米米蓮妖怪作品 -《旅行‧如此‧難以忘‧記 》(百集長篇): 第028集 ~ 輝︰唉，又亂嚟喇，我都係跟「光管陳」去化玉好過。

第028集 ~ 輝︰唉，又亂嚟喇，我都係跟「光管陳」去化玉好過。

而家，呢個滿頭白髮嘅老女人喺正我面前，同我面對住面…

我同佢大約只有一隻手掌嘅距離，好在，我有做定護身咒，唔係嘅話，後果真係不堪設想。

不過我真係好後悔，點解我唔早D做隱身咒呢？個老妖怪個樣真係好肉酸，好恐怖…

佢有一對差D就凸到跌出嚟嘅眼，仲佈滿青筋嘅，全塊面都係白色，但係唔係蒼白嘅白，係奶白嘅白，因為…





一直都有D好似奶咁嘅嘢，喺佢個頭頂流緊落嚟，經過一個又一個好似毛孔咁嘅嘢…

唔啱，根本唔係毛孔，根本就係火山窿，仲成塊面都係…

D窿裡面仲有D嘢伸吓出嚟，縮吓返入去咁，似係喺度舔緊D奶…

真係好核突，好嘔心。呢一刻，我真係覺得死咗去仲好過。

但係我一諗到我屋企人同阿欣，力量就返嚟喇，我知道我唔可以死，我要生存，我要生存，我要生存！





我吞咗一啖口水，抖住大氣咁，做到個護身咒實一實都冇咁實，額頭都篤到損晒，之後慢慢向後行。

「喂，阿輝，做咩呀？」阿明問我。

講真我邊得閒答佢丫，有時間我都走佬先啦。

「喂，阿輝，你做咩呀？」阿明再問。

之後佢用幅「裸男畫」喺我前面揚吓揚吓，見到佢咁做，我而家真係唔想走佬，反而想打鑊佢多D。





點知個老妖怪突然「依丫」一聲，彈開九丈遠，佢嘅動態完全唔似係怕咗幅畫，反而係似怕醜多D…

佢喺度背住我，唵住塊面扭吓扭吓咁，又係一個嘔心嘅畫面。

我襯時機，跟住大隊，行遠咗D，我見佢一直喺度扭，應該唔會再跟嚟，終於可以嘔返啖烏氣出嚟，再搭一搭阿明膊頭講︰—

「唔該呀，好在有你咋，仲有你幅畫。」

之後，我以防萬一，都係做返陣隱身咒先。

………

成班老師同學都好似正常遊客咁，慢慢四圍睇吓嘢，大家慢慢就行到去七福神廟。

到咗門口，我哋約定一陣走嗰陣喺呢度集合，大家而家就各行各嘅。





呢度風景幾好，正經嘅有日本學生，唔正經嘅有香港學生，即係班死仔呀。

我同阿明佢哋，加埋總共六條友，一齊行，行咗冇幾耐，就撞返「光管陳」。

「光管陳」佢竟然問阿明做咩揸住幅畫。

「唔係話可以做護身符咩？」我即刻就搶住咁問。

佢之後答得怪怪地咁，阿狗問佢關於玉佩嘅事，佢又驚死嚇親阿華同達明咁，亂噏就算。

佢行前兩步就另返轉頭提我哋「廟唔好亂入，神唔好亂拜，唔好攪到人哋D神」。

仲問我哋跟唔跟佢。我當然即刻及頭啦，不過「大袋」﹑「喪狗」同阿明都冇跟嚟，希望佢哋唔好亂嚟，聽「光管陳」話啦。





「光管陳」一行到入廟，就叫我哋三個回避吓先，一陣行嚟搵我哋喎。

估唔到阿華同達明咁聽話，真係行開，不過方唔係又見到靚女咩。我反而唔聽話，匿埋咗一邊睇吓「光管陳」佢點樣先可以化咗嗰塊玉。

呢邊呢個神唔係好多人拜，「光管陳」佢等咗一陣，之後攞咗塊玉出嚟，向住個神，拜咗兩拜。

「出嚟啦死仔，我係想佢哋兩個行開吓啫，你之前咩都知道晒啦，使鬼匿埋咩。」

「光管陳」佢都好明顯應該係同我講啦，所以我好尷尬咁行咗出去，企咗喺佢側邊。

「你呀，咁鬼黑仔，呢幾日有排你見鬼呀，拜吓福神，求吓福啦，呢個神你拜得嘅。」

「哦！」

「你要記好我教你嘅嘢，一陣俾多個校章你，記得跟到個身實一實。仲有，聽日都會去參觀神廟，神廟你拜得，不過聽日嗰度附近有間鬼廟，唔知點解嗰度D日本人好鍾意拜架，你千祈千祈唔好去，連行近都唔好，記住呀。你做咩鬼嘢整到個額頭花晒呀？」





佢啱啱先講完嘢，一見冇人，就一吓打落去塊玉度…

「呯~！」一聲，成個廟震晒咁，仲大聲過槍聲，嚇到我呆咗。

我見到成塊玉變咗做粉末，但係D粉末唔係白色，又唔係玉嘅色，係又黑又紅又紫咁，睇落去完全唔覺得原本係一塊白玉…

之後佢攞咗個利是封出嚟，掃咗D粉末落去。

「一陣燒咗佢就大功告成。」

「你咁大聲打爆塊玉，你唔驚嚇親人哋咩？」

「咩人哋啫，得你聽到係咁大聲架咋，其他人聽到嘅係普通拍檯聲，仲要唔會好大聲。」





「點解嘅？」

「同撞鬼一樣道理，你睇到人哋睇唔到，所以你聽到嘅嘢同人哋聽到嘅都唔同。」

「係因為我黑仔咁簡單？定係有冇其他原因架？」

「光管陳」佢諗咗一諗。

「黑仔，應該就係咁簡單。」佢再咁講。

佢搭住我膊頭去搵返阿華同達明，見到佢哋啱啱食完幾個學生妹嘅「檸檬」。

之後，我哋四個人行咗出攤位睇吓有D咩手信好買。

我揀揀吓手信同精品，望返出去個大門口度，見到阿明佢哋三個踎咗喺地，抖晒大氣咁傻笑…

肯定係頭先又唔知遇到D咩怪事啦，不過佢哋仲可以喺度傻笑，即係應該安全冇事啦…

咁我都戥佢哋開心，一陣都係同佢哋一齊行，一齊去食晏先，順便可以問吓佢哋發生過咩事丫嘛。

(待續)

下集預告︰

…四絕一齊同隻彊屍王打過…