米米蓮妖怪作品 -《旅行‧如此‧難以忘‧記 》(百集長篇): 第004集 ~ 欣︰D男仔真係丫…輝輝，我幫你求咗籤呀！
第004集 ~ 欣︰D男仔真係丫…輝輝，我幫你求咗籤呀。
Hello，大家好！我叫阿欣，莊嘉欣，Linda。
我有兩個家姐，「大家姐」美欣，Amy，「二家姐」麗欣，Stephy。
「大家姐」大我哋成十年，我同「二家姐」就差一年，感情好好架。
「二家姐」一直都同我讀同一間學校，而家一齊讀緊「聖寶倫」，佢一直都好保護我，所以佢對其他人都幾惡架…
不過對我就好好。今年我哋兩個襯住有幾日長假咪一齊去吓日本旅行囉。
機票住宿就爹哋媽咪俾，「二家姐」就諗住用佢上年暑期工賺返嚟嘅錢請我去買吓衫買吓嘢食咁。
呢次旅行，順便可以搵吓我個男朋友仔，朱嘉輝， 阿輝佢呀！。
阿輝佢對我好好架，不過就成日俾「二家姐」鬧。
本來我都唔想咁早拍拖住，想專心讀好書先，大個D先諗拍拖，點知阿輝佢好衰架，係咁追人哋。
我都算好矜持架喇，第一次見佢，喺花園道斜路，當時啱啱同兩個同學喺「惠佳超級市場」買完嘢飲，諗住行返去「聖寶倫」，點知…
阿輝佢同佢三個同學無端端走埋我哋度，傻奸奸咁問我叫咩名，仲想問我攞電話添，我當然唔俾啦，佢哋好似好壞咁。
後期識咗阿輝之後，佢都有介紹返呢三個朋友我識，一個叫阿明，一個好似叫阿狗，一個個名好肉酸嘅，唔講喇！
嗰次之後，有日唔覺意喺體育報度見到有關「聖迪達」嘅新聞，見到段新聞寫住︰—
「神一般的中堅，擋遠射，破單刀，護空門，協助「聖迪達」以一比零小勝對手進入決賽」
段新聞仲有阿輝張大頭相，影得又幾好，幾有型嘅。
段新聞仲有個訪問添，佢話最多謝係佢鐘意嘅人，俾佢好大力量喎，唔知係咪講緊我呢？
之後，我都冇問返佢呀，驚俾佢知我留意佢，佢會好得戚架。
「聖迪達」仲要係讀書幾叻嘅名校，所以我都對佢有D改觀。
佢之後竟然仲日日襯住食飯時間，企定定喺我去開買飯盒嗰間士多出面，次次都蹺住腳，俟住牆，手揸住包「陽他檸檬茶」喺度扮飲…
一見到我咋，佢就另轉包檸檬茶，仲借D倚俾我睇到，上面次次都有D字嘅…
等我一陣先，攞返本日記睇吓佢寫過咩先：—
2月8日 晴 第一包檸檬茶係「我們可以交個朋友嗎？」
第二頁 2月9日 晴「可以給我一次機會嗎？」
第三頁 2月10日 陰「我們交個朋友吧。」
11日 晴 「我不是壞人，請給我一次機會。」
邊有人咁攪笑，同人講自己唔係壞人架，
12日 晴 「我好勁架，讀書勁，踢波勁，做我條女丫，包你一世唔使做。」
呢次我有D嬲，嬲佢咁粗魯，所以我嬲爆爆咁走咗，後期識咗阿輝之後，佢同我解釋返，係阿明整蠱佢…
嗰次之後，就係新年長假，成個假期都見唔到佢，個心有D掛住佢。
放完長假，第一日返學，佢又喺嗰度等我，呢次佢寫埋自己個電話出嚟，我兩個朋友，阿芬同阿儀仲真係抄低咗…
夜晚仲真係打俾佢，諗住玩吓佢，約咗佢第二日食飯時間喺公園仔度等…
叫佢企喺瀡滑梯前面唔好行開，一定要一個人嚟，如果唔係，「佢哋」唔俾我同佢約會喎。
到咗嗰日，阿芬同阿儀襯阿輝未到就一早拉咗我去嗰度，匿埋喺樓梯上面，一直望住約定嘅位置等阿輝嚟…
點知阿輝佢真係一個人嚟咗，一直就郁都唔郁咁等我，一直等一直等，等咗半個鐘之後，個天仲落起大雨嚟…
