米米蓮妖怪作品 -《旅行‧如此‧難以忘‧記 》(百集長篇): 第007集 ~ 明︰食飯！？嘩，「光管陳」你做咩行埋我度呀？

第007集 ~ 明︰食飯！？嘩，「光管陳」你做咩行埋我度呀？

我隨手就將我手上嗰張「黑色符」掉咗落垃圾筒，抆張房卡就行咗出去，閂埋門。

「你敢掉我落垃圾筒！今晚你就知死！」一把似係喺房裡面傳出嚟嘅聲音

「你聽唔聽到呀？」我當時啱啱閂緊門，好似聽到D嘢，所以我咁問「細鬼」。

「聽到咩呀？行啦，返嚟先聽啦。」不過佢咁答。





之後「細鬼」拉走咗我，我都暫時冇理嗰D聲嚧。

我跟住「細鬼」就去咗同大家集合，之後一齊搭地鐵，沼途有間車仔舖，另外，除咗便利店，就係便利店，真係梗有一間喺咗近…

落到地鐵站，買咗飛就上車，D站我點會識丫，一路就係跟住「黃仔」，訓導主任呀，佢好似識途老馬咁。

喺車廂度，我望吓四周圍，冇咩日本人，鬼咩，我哋廿幾人都包咗成個廂啦，望吓個線路圖，淨係得黑白色，睇死人咩？

我哋香港清楚好多，以前三條線，而家五條線，仲有晒顏色嘅。我再望吓遠處，諗住睇吓日本妹係咪真係好似D日本明星咁正啦…





係有D白領嘅，不過個樣好普通，D衫又鬼咁密實，反而好多D阿公阿婆，呢度D阿婆，個個都掃到塊面鬼咁白…

佢哋望住你，你真係唔敢望埋去，我都唔小心望到幾個，好在個個都有影嘅啫。

阿輝喺中途唔知做乜嘢，突然縮咗埋一邊，驚驚青青咁，唔通佢都遇到怪事？

我想行埋去問佢，但係D同學又阻住晒，都係一陣先問佢喇。

唔經唔覺，到咗目的地，一班人跟住「黃仔」行，去咗個商場，搭(車立)上樓，去咗一間牛肉燒烤任食，仲一早預約咗添。





我嚟日本都係諗住食壽司﹑拉麵同和牛咋，試吓日本嘅係咪真係正D，有任食牛肉燒烤，都好滿足都我喇，我見到牛肉就開心…

唔知係咪之前嚇親，唗咗好多能量，我起手就食咗幾碟牛肉，醮D醬油，又一塊，醮D醬油，又一塊，D醬油又好食，香港冇嘅…

連咁鍾意食飯嘅我都放棄咗食飯，專心「攻打」牛肉。

差唔多食到飽晒，咪同阿輝佢哋嗲兩句囉。

「頭先我做過D咩嘢嚟？」其實我係想問阿輝佢頭先做咩嘢，唔知點解傻吓傻吓將「你」講咗做「我」。

「你傻很咗呀？頭先咪一齊去咗酒店放低行李，之後咪搭地鐵過嚟囉。」「大袋」講。

「定係你想講返頭先酒店櫃位嗰個靚女姐姐呀？」「喪狗」講。

自己講錯嘢，俾人串兩句諗住算啦，點知佢哋講到嗰個女職員，我唔敢講我見到嗰舊「白色毛」俾佢哋聽，淨係咁講。





「嗰個女仔麻麻地啫，頭先唔知邊幾條友喺個酒店(車立)度爭住話係自己條女喎，我都冇參與。」

「頭先串完你(目及)嘢，我哋都入晒(車立)啦，得返你哋四個喳嘛，唔係你咪佢哋囉。」「大袋」佢望咗望「阿輝」﹑「細鬼」同「阿倫」。

「細鬼」耍手，「阿倫」另頭，「阿輝」佢講﹕—

「唔係噃，頭先我冇留意你哋，不過我都聽到有…應該係三個人講緊爭嗰個靚女姐姐噃。唔係你哋咩？仲有其他人一齊入咗(車立)咩？」

「我閂門架，係得我哋四個咋，我入(車立)噤咗12字就睇住手機喇，我係聽到你哋喺後面講話咩咩咩「已經俾佢吸引住」咁。」「阿倫」講。

「仲話咩「英文攞A，識D日文，實溝到佢」嘅咁，當時我都望住個(車立)前面諗緊嘢，聽到係你哋後面講嘅。」「細鬼」講。

佢哋都望住咗我，以為係我玩佢哋，吹水嚇佢哋嘅咁，呢個時候，「光管陳」突然行埋我哋度，搭住我膊頭問︰—





「你今朝係咪撞咗嘢呀？」

(待續)

下集預告

「…黑色嗰道符，其實係召鬼符…」