米米蓮妖怪作品 -《旅行‧如此‧難以忘‧記 》(百集長篇): 第006集 ~ 輝︰咩怪聲呀？搭地鐵去食飯先啦。
第006集 ~ 輝︰咩怪聲呀？搭地鐵去食飯先啦。
阿明嗰邊講到點呀？係咪同我一樣撞咗嘢呀？
我一方面好想佢冇事，另一方面又好想佢撞到，可以同我分擔一吓丫嘛，心情真係好矛盾。
上次講到，我見到嗰個飛過窗口嘅「頭」，我根本平復唔到個心情，諗住想搵人講吓啦…
點知我望過去「大袋」同「喪狗」度，佢哋又訓咗，阿明個「死仔」又唔喺位，都唔知佢去咗邊？點搵人傾丫？
之後我試過閂埋個窗，但係我一合埋眼啫，又見到嗰個「頭」，心裡面嘅恐懼根本消唔到，所以我決定開返個窗，直頭一直望出去睇吓會唔會再見到佢。
好在之後真係再冇見到嗰個「頭」，我先稍為放心返少少。再過咗冇幾耐，飛機就降落，我哋成班人就落機喇。
我一直就跟住「喪狗」同「大袋」佢哋去辦理過關D嘢，完全冇望過四周圍，一直跟，一直跟，連過關嘅時候係點樣我都唔記得咗。
大家都出好晒閘，王Sir就開始點人數，點齊人數，講完一堆廢話，諗住開始行啦…
點知我望到阿明佢眼都凸埋，覺得好奇怪咁，我真係唔知佢奇怪緊D乜？
佢望吓左望吓右咁，我心諗唔通佢同我一樣，都撞到嘢？
大家喺機場正式出發，王Sir一指住出面架旅遊巴，我就第一個行咗出去放行李，放好就第一個上咗車…
上到車直接行咗去最後尾嗰排度坐，「大袋」跟住我，坐咗喺我隔離。
我一坐定，又諗返嗰個「頭」，所以就一直望住窗外。見到天空好清，冇乜雲，但係同時星星同月亮都見唔到…
成個天空黑成一片，黑到有種恐怖嘅感覺，更加驚嗰個「頭」會再次出現，我望來望去搵吓見唔見到「佢」啦，好彩一直都搵唔到。
D同學老師一個一個上車，上晒之後，我諗住應該開車啦，點知我離遠見到個白璽璽嘅人…
佢慢慢咁行緊過嚟，好似係想上我哋車嘅咁，我心諗呢個咩人嚟架？係咪又係嗰D嘢呀？
我見住佢上埋我哋車，佢之後一路行後嚟車尾，一路聞吓聞吓咁，佢行得越埋我度，我就越緊張…
行到差唔多到阿明個位，見到阿明個樣變晒，成個俟咗埋「大袋」度，左手喺「大袋」大脾，右手喺「大袋」手臂。
「大袋」突然「丫」一聲叫咗出嚟︰「做咩很嘢！」
原來阿明佢好大力咁揸住咗「大袋」隻手，好在佢係右手用力，如果係左手用力，我諗應該再叫唔到「大袋」做「大袋」嚧。
(心 突然的隱隱痛 喔~~，如空 穴來了陣寒風~~)
「你哋睇唔睇到，睇唔睇到呀？」阿明好大聲咁問。
「睇到咩呀？」「大袋」應佢。
「前面…前面…個樣好恐怖，面無人色嗰隻嘢呀！」阿明佢個樣好驚咁。
我心諗原來阿明都望到嗰個白璽璽嘅人，咁我都放心D。而除咗我，當時應該全部人都笑緊阿明。
嗰個白璽璽嘅人就好似好嬲咁望住阿明。之後「大袋」笑住咁話阿明︰—
「你條友，真係黐很咗線，人哋係我哋導遊嚟架。」
其實佢唔講，連我都唔知。
阿明佢之後仲問點解佢未見過個導遊，其實我都冇見過，所以我都好想知。
「大袋」佢講返先知，原來阿明佢一直都冇接觸過個導遊，一直心神恍惚咁，其實我咪又係一樣，好在我冇阿明咁瘀皮啫，唔係有排俾人笑。
個導遊都冇聽阿明講對唔住就走咗去前面同「鐵拳」斟，斟咗一陣，我見佢揸住D錢就走咗，我都冇理佢咩事嚧。
之後架旅遊巴開車冇耐，我就望返出去窗外面，阿明叫咗我兩吓我都冇理佢，一直就眼定定咁望住出面。
唔知係咪我冇理佢呢？阿明佢之後行咗前去，我睇唔到佢坐咗喺邊，不過條友講嘢好大聲，我坐到最後都聽得好清楚…
講到「發惡夢」嗰吓，「豬仔」應該係俾佢嘈 醒咗，之後都忍唔住串佢「發綺夢」，但係反而俾佢打咗吓個頭…
不過冇所謂啦，我哋都識咗好耐，我諗「豬仔」都唔會介意嘅。
條「傻佬明」，我真係俾佢激死，邊有人講人哋壞話咁大聲架。一句又一句「光管陳」…
王Sir講嘢我聽唔清楚，不過聽個「傻佬」講嘢已經知道佢哋講緊咩，我諗王Sir應該都幾尷尬。
