
(唯有你叫我再次記起 能緊緊相擁一起怎樣美)
一種好似同小倩佢兩個一齊飛喺空中嘅感覺，
(毋須於天空中展翅都可懂的怎麼遠飛)
雖然可能我哋下一刻就要著地，
(心早半死 差點已死 只因你這一雙手觸摸到運氣)
但係我真係好想好想把握住呢少少嘅時間，
(我在何地 縱是神秘 只因你這個世界對我未捨棄)
就准許我再用心去感受一吓，呢份兩個人嘅幸福。
(歲月忘記 我未忘記 世上曾有過你我到處亦明媚 多得了你)
「到咗喇，你跟我嚟丫。」小倩放開手嗰吓，啱啱成首歌唱完。
見到個死人醜樣婆仲係捉住小倩隻手，我真係想打鑊佢，不過又驚佢係小倩朋友，所以唔敢輕舉莽動。
但係…呢度…係邊度嚟架？同遊戲機城完全兩個世界，呢度係一條好古舊嘅日式大街，兩邊好多舊式嘅屋，街口有個大木牌，寫住「桂家村」。
「呢度係桂家村呀？」我問。
「咩桂家村呀？鬼怪村呀！」醜樣婆竟然講廣東話？我嚇呆咗。
小倩佢應該係見到我個樣滿面疑問咁，所以解釋俾我聽。
「呢度好特別架，所有語言都會歸一，因為方便管理丫嘛。」
嘩，真係神奇，連小倩講嘢都有尾音，不過究竟方便邊個管理呢？
「阿明，我哋過去嗰邊丫，我介紹兩個朋友你識。」小倩講。
呢度都係沙地，條街度有唔少人似係喺度工作緊，行到一間舊屋門口，我見到一個老婆婆好似企唔穩咁，即將就會跌低…
我即刻就飛埋去墊佢底…
「哎呀~」
(待續)
下集預告︰
你想打散我？冇咁易！
註腳︰上面首歌係梁朝偉嘅《偷偷愛你》