米米蓮妖怪作品 -《旅行‧如此‧難以忘‧記 》(百集長篇): 第031集 ~ 輝︰點解個石像唔見咗？阿明又喺呢度出現嘅？

第031集 ~ 輝︰點解個石像唔見咗？阿明又喺呢度出現嘅？

見到阿明佢哋三個喺七福神廟門口抖晒大氣咁，我就忍唔住行咗埋去搵佢哋問吓咩事，但係估唔到連「光管陳」都跟埋嚟噃。

寒暄幾句之後，「光管陳」佢仲帶咗我哋四個去間天婦羅食店度食嘢，呢間食店門面同內籠都好日本式…

食物名都係寫晒喺掛喺牆度嘅木牌上面，感覺幾舒服，唔似係專門服務遊客嘅舖頭，似係本地人食開嘅地道食店。

我坐低飲咗啖水就問返佢哋頭先攪乜鬼，原來佢哋見到隻白面鬼，可能因為我已經習慣咗見到呢D嘢啦…





佢哋講出嚟，我又唔覺得驚噃，反而覺得幾得意，如果我頭先跟埋佢哋一齊經歷吓就好喇。

日本人D服務真係唔到你唔服，個店員竟然跪喺度幫我哋點餐，喺香港，真係冇可能見到，畢竟男兒膝下有黃金丫嘛…

不過俾著係我，都唔會做，我指咗餐牌上面一個蝦天婦羅飯，佢哋四個都各自點咗嘢食。

吹咗一陣水，D嘢食就嚟喇，真係快手，之後食食吓，阿狗佢問「光管陳」D威水史，我就邊食邊好用心咁聽…

有D我都聽過，但係依然覺得好精彩，真係有D想自己係當中其中一個高手，不過聽佢講，「南龍」好似唔係好掂咁。





聽聽吓，「大袋」都托住個頭訓咗嚧。「喪狗」就擘大個口得個窿，但係我睇佢個樣，佢似係記緊D嘢咁…

讀書人果然係變態D，聽咪聽囉，仲要記埋都有嘅，黐線架。

阿明佢睇落去好似好用心聽咁，不過我識佢咁耐，唔好話我睇死佢丫，肯定又係諗緊第二D嘢啦。

講到差唔多到咗約定嘅集合時間，「光管陳」就埋咗單，之後我哋就一齊行返去集合地點…

其實頭先聽完「光管陳」佢講佢D威水史，真係有少少想拜佢為師，好啦，就拜佢為師啦。





「陳Sir，其實你可唔可以收我為徒呀？」

「你咪我學生囉！丫，你講道術！？」「光管陳」碌大對眼望住我。

我及頭回應。

「你呀？英文成績都唔錯，真係有心學先好噃，試教你幾日，睇吓你有冇悟性先啦，今晚行程完晒，你就嚟我房搵我啦。」

「好呀，一定嚟。」我見佢咁順攤，即刻就應佢啦。

「陳Sir，不如收埋我丫。」阿狗都想搭單。

「皮你就有得收。」「大袋」唔知係唔抵得定係純粹想串吓阿狗呢？

「光管陳」笑住咁搭阿狗膊頭。





「你當然冇問題啦，你成績咁好，頭先我都講啦，你一定好快上手。不過有D同學上堂又唔聽書，成日掛住喺後排用計數機賭錢，一係就睇漫畫，呢D就唔好喇。」

「頂，好巴閉咩。」「大袋」被串，好慘。

「哈哈哈，俾人知道晒D衰嘢。」阿明都出埋聲。

「真係「八兩金話人醜樣」。」我串佢。

「哈哈哈，你自己咪一樣，哈哈哈。」阿狗解畫。

之後返到七福神廟集合，我仲襯臨走買咗D飾品返去做手信。

唔經唔覺都成三點幾嚧，跟住大家一齊返咗去尋晚食晚飯嗰頭，嚟到呢邊，我見到阿明佢好似好開心咁，唔知咩事呢？





我哋之後可以喺呢頭四圍行吓，阿明佢自己行開咗，我就同阿狗同「大袋」三條友一齊行。

呢邊都幾多波子機舖頭，不過好似唔入得，門口有個牌，咩15交叉，18又交叉，連21都交叉，都唔知入唔入得…

算喇，費事煩，唔入去喇。之後咪三條友行去睇吓日本D電器囉，呢度咩電話都有，不過聽講唔啱香港用，所以我都冇買…

D咩屁股電話呀，香蕉電話呀，女人型電話呀咁，真係呢度D人先會諗到D咁怪嘅嘢去賣，咁大舊都唔知點用。

呢度又多日本明星廣告海報，大到成幢樓咁大，中山美穗﹑福山雅冶，二佬呀！連金城武都有，係威噃。

但係點解冇我最鍾意既松隆子架？唔通佢喺呢邊唔係咁紅嘅？松隆子佢好似阿欣架，應該話阿欣似佢先啱。

我自己就冇買嘢，不過「大袋」同「喪狗」就好似癲咗咁，每人買咗兩大袋嘢。

買完嘢仲未夠鐘，咪諗住返去尋日間「理嘉城」打陣機囉，死喇，唔記得咗，嗰度有個好恐怖嘅石像架喎。





行到入去，我見到張電椅同個恐怖石像唔見咗。

「喂，阿狗，你識日文，幫我問問D職員點解唔見咗張電椅丫。」

「OK。」

「喪狗」同個職員溝通完就同返我講︰—

「佢話尋晚唔知點解好奇怪咁唔見咗個石像喎，到咗今朝無端端見返係雜物房度，而家未拎返出嚟咋喎。」

「應該唔拎佢都會自己行返出嚟。」

「唔係咁恐怖呀？」





「大袋」好似俾我講嘅嘢嚇親。之後我哋行咗去打咗陣機。

「差唔多食飯喇喎。」阿狗講。

「咦，傻佬明喺度嘅？」「大袋」另轉頭見到阿明就講。

我都見到阿明喺一個房度行咗出嚟。

「阿明，你頭先去咗邊呀？」

阿明笑到見牙唔見眼咁。

「冇，咪喺度四圍玩囉，你哋又去咗邊度逛呀？」

(待續)

下集預告︷

咩桂家村呀？鬼怪村呀！