聽到阿明講「癖好」兩個字，「光管陳」突然彈起身，我幾驚佢真係起身鬧阿明呀！
不過「光管陳」佢又真係好似聽唔到咁，自己有自己講，佢派咗D校章俾我哋， 叫我哋記得出街帶埋校章…
但係大家都似乎唔想帶，我求其將個章放喺褲袋就算，之後聽到阿明佢講「光管陳」識講日文，我都覺得好愕然。
條「傻佬」之後仲大大聲，爆咗句「孌童怪」出嚟，條友肯定又見到校長嘅「惡行」啦，但係都唔好咁蠢，咁大聲講丫嘛！
好在個「淫蟲」校長，中文唔係話好好，可能唔識聽添，「豬仔」又衝咗前去唵住佢把口，個場面都幾攪笑。
不過我就笑唔出，個心依然凝住個「頭」會再出現。
冇幾耐，我哋到咗酒店，酒店都幾靚﹑幾乾淨架，「鐵拳」佢去咗辦理入住，我哋就企喺門口等。
因為阿明佢好似同我一樣，遇到嗰D嘢，所以我都特別留意佢嘅動靜。佢望來望去，一時望吓梳化嗰邊，一時望吓近精品店嗰邊…
之後見到佢望住櫃位個角度，我見到佢個樣變得好凝重，所以我都跟佢望咗吓個角度。
我望到一舊毛茸茸白色嘅嘢，係條尾？
我望望個櫃位，淨係得幫「鐵拳」處理緊嘢嗰個女仔，之後我都好用心咁望住個女仔個樣，好驚真係見到佢個樣變到成隻鬼咁。
唔經唔覺，原來「鐵拳」處理好晒D嘢返埋嚟，班友仔仲分好晒房，得返兩間，我逼住冇得同阿明一個房，要同「阿倫」同房…
「阿倫」佢係「劉華仔」，「劉華體 育會」青年軍正選中場，係上年先嚟我哋學校度嘅，佢同「Kenny」，校隊隊長就最啱傾嘅。
我覺得冇所謂啦，都同佢算係傾得吓計嘅，咪同佢同房囉。D人慢 慢搭(車立)上晒去房，淨係得返我哋幾條友仔…
見到阿明佢仲望住嗰個女職員，佢哋幾個都忍唔住串佢(目及)嘢。
個女職員望住我哋，好有禮貌咁笑咗吓，仲請我哋去搭(車立)，我望咗一望個櫃位，再望咗一望個女職員嘅身後…
又真係見唔到有白色嘢，頭先舊「白色毛毛」去咗邊呢？總係覺得呢間酒店唔多尋常。
「頭先個「姐姐」都幾正噃。」
「係噃，夜D去搵佢傾吓計先。」
「你識日文咩？」
「唔俾人哋識講廣東話嘅？又可能識英文呢。」
「你識英文咩？」
「係噃，你英文好似「肥」咗架喎。」
「總之唔理喇，夜D一定要去搵吓佢，我已經俾佢吸引住喇。」
「你去死啦，佢係我架，唔好攪佢添呀。」
「又會係你嘅。」
「慘得過我英文攞A，又識少少日文啫。」
(車立)裡面一陣廢話之後，大家到咗12樓，我就返1216號房，阿明就同「細鬼」返1201號房。
其實講真，過返去搵阿明嗲吓，訓埋喺「1201」都得，條「細鬼」夜晚肯定好「忙」。
我D嘢都未放低啫，「細鬼」佢真係走咗過嚟問我哋今晚點。
「喂，今晚你哋跟唔跟我出去行街街？」
「去邊呀？Kenny﹑「傻佬明」佢哋去唔去？」「阿倫」問。
「去邊！？你明嘅。唔好扮嘢啦。跟「叔叔」行就得。」「細鬼」笑淫淫咁講。
「「傻佬明」條友我一直問佢嘢，佢都冇理過我，唔理佢啦，Kenny就一陣先問。」「細鬼」再嬲嬲地咁講。
我就另另頭回應咗佢就算。我真係采佢都傻，唔正經嘅嘢咪攪我，夜D仲要打俾阿欣，「阿倫」佢就應承咗去，唉，又一個被「教壞」嘅青年。
之後王Sir嚟咗我哋嗰層，唔知同邊個講啦，大嗌咗幾聲話出發食飯，「細鬼」就衝返咗去叫阿明。
我哋成班廿幾人，一齊就跟住「黃仔」同「鐵拳」去搭「地鐵」，阿明佢仲係傻傻地咁嘅樣，淨係識得跟住大家行，其實我咪又係傻傻地咁望來望去。
入到「地鐵站」，有D同學就影吓相咁，我就冇影相，望都冇望過D路線，一直就跟住佢哋行，我見到阿明佢望住咗個阿婆，D同學都望到呢個情景…
「嘩，原來呢D先啱佢口味呀，今晚唔使預佢嚧。」「細鬼」講。
我望到「傻佬明」咁樣，唔單止冇笑，仲覺得呢個旅程，真係要同佢「互相扶持」。
不過講時講，其實真係唔明白日本D阿婆點解要整到個面白璽璽，夜晚見到真係好鬼驚。
(待續)
下集預告︰
阿輝喺中途唔知做乜嘢，突然縮咗埋一邊，驚驚青青咁…
註腳︰上面句歌詞來自許志安嘅《男人最痛》