米米蓮妖怪作品 -《旅行‧如此‧難以忘‧記 》(百集長篇): 第008集 ~ 明︰咩話？「光管陳」你唔係教英文架咩？

第008集 ~ 明︰咩話？「光管陳」你唔係教英文架咩？

我呆咗，識咗「光管陳」咁耐，佢從未試過咁同我講嘢，阿輝佢哋見到我咁嘅樣都笑咗出嚟。

「撞咗咩嘢呀？」我問「光管陳」。

「哪喳嘢呀。」

「Eee…冇嘅，不過喺飛機度發咗個惡夢啫。」我見咁多同學喺度，唔敢直接講。





「光管陳」坐低咗喺我旁邊，班死仔喺度陰陰嘴笑。

「咩惡夢呀？講嚟聽吓。」「光管陳」佢好認真咁問我。

講真丫，佢問我，我真係唔想答，成日上堂用英文串我，不過依家，我真係好想搵個人同我分擔吓我嘅恐懼，所以…

我講咗我喺飛機上面發嗰惡夢俾佢聽，班死仔，有D喺度笑，有D又插嘴，有D驚埋一份，但係唔知做咩，佢哋竟然好專心咁聽…

聽書都唔見佢哋咁用心，聽到阿輝抓我膊頭整醒咗我嗰度，大家都以為我講緊笑咁。





「淨係得呢個夢？仲有冇其他嘢？」「光管陳」聽完之後問。

我望望班死仔，佢哋個樣唔同晒，好似真係好想聽咁，個(車立)嗰度D嘢我已經冇講…

「上車嗰度係誤會，我自己(火羅)皮啫，你哋都知發生咩事啦，但係頭先我返到房，唔小心整爛咗個喼，裡面有張黑色嘅符？」

我未講完，仲想講落去，但係「光管陳」突然好緊張好大聲咁插嘴埋嚟…

「黑色嘅符﹗？」





我及咗吓頭，佢望咗望大家，之後講︰—

「喔，冇嘢嘅，總之有咩事，記得即刻嚟搵我，同埋記得帶校章。」佢之後指咗幾吓班死仔。

「你，你，你哋做咩唔帶？」

「帶嚟有咩用呀？」

「個校章可以保護你哋。」「光管陳」答。

「保護我哋！？防彈架？校章可以護到我哋D乜？」

「呢D係護身符，我作過法架。」「光管陳」衝口以出。

「作過法！？唔係呀，你係咪陳Sir嚟架？」





「Eee…唔係我作法，係我覺得出外旅行，求個平安都好，攞咗呢D校章去拜過神。」「光管陳」個樣有D尷尬。

「拜神！？你死喇！我哋係天主教學校，你去拜神，好在校長去咗廁所，唔係你份工……」班死仔笑住講。

「黃仔」係個虔誠嘅天主教徒，佢原來一直都喺度聽緊我哋講嘢。

「陳Sir，你做咩嘢呀？拜神即係拜偶像，會教壞D學生架。」

「光管陳」望住「黃仔」，個樣好尷尬咁。

「哈哈，唔好意思，我俾阿明感染咗，傻咗添，不過有D嘢寧可信其有。」

佢望望「黃仔」，再對住我哋講︰—





「如果大家有十字架喺身嘅，當然用十字架啦，識得背聖經更好，不過如果唔記得經文，又冇十字架喺身，就試吓用我呢個手勢啦，你哋都跟我做丫。」

「咁樣，雙手合埋，中指向上，點喺額頭度，呢個係「護身咒」。」

「咁分開手會點呀？」我問。

「拿！」班死仔一齊舉起中指對住我。

「我諗你會明白D哪喳嘢見到你咁做佢會點做。」「光管陳」拍拍我膊頭。

「OK，我明。」我啤住班死仔。

「動作一樣，食指，呢次係食指向上，點喺額頭度，呢個係「隱身咒」。」「光管陳」再講。

「呢個動作，得閒唔小心都會做到，點會隱到身呀？」我問。





「唔係真係隱形，係D哪喳嘢會見唔到你。」

「喔，但係有護身咒，仲要隱身咒嚟做咩？」我再問。

「唔好講D哪喳嘢，如果有件「豬扒」喺你面前，你想用邊種咒呀？」

「OK，我明。」

食完飯，諗住走喇…

「頭先我唔想嚇親D同學，所以冇講，黑色嗰道符，其實係召鬼符。放呢道符喺你度嘅人想害你，仲想害死你。」「光管陳」突然搭住我膊頭細細聲驚死人知咁講。

我呆咗一陣，之後…





「咁我可以點呀？」好急咁問。

「光管陳」諗咗一諗，另咗另頭，之後好似諗通咗D嘢咁。

「首先唔使驚，道符你放咗喺邊？」

「我同「細鬼」個房個垃圾筒度。」

「你係上咗機先發現有唔妥？」

「係呀。仲有D嘢頭先冇講，我出嚟之前閂房門嗰吓，我聽到D嘢，好似係恐嚇我嘅咁，好似話咩「返去個房度你就知死」嘅咁，但係我唔肯定係咪真。」

「落咗機，揸住D行李嘅時候冇嘢家嘛？」「光管陳」咁問。我另另頭回應。

「你而家唔使驚，總之返到去，有唔妥，你即刻去323號房搵我。」「光管陳」再講。

「323﹗同我1201差幾遠呀？有事嘅話，我仲夠時間去搵你咩？」我好無奈。

「光管陳」攞咗佢部「3210」出嚟，拍拍我膊頭。

「得架喇，記住帶校章同我教你嘅手印，你電話幾多號？我打一次俾你，你記住。」

「我部電話冇漫遊。」

「咁你跑快兩步啦。」

佢見到「黃仔」望住佢，即刻咁講︰—

「記得帶十字架同聖經，最好帶埋耶穌。」

估唔到平時咁嚴肅嘅「光管陳」竟然變成咁「平易近人」喎。

(待續)

下集預告︰

「…親眼睇住「龍居士」，一手喺個黐線佬個頭度扯隻女鬼出嚟。」