米米蓮妖怪作品 -《旅行‧如此‧難以忘‧記 》(百集長篇): 第010集 ~ 欣︰你幫唔到我哋！？隻「大惡鬼」阻咗你幫我哋！？

第010集 ~ 欣︰你幫唔到我哋！？隻「大惡鬼」阻咗你幫我哋！？

衣紙堆裡面「哎喲」一聲，一對手先出咗嚟，之後一個白頭老人行咗出嚟，係「解籤先生」呀！

我同家姐都俾「先生」佢嚇親，之後因為覺得奇怪，我同家姐都眼定定咁望住咗「嬸嬸」。

「你係佢邊個呀？點解佢喺度架？」家姐問「嬸嬸」，個「佢」係講緊「解籤先生」。

「佢個老伴囉，佢老婆呀。」「嬸嬸」唵住嘴笑。





之後佢執住D衣紙行咗後去舖後面。

「做咩咁「論盡」呀？喺騎樓碌咗落嚟都有嘅，真係笑死我喇，起得到身即係冇嘢啦。人哋兩個小妹妹等咗你成晚喇。快D去幫吓人啦。」「嬸嬸」同「先生」講。

原來個「嬸嬸」係笑「先生」佢碌落樓梯，頭先佢笑得咁陰森恐怖真係嚇死我同家姐。

「先生」喺我哋面前伸咗個懶腰，捽咗一捽對眼，望咗我哋一望。

「咦，你哋咪莊太嗰兩個女，做咩咁夜又嚟搵我？莊太呢？」





「我哋想問清楚D有關我男朋友D嘢，想問吓仲有冇其他方法可以化解？你賣俾我哋嗰個「塔」捉得一隻鬼，如果多過一隻咁點算呀？」

「喔，咁咪捉吓放吓囉，隻鬼入咗去出返嚟，要抖下氣，所以隻鬼一時間做唔到乜嘢住架。」「先生」佢摸摸下巴講。

我就好無奈，家姐就又無名火起喇。

「小氣鬼，講吓笑唔得咩？雖然個方法係真係得嘅，但係實行起嚟太難喇，唔啱你哋。其他方法呀？應該冇喇。」「先生」講。

「睇你個男朋友仔自己做化啦，今朝你哋走咗之後，我都有反覆諗過，個籤文都好清楚，好似冇咩位可以轉化嘅咁，唯一可以轉，又係唯一希望嘅係「老少扶車不斷哀」呢一句，睇吓有冇變數囉，但係你個男朋友仔去咗日本，我又真係諗唔到點樣可以有轉機噃。」「先生」再向我講。





佢講到呢度，我根本成個人都崩潰晒，覺得冇晒希望咁，鼻一酸，我就喊咗出嚟。

家姐佢輕撫咗我一吓，就鬧「先生」。

「你又話自己幾勁幾勁，咪又係幫唔到人，咁到呃神騙鬼個D有咩分別啫？」

「有，我都冇收你哋錢，死(口靚)妹，句句侄住晒，有都唔幫你。」

「冇就冇啦，關我侄唔侄咩事啫，你根本就冇料到。」家姐佢繼續係咁鬧。

「咩冇料到呀？如果係我親身喺你細妹個男朋友度，我肯定保到佢。」「先生」被激到面都紅晒。

「咁即係你去到日本就得啦，咁我哋請你去咪得囉。」

「先生，求你幫吓我男朋友丫，錢我會盡快俾返你，你幫幫我丫，可以嗎？」我及及頭喊住同「先生」講。





「唔得，真係唔得，我唔走得開呀。」「先生」另另頭。

「雖然我哋唔夠錢即係請到你去，但係我地都應承咗俾返錢你啦，你又唔係冇錢，點解唔可以幫我哋呀？你……你唔係驚死呀？」家姐繼續講。

「先生」又俾家姐激到面都紅晒。

「我唔同你一般見識，唔係嚇你哋，我前排捉咗隻「猛嘢」，我已經超渡咗佢成兩個禮拜，都仲未完全超渡到佢，起碼都仲要三幾個星期，呢三幾個星期都唔可以行開，如果呢隻嘢超渡唔到，死嘅人就多喇，我都好想幫到你朋友，但係真係愛莫能助。」

「咁‥‥你老婆可以幫我哋嗎？」我問。

「妹妹，我真係都好想幫到你男朋友，但係我老婆佢要幫我手，唔係我都可能死喺隻「猛嘢」手上。」

「有冇咁猛呀？」家姐好唔忿氣。





(待續)

下集預告︰

…好尖好大聲，仲要有回音，成個舖位都震晒，我同二家姐都嚇呆咗。