米米蓮妖怪作品 -《旅行‧如此‧難以忘‧記 》(百集長篇): 第009集 ~ 欣︰解籤先生去咗邊呀？我有事搵你呀。
第009集 ~ 欣︰解籤先生去咗邊呀？我有事搵你呀。
(鏡頭一轉，轉返去阿欣度)
「先生」佢解完阿輝嘅籤文之後，我好驚，驚到唔知點算，真係好擔心阿輝。
「咁「龍居士」，你有冇D咩法寶可以幫到我囡囡個男朋友仔化解呢？」媽咪出聲幫我問。
「有，大慈大悲如來佛祖觀世音菩薩無邊法力捉邪捉妖捉鬼神燈玲瓏寶塔，原價88,888，見同你識咗咁耐，俾個折你，38,888就得喇。」
眼前呈現曙光，我即刻咁問︰—
「係咪真係可以幫到阿輝架？」
「傻架，細妹，咁貴你都想買？個阿輝值唔值得你買D咁貴嘅嘢去保佢呀？」家姐想拉我走。
「媽咪，可唔可以借住D錢俾我先呀？我真係好擔心阿輝呀！」我望住媽咪，哀求媽咪。
「傻妹呀，個阿輝真係唔值得你對佢咁好架？大拿拿30,000幾蚊呀。」家姐勸我。
「龍居士，可唔可以平DD呀？」媽咪見我喊，就幫我問「先生」。
「先生」喺後面攞咗個「塔」出嚟。
「好啦，好啦，呢個我私伙嘢，得返一個，方便攜帶版，8,888，已經打折，唔好講價喇。」
「龍居士，多謝你，好！就呢個啦！點用架？」媽咪都顯得好開心。
「側邊有個制，適當距離噤呢個制就係收鬼，下面有個制，有保險制嘅，小心D，係放鬼用嘅。」
家姐嬲爆爆咁拉咗我走，媽咪就幫我俾錢買咗個「方便攜帶版」。
之後媽咪攞住個「塔」行返埋我哋度…
「媽咪呀！做咩買呀？細妹傻，你又跟佢傻，嗰個「解籤佬」擺明呃人，你做咩信佢呀？仲要買嚟保嗰個阿輝。」家姐問。
媽咪摸吓摸吓家姐個頭講︰—
「傻囡，一來我係擔心你哋，保護阿輝唔係我要做嘅嘢，我係要保護你哋，唔好話8,888，如果係保護到你哋，再多我都俾， 二來個「龍居士」，我就唔知佢有冇呃人，不過佢十幾年前就係救咗你哋同你阿媽我嘅救命恩人，當年喺條街度，有個人中咗邪，拿住把刀追人斬，我帶住你哋兩個，走唔到，唔係「龍居士」出手，我同你都被個中咗邪嘅黐線佬斬死咗嚧。」
「佢救到我哋，唔代表佢識法術架喎。」
「你兩個當時仲細，驚嚇親你哋，我噤住咗你哋對眼，但係你媽咪我就親眼睇住「龍居士」，一手喺個黐線佬個頭度扯隻女鬼出嚟。」
「媽呀！唔好講喇，嚇親細妹呀！」
我睇家姐個樣，似係佢被媽咪嚇親多D噃。
我一心諗住救阿輝，嚟緊呢個旅程肯定對我人生有重大意義，我立定決心一定要帶阿輝返嚟香港…
………
我同媽咪同家姐見完「解籤先生」之後，攞住個「捉妖塔」返咗屋企…
家姐佢沿途一直講好多阿輝咩唔好，點解要幫佢咁，但係我冇一句聽得入耳，呢個時候亦唔想理。
返到屋企，放低D嘢，冇幾耐，媽咪就同嗲哋出咗去，原來佢哋今晚要去飲，我同家姐就留返喺屋企撐檯腳。
媽咪同嗲哋出咗門冇幾耐，我又諗起阿輝，仲有「解籤先生」講嘅嘢，我越諗越擔心，我就求家姐佢陪我再搵「先生」多一次…
雖然佢千唔願意萬唔願意，但係到最後都係陪咗我去，我哋未食晚飯就直接去咗搵「先生」。
七點鐘左右就到咗「先生」個舖位，但係佢已經收咗舖，我同家姐都唔知點算好。