我好想出去叫佢去避吓雨啦，點知阿芬同阿儀唔俾我出去，話要試下佢喎，佢就真係傻奸奸咁一直冇行開過，一直淋雨…
呢一吓，我真係有D心痛，所以最後都係忍唔住跑咗出去同佢講︰—
「你做咩咁傻呀？咁大雨都唔去避吓雨。」
佢見到我佢好開心，冇講嘢，淨係即刻除咗件校褸幫我擋雨，我一直就等佢答我。
過咗一陣，仲記得佢咁講︰「你好似要上堂喇，不如我送你返去丫。」
之後，我同佢一齊行返學校，行咗一陣…
「你唔係想知我叫咩名咩？我D朋友都叫我阿欣架。咁你叫咩名呀？」我問佢。
「朱嘉輝，阿輝，中四，D班，校隊正選，踢後衛，屋企有阿爺阿嫲阿爸阿媽家姐同細妹，仲有隻狗叫Bobby，一齊住喺元朗，住村屋，三層嗰隻‥‥」
「我又冇問你呢D，做咩講咁多嘢俾我知呀？」
之後到咗學校門口就同佢講再見，嗰日之後，佢件校褸一直喺我度，我哋亦開始咗拍拖。
阿輝今日下午出發，我叫佢唔好唗錢，去到嗰邊夜晚先打俾我報平安。
媽咪知道我同家姐兩個去旅行都好擔心，所以今朝專登叫埋「二家姐」同我去黃大仙拜吓神， 求返道平安符帶埋去旅行。
買咗扎香，一D水果同燒肉就去咗拜神，呢D嘢我一D都唔識，咪跟住媽咪做囉，媽咪仲教我求籤，咁我咪求吓學業，求吓感情，求吓阿輝平安咁囉。
唔知點解我總係個心凝住阿輝會有事嘅咁，我好擔心，攞住幾個求出嚟嘅號碼，就去咗搵嗰個媽咪識咗好耐嘅解籤先生解籤。
到咗解籤先生嗰度，媽咪 將「二家姐」同我D嘢都講咗比解籤先生知，解籤先生叫「龍居士」，佢先睇「二家姐」…
「二家姐」求自身，「先生」話佢今年學業尚好，不過未有拖拍，要拍拖，起碼廿五歲，「二家姐」之後嬲爆爆咁就行咗去我後面。
到我喇，學業同感情都係上上籤，會好順利，「先生」都話好少見人一次求到兩支上上籤，話我今年會行好運。
到咗講阿輝平安，「先生」佢另另頭咁講︰「呢支係下下籤，求學業，最多考得尾，求感情，最多分手，但係求平安，真係好唔吉利。」
「十二金牌速召回，奸雄設計幾時灰，可憐一旦功勞散，老少扶車不斷哀。」「先生」佢讀出籤文。
「係咪即係有人叫佢返嚟香港，之後喺度會有事發生呀？」我咁問。
「你男朋友仔佢係同學校D人去旅行，佢屋企人應該都會放心佢去，唔會中途叫佢返嚟，你會唔會叫佢返嚟丫？估你都唔會，因為你都嚟緊會過去搵佢，咁即係咩呀？」
「先生」好凝重咁講咗呢番話。佢咁講，我好困惑，只係另頭表示唔知，並冇講嘢。
「咁即係想叫佢返嚟嘅，或者係搵緊佢嘅唔係佢熟悉嘅人，甚至唔係人，依我推斷，佢嚟緊嘅情況係四個字，怨鬼纏身。」「先生」佢另另頭咁講。
「係咪女鬼先？」「二家姐」咁問。
「先生」笑咗一吓，之後再講︰—
「十二金牌速召回，即係有D嘢要搵佢﹔奸雄設計幾時灰，應該係有D嘢設計想害佢﹔可憐一旦功勞散，即係你男朋友仔做返D啱嘅嘢，甚至講埋對唔住呀，「佢」都唔會理，我講緊呢個「佢」，係講緊隻嘢﹔老少扶車不斷哀，「老少」二字，如果我之前三句都冇講錯嘅話，呢度都唔係講緊人，係講緊鬼，仲要唔止一隻，「扶」係動詞，即係帶埋咁解啫，「車」唔係車，係唔係人嘅一D嘢，佢去咗日本，日本最多咩嘢丫？妖怪囉！「不斷」即係一路一路都有，所以成句即係講緊妖魔鬼怪會不斷咁攪佢。」
(待續)
下集預告︰
…地下係地毯，黃色燈，可以教光暗嘅，牆上面有幅人像畫…