米米蓮妖怪作品 -《旅行‧如此‧難以忘‧記 》(百集長篇): 第030集 ~ 欣︰先生，嬸嬸，家姐同我出發去打「大惡鬼」喇！

第030集 ~ 欣︰先生，嬸嬸，家姐同我出發去打「大惡鬼」喇！

好似好耐冇講過我呢邊喇，唔知大家仲記唔記得我呢？

我之前講到解籤先生「龍居士」佢言語間終於應承咗去日本救輝輝，不過要先消滅隻「大惡鬼」。

我尋晚成晚都揸住部電話等輝輝佢打嚟，點知自己衰囉，搭車返屋企途中，因為真係太攰喇，所以不知不覺咁就訓著咗嚧。

起咗身先知阿輝佢原來都幾乖，有打過嚟，算佢啦，雖然打得唔夠多呀，得嗰兩次咋。





我電話又冇晒電喎，想打返轉頭都唔得，都咁夜囉，都係聽日等「先生」收拾埋隻「大惡鬼」先打俾佢啦。

………

返到屋企，我好快就上咗床訓，但係成晚輾轉反側咁，一直都訓唔到，咪攞咗輝輝之前同我去香港公園影嘅相睇吓囉，點知一睇…

我又唔爭氣喇，又喊咗出嚟，點解要蝦輝輝佢噃，佢又冇做過咩壞事，我真係好擔心呀，希望「先生」佢嚟切救輝輝啦。

喊喊吓，原來我攬住本相簿就訓咗，一訓醒就成十點幾嚧，我即刻就叫醒埋家姐，叫佢陪去搵「先生」同「嬸嬸」。





好似遲咗少少，但係一行到去佢哋舖頭門口，就見到佢哋。

「幾驚你哋唔嚟呀！OK，搭的士。」「先生」見到我哋就講。

佢哋預約架的士，一齊就出發喇。

「嬸嬸」同我哋兩姊妹坐後排，「先生」佢一上車就係前面訓咗，唔知係咪同我一樣尋晚擔心到冇覺好訓呢？

我坐坐吓車，突然望到「先生」背脊有四條爪痕，入晒肉咁，好恐怖呀！





「佢尋日冇同你哋講咩？嗰四條爪痕咪當時捉隻「大惡鬼」時，隻惡鬼爪佢架囉。」「嬸嬸」見到我望住「先生」背脊就咁講。

「唔係呀！？尋日佢明明講到好易捉架喎，點解而家又話有躂咁大嘅傷痕架？究竟安唔安全架？」家姐即刻就搶住問。

「傻妹，你唔使驚，隻嘢整傷到阿龍係因為阿龍想保住個女仔條命先俾佢整親啫。佢唔頂嗰吓，個女仔就死咗喇。不過冇嘢嘅，新傷嚟，遲D就冇架喇。」

「你之前又話佢唔係叫阿龍嘅，點解又成日叫佢阿龍呀？」

「喔，我話佢唔係姓龍啫，佢全名叫白百龍，我咪叫佢阿龍囉，佢係龍系術士唯一傳人。」

「其實點解要我哋兩姊妹都嚟埋呀？我哋跟埋嚟唔係更阻手阻腳咩？」我問。

「傻啦，其實有原因架，你哋尋日有近過被隻「大惡鬼」邪氣入侵嘅我，邪氣如果去咗少少喺你哋度，即使係少少，少到我哋一時間搵唔到，力量大嘅鬼怪，有可能借此瞬間轉移形神去你哋嗰度，到時嘅後果就不堪設想喇。」

「原來係咁，我仲以為佢…」家姐講。





「咩呀？」我問。

「冇嘢，咁其實我哋而家去邊啫？」

「龍居士屋企個天台呀。」司機插把口埋嚟。

「你又知？」

「我當然知啦，我曾經親眼睇住「龍居士」佢收伏過鬼怪架。」

「收伏鬼怪？」我問。

「係呀，當年我老婆同時俾隻鬼同隻妖上身，就係龍居士救返佢架喇，而家鬼打都冇咁精神，依家呢個時間，肯定又同班八婆打緊麻雀啦。」





「「先生」佢點收佢哋架？」

「先生！？你叫得「龍居士」佢咁得意嘅，講到佢好似做老師嘅咁。講起收嗰兩隻嘢，真係又精彩，又攪笑，好似武俠劇咁，佢揸住把銅錢劍，將之前貼喺我 老婆額頭嘅符抆走，一下咩咩咩「紅龍吐炎」咁，噴咗吓火出嚟，其中一隻就著晒火咁，叫聲又淒厲噃，嗰時真係嚇死我，之後佢再拍一吓我老婆額頭，另一隻嘢又出埋嚟，呢吓仲型，我仲記得嗰招叫「紫龍神劍」，一劍刺死隻鬼。諗返起都覺得正到爆呀，仲好睇過戲。」

「咩龍吐咩…紫龍神劍嗰D係咩嚟架？」家姐佢問「嬸嬸」。

「古代中國九轉神龍伏魔斬妖治邪捉鬼強身手印心法秘訣！」「嬸嬸」好似好自豪咁講。

「妖，仲用阿爺阿爸佢哋嗰套，摩登D啦老婆，打妖魔咪叫「九龍伏魔訣」，打鬼怪咪叫「九龍捉鬼訣」囉，咁長鬼記得咩。」

原來「先生」佢訓醒咗，之後我哋四個同司機講聲再見就入咗「先生」間大屋，準備打隻「大惡鬼」。

(待續)

下集預告︰





…唔知點解好奇怪咁唔見咗個石像喎，到咗今朝無端端見返係雜物房度…