突然間，我見到隔離舖有個嬸嬸喺度…
「咦，家姐，睇唔睇到呀？嗰邊有個舖頭未閂呀，不如我哋去問吓丫。」我同家姐講。
「嗰邊？今朝好似唔覺得有呢個舖嘅。」家姐覺得好奇怪。
「可能我哋唔為意啫，過去問吓啦。」我拉住家姐過去。
「嬸嬸，請問你隔離舖嗰位先生係咪已經走咗喇？有冇方法可以搵到佢呀？」家姐幫我問。
「你哋講「阿龍」呀？」
「「阿龍」係咪即係「龍居士」呀？你叫佢「阿龍」，你哋係咪好熟架？我哋想搵佢呀。」我及及頭講。
「係呀，大嬸，你識唔識佢架？知唔知點可以搵到佢呀？」二家姐講。
「熟就唔係好熟。咁啦，你哋幫我收舖，我慢慢講你哋聽丫。」「嬸嬸」笑住回應。
「咪即係搵我哋笨。」家姐佢細細聲咁自言自語。
我篤咗一吓佢隻手，之後耍手叫佢唔好再講跟住做啦。
之後，我哋兩個一齊幫個「嬸嬸」收舖。
「你哋搵佢咩事架？可能我都幫到手，唔使搵佢噃。」「嬸嬸」佢問我哋。
「佢有冇料架？」家姐衝口而出。
「嬸嬸」佢側側頭，覺得家姐佢問得好奇怪咁，之後望住家姐。
「佢冇料你哋又識得搵佢？有人介紹架？」
「我哋媽咪識咗佢好耐。」
「喔，咁你唔信你媽咪？」
我一直拖住家姐，望住佢同「嬸嬸」對話。
「我就係驚媽咪佢俾人呃。」家姐咁講。
「喔，咁你放心啦，呢度個個都有料，尤其是佢。」「嬸嬸」回應。
「你係講緊個姓龍嘅？點解「尤其是佢」呀？」家姐再問。
「佢唔係姓龍架。小妹妹，你知唔知「龍」代表咩丫？「龍」係中國代表吉祥嘅大阿哥，第一嘅意思，「龍居士」亦唔係佢單一嘅外號或者佢自己改嘅，係佢師父D師父傳落嚟架，應該最少都五代喇，係D平民百姓話佢哋勁，封佢哋架。佢D師父同佢可以叫做中國第一天師，或者捉鬼大師，所以D鬼好憎佢哋架。」
「有冇咁勁呀？佢個樣成個拐子佬咁，講嘢又成個騙子咁。」家姐個樣有D鄙視咁講。
「呵呵呵，你估個個都你哋兩個靚女咁靚咩！不過話佢講嘢似呃人嘅，你又唔係第一個。」「嬸嬸」再笑住咁講。
家姐塊面紅紅地，其實我都紅紅地，個樣有D尷尬。
「佢真係咁有料，做咩喺度擺檔呀？應該一早發咗啦。佢仲想賣個成四萬蚊嘅嘢俾我細妹，仲唔係想呃我哋？嗰個塔點可能值咁多錢呀。」家姐再問。
「嬸嬸」望咗一望家姐，佢再笑笑口咁講。
「喺度擺檔同佢有冇料有咩關係？佢根本唔使呃你哋。」之後佢指咗一指出面。
「唔講嗰句都講埋喇，呢，嗰邊呀，佢死鬼老豆都喺嗰度買咗半幢豪宅，留返咗俾佢，你話佢使唔使呃你嗰少少錢丫？不過佢賣得個塔咁貴，肯定有D原因，呢個我唔知喇，你見到佢自己問佢啦。你哋行入D嚟先。」
我同家姐行咗入佢舖頭，出面黑媽媽，佢舖頭裡面得D暗淡橙黃色嘅燈光，周圍都係衣紙，紙紮物品，同紙紮公仔…
D「公仔」喺D咁嘅燈光映照下，好似識講嘢同識郁嘅咁。
突然「龐，龐，龐」三聲喺舖最裡面傳出嚟，之後…
「查查查查查查彈查~」
「嬸嬸」佢突然閂埋咗道鐵閘，困咗我同家姐喺舖裡面，「嬸嬸」唵住咗個口，對住我同家姐奸笑。
「嘿，嘿，嘿。」
我再望入去舖裡面，喺一堆亂糟糟嘅衣紙上面，有一隻手凸咗出嚟。
(待續)
下集預告︰
「…我都可能死喺隻「猛嘢」手上。」