米米蓮妖怪作品 -《旅行‧如此‧難以忘‧記 》(百集長篇): 第029集 ~ 明︰聽吓「光管陳」講故仔先。

第029集 ~ 明︰聽吓「光管陳」講故仔先。

我睇住「喪狗」火佢好英咁慢慢行埋「大袋」同個女學生度，我揸緊部相機，等佢準備好。

當然，佢哋離我咁遠，我冇可能聽到「喪狗」佢講咩，但係佢之後講返俾我聽佢當時係咁講 -

「「大袋」，記唔記「光管陳」教過我哋咩？」「喪狗」細細聲問「大袋」。

「英文？」「大袋」回應。





「尋日呀…呢個呢…」「喪狗」單手做咗個動作再講。

「喔，手印。」「大袋」講。

「算喇，唔想同你講嘢喇，博佢唔識聽中文啦，阿明數三你就做隱身咒啦，阿明你數啦！」「喪狗」講。

我完全明白「喪狗」當時嘅心情，唔想「大袋」講出口嘅嘢佢全部都講晒出嚟…

好在係「喪狗」佢行埋去，如果係我，我肯定幫埋個「女學生」手攪掂佢。





「喔，準備…」我揸實部相機，好緊張咁數︰—

「一，二…三！」

「咔嚓」

我眼見「喪狗」佢做咗護身咒撞埋個「女學生」度。

同一時間，我即刻就衝埋去「大袋」度。





「隱身咒呀！」

「大袋」雖然呆咗一陣，但係總算最後都做好隱身咒，「喪狗」身手果然唔錯，一撞開個「女學生」就做好隱身咒。

「走！」「喪狗」大叫。

嘩！「喪狗」真係走得好Q快，一陣就彈離我同「大袋」，間中另返轉頭望吓我哋，「大袋」雖然同我跑緊，但係就仲戇吓戇吓咁。

跑到返七福神廟門口，我哋踎晒喺地下抖大氣，因為我哋都係做住隠身咒走嘅，個「女學生」應該冇可能跟到我哋。

「喂，頭先發生咩事啫？」「大袋」問。

「冇事呀！唔抵得你搵到靚女影相喳嘛。」「喪狗」答。

「哈哈，梗係唔係啦。頭先個女仔唔係人嚟架，喺相機鏡頭見到嘅佢，個頭係爆開咗，流到成面血，成身爛身爛世咁，佢仲舔吓舔吓你塊面添。」我講。





「唔係吓嘛！？」「大袋」講。

「梗係唔係啦，條友講大話嚇你喳嘛，其實冇咩嘢，個女學生塊面係冇眼耳口鼻啫。」「喪狗」再講。

「吓？好似都冇咩分別，都唔知你哋邊個先係講真話。」「大袋」講。

「哈哈，咁你覺得邊個恐怖D丫？」我講。

「喂，你哋喺度攪咩呀？」阿輝走咗過嚟我哋身邊問。

「喂，肚唔肚餓呀？一齊去食天婦羅。」「光管陳」都行咗埋嚟講。

………





之後，我哋五個人行咗去搵咗間天婦羅食店坐低咗，好快就點好晒嘢食。

「你哋頭先攪乜啫？」阿輝問。

「冇，不過喺隔離間細廟見到隻鬼啫，嚇死我哋。」我講。

「咩樣架？講嚟聽吓。」「光管陳」問。

「冇樣架，一塊白面。」「喪狗」講。

「原來係白面…」「大袋」講。

「喔…呢D日本好普遍架，因為日本好多食面鬼。」「光管陳」講。

「我都係唔食麵喇，幫我轉飯丫，唔該。」我講。





天婦羅喺香港唔係咁普遍，加上我哋呢D窮學生，更加冇機會接觸到，所以我都好想試試天婦羅係點樣嘅。

不過原來我發覺我唔係咁鍾意食，因為我係唔鍾意油炸嘢食架。

「陳Sir，不如你教我哋D勁D嘅招數丫。」「喪狗」講。

「你…我就冇咩所謂，你學嘢快，肯定好易上手，但係佢哋三個應該有排教，得嗰咁少時間教嚟都唗氣，用手印夠架喇，用得好，兩個手印交替咁用，其實好勁。」「光管陳」食住麵講。

「使唔使咁曬我哋呀？」「大袋」細細聲講。

「咁不如你講吓你D威水史丫。」「喪狗」講。

「威水又唔講得，不過都有D經驗分享吓嘅，見你哋都見過我打妖怪，就講你哋聽啦。」「光管陳」講。





「好呀，好呀。」我同阿輝一齊講。

「你哋可能有D人都聽過少少架喇，今日就講多D啦。最出名嘅術士有五個，東虫西聖，南龍北鳳，中神通，當年我十歲未夠，我跟住我師父「北鳳」，「火鳳仙人」去咗同埋其他四絕一齊同隻彊屍王打過…」「光管陳」食完麵講。

「彊屍王？佢一個打你哋五個？」「大袋」問。

「你咪炸亂哥柄啦，頭先講到邊話？你哋唔使講，我記得，彊屍王好多手下架，事實上係五個打成萬隻鬼怪，當時，我都有份打幾隻細嘢。「東虫」，佢叫蟲，係因為佢叫虫節大師，好似係日本人嚟，係個大肥佬，佢好勁架，用自然力量嘅，當時佢成手雷電咁，左一吓右一吓就殺咗好多鬼怪。「西聖」係個傳教士嚟，外國人， 揸住本聖經，口噏噏咁，就有一堆聖光，一條條咁會去自動打怪。「南龍」，香港人，而家都仲喺香港，呢個唔講，最叻咪玩道具囉。「中神通」係個會通神嘅人， 佢成個「馬勒當拿」咁嘅樣架，我估係美洲人嚟，成個超人咁，一吓一隻怪，彊屍王都係佢收伏嘅。仲有，當然係我師父「火鳳仙人」啦，一個字，勁，最叻係請神上身，火鳳上身呀咁…」「光管陳」停唔到口咁講。

得我同阿輝係用心聽，「大袋」同「喪狗」都已經擘大個口得個窿嚧…

(待續)

下集預告︰

「紫龍神劍」，一劍刺死隻鬼