米米蓮妖怪作品 -《旅行‧如此‧難以忘‧記 》(百集長篇): 第003集 ~ 明︰落咗機，上咗旅遊巴，我仲見到隻「白面鬼」添噃。

第003集 ~ 明︰落咗機，上咗旅遊巴，我仲見到隻「白面鬼」添噃。

講返我呢邊先，見到呢隻喺我面前郁都唔郁嘅黑色貓，我嘗試去點吓佢，睇吓佢係咪真係死咗。

我摸到佢個身好凍，已經冇咗心跳。

雖然覺得好邪門，但係更強烈嘅感覺係—嬲…

嬲點解會有隻貓貓死得咁慘，竟然冇人發現同處理。





我由廁所度衝咗出去，諗住去質問D空姐。

但係好奇怪，出面變得黑媽媽，燈都熄晒，仲好靜好靜，靜到有回音聲，耳仔都覺得好唔舒服，呢個情景令我停頓咗落嚟。

我望吓左，再望吓右，見唔到有任何人，心諗可能係熄咗燈，大家都休息緊。

心裡面有少少無奈嘅感覺，但係都想嘗試去靜靜地搵個空姐出嚟幫吓手處理返隻貓先。

我行咗去另一邊廂，呢邊都係熄晒燈，只係隱約見到前面一排又一排嘅櫈，但係好奇怪，呢邊咁多櫈，竟然一個人都冇。





心裡面總係覺得有D嘢喺度，但係就一直都睇唔到，我嘗試慢慢細細步向住後排行去，慢慢…

我聽到一D好細好細嘅聲音…

「嗚…呀…嗚…呀…」

聲音好詭異，但係我依然慢慢向前行，越行前聲音就越大，到我聽到清楚聽到「嗚」「呀」兩個音嘅時候…

我發覺唔似係一個人發出嚟嘅聲音。





感覺好寒，好唔舒服，想轉身就走，但係喺呢一刻，喺我前面一個又一個螢光綠色嘅人頭…

佢哋慢慢喺D櫈後面凸咗出嚟，一隻又一隻嘅嘢…喺櫈底下面爬緊出嚟。

「噗！」

我對腳發唔到力，成個人跌低咗，突然左邊膊頭俾D嘢抓住咗…

我一望過去，係一隻青綠色嘅鬼爪，鬼爪好大力咁摙落我個膊頭度，我痛到踭大對眼大嗌咗出嚟︰—

「唔好呀！唔好呀！」

我一時間唔知點算，我下意識右手用力握實拳頭，出盡全力就向後面一拳打埋去。

「咦！」





係阿輝呀！呢次大鑊喇！頭先係發夢！？

好在嗰拳食唔正，唔係阿輝條友肯定入廠，但係隨住呢一拳打出去，我成個人放鬆晒…

我即刻Say Sorry︰「Sorry，Sorry！你冇嘢呀？」

「你冇嘢呀？頂你個肺，一搥打埋嚟，好Q痛呀。」佢咁鬧我。

「你試吓俾我打搥丫！」佢摸摸塊面再講。

「鬼叫你咁Q大力摙我呀，抵你死啦。」我膊頭仲痛緊，對住佢咁講。

佢都知衰冇出聲，之後有個「夏惠姨」咁嘅款嘅空姐呵護住佢返咗埋位，阿輝佢好似千萬個唔願意嘅咁，呢個場面有D攪笑。





我望望隔離，有個像著住件官服，多口問咗句D空姐咩嚟，佢哋話係有個客人特別寄存嘅行李。

阿輝返咗埋位，但係我仲係覺得頭先發生嘅事情太真實，因為我仲記得隻貓身上嗰種冰冷，雖然，阿輝隻爪我都好記得。

之後，我自己一個走咗去廁所再睇吓，摸摸塊鏡，真係唔覺得係跌過落嚟。

攪到我之後心裡面一直凝住會有怪事發生嘅咁。

返咗埋位，坐多咗陣，飛機就降落喇。

辦理好過關D嘢，出咗閘，王Sir開始點人數，王Sir︰「啱數， 28個，齊人喇，出發。」

但係我心諗︰「28個！？唔係27人咋咩，點解多咗個？」

我眼都凸埋，望吓左望吓右，唔似有個人係我唔識架喎，D同學走來走去，我數極都數唔啱數，攪到我越嚟越緊張，一路就傻吓傻吓咁望來望去。





直到一齊放晒行李上車，人都上埋車喇，我都係數唔到28人…

我同阿輝﹑「大袋」﹑「喪狗」佢地走晒埋最後排坐，我坐中間對住條路，阿輝坐喺角，「大袋」﹑「喪狗」坐喺我左右。

坐低之後，我仲係覺得好奇怪，所以對眼一直望住窗口，睇住D人一個一個上車，D人上晒喇，但係始終搵唔到一個我唔識嘅人。

突然…有個我唔識嘅人喺機場門口好慢咁行緊過嚟，之後我睇住佢上車，大家好似唔知道佢嘅存在嘅咁…

佢上咗車，我睇到佢個樣，佢面無血色，嗰種蒼白，唔似係人嘅膚色，佢慢慢行後嚟，一路行，一路左邊聞吓，右邊聞吓，似係吸緊D嘢嘅咁。

佢慢慢咁行，慢慢咁吸，對住我越行越埋，越行越埋，我驚起嚟。

大力一揸，揸住咗「大袋」個「袋」，丫！唔係，隻手先啱，揸到佢大嗌咗出嚟︰「丫，做咩很嘢！」





「你哋睇唔睇到，睇唔睇到呀？」我即係就咁問。

「睇到咩呀？」「大袋」問返我轉頭。

「前面，前面，前面，個樣好恐怖，面無人色嗰隻嘢呀。」

嗰隻嘢，突然…及低頭蹬大對眼望住我……

(待續)

下集預告︰

「…佢嚟緊嘅情況係四個字，怨鬼纏身。」