米米蓮妖怪作品 -《旅行‧如此‧難以忘‧記 》(百集長篇): 第002集 ~ 輝︰貓屍咋嘛，我見到條「疆屍」啦，仲有「UFO」添呀。
第002集 ~ 輝︰貓屍咋嘛，我見到條「疆屍」啦，仲有「UFO」添呀。
我叫朱嘉輝，阿輝，今日出發去日本旅行，都唔知第幾次去嚧。
我有個女朋友，喺隔離間聖寶倫男女中學度讀嘅，間學校有仔都俾我溝到佢哋D女，哈哈…
不過又唔關佢D仔事嘅，鬼叫我咁靚仔咩。
我女友佢16歲，都幾省鏡架，靚女呢D嘢，唔講身材嘅…
過兩日佢同佢家姐都會一齊嚟日本旅行，順便會搵吓我，佢家姐其實仲靚呀，身材又好，不過超惡，我怕咗佢。
講到老友，死黨，梗係何家明啦！識咗條友仔有十幾年喇，小學同班，一齊踢波踢校隊踢到而家。
佢成日同人講叫佢阿明得啦，其實成班波友都叫佢「傻佬明」，條友專係喺重要關頭做D傻佬先會做嘅嘢。
好似今年個校際冠軍又真係因為有佢先贏到嘅。我哋係十二碼贏嘅…
就係因為加時補時階段嗰陣，對手有個單刀必入波，條「傻佬明」見到咁…
即刻就施展佢嘅「少林足球」，一個「冚家大飛剷」，剷到對手個前鋒斷Q咗腳…
唔係講笑，嗰個人真係入咗廠，當然「傻佬明」即刻紅牌出場啦…
就係咁，因為佢呢一吓，我哋先有機會踢十二碼贏到個冠軍。
事後校長同教練王Sir仲讚佢剷得好，剷到人哋入廠都話剷得好，講到好似係啱咁，真係唔知咩世界。
因為呢場波，成隊波有得去吓日本旅行。
今日我一早就出發，準備好晒D嘢，就Join埋尋晚約好咗都係住係灣仔嘅「喪狗」同「大袋」一齊去機場…
我哋好快就去到機場，離遠見到「傻佬明」，見到條友仔望來望去，真係好似個傻佬咁，咪打俾佢囉…
佢一接聽就問我係邊個，大佬呀！唔係有來電顯示架咩，你話條友仔係咪傻丫？
「阿輝呀！見到你啦！唔好走開！我過嚟搵你！」
搵咗佢之後，我哋四條友就走去搵埋班波友同D老師，之後就一齊上機，出發喇！
上到機，起飛冇耐啫，「傻佬明」佢走咗埋我哋坐喺最前排嘅三個度…
「喂，四條友鋤啤啦。」
一個化妝化到「夏惠姨」咁嘅空姐走埋嚟，呢個人令我對空姐冇晒幻想，佢對住阿明講︰—
「先生，你唔可以坐喺度架，不如你返埋位先啦，好快就到架喇。」
我﹑「喪狗」同「大袋」一齊唵住嘴笑，阿明嬲嬲地咁就返咗埋位…
我哋又衰D嘅，佢返咗埋位，我哋仲揚揚手咁講︰「好(火羅)呀！」
之後，條友嬲到起身去咗後面，應該係去廁所。
我聽咗陣歌，之後都急急地，咪行後去廁所囉，見到廁所門口豆豉咁大隻字寫住「使用中」…
我咪問吓旁邊嗰個幾靚女嘅架妹空姐︰「係咪有個傻佬入咗去呀？」
佢笑咗一吓再回答我︰「有位先生等咗好耐，啱啱入咗去。」
我都廢事等佢，返咗埋位坐多陣先。呢個時候，大部份隊友同老師唔係聽緊歌睇緊片，就係訓鬼咗嚧。
我聽多咗幾首歌，之後再去廁所，行過見到「傻佬明」仲未返埋位，心諗︰—
「條友唔係仲喺廁所呀？屙咁耐，內藏都屙埋出嚟啦。」
行到去廁所門口，見到寫住「沒有人」，入咗去先諗起咁奇怪嘅，第一次見冇人用嘅時候寫「沒有人」…
我屙咗個尿，擠咗粒暗瘡就出返去喇，再望望個廁所門口，又真係寫住「沒有人」噃。
我行返去自己位啦，點知見到條「傻佬明」仲未返，覺得好奇怪，咪走返去廁所嗰邊…
又見返嗰個空姐，咪問囉︰「個傻佬去咗邊呀？」
佢又對我笑咗吓，呢個笑唔係講笑，似係講緊「傻佬咪喺我前面囉」
我有少少忟，佢之後講︰「你應該講緊你用之前嗰位先生，我啱啱行開咗，冇見到佢行出嚟。」
我冇理佢，之後一個人向飛機後面行咗去，我見到有個位有道簾遮住，框邊好似一堆符咒咁嘅嘢，道簾郁吓郁吓…
我行到埋去，見到裡面都好黑吓，咪慢慢行入去囉…
「啪！」 後面突然有D力推咗我入去，我仆低喺個地度…
見到前面有幾條光柱向上照射，射到一個直筆甩企喺我面前嘅人度，嗰個人一身清朝官服…
我再望上去，係一個面冇血色嘅人頭，呢吓我……
「躂！」燈光開咗…
「先生，你冇事丫嘛？」
原來係「夏惠姨」空姐，我再望望前面個「清官」，原來係個膠像嚟，真係嚇得我丫。
我望望旁邊，原來個死仔阿明嚟度訓咗，我真係吊佢丫，因為佢我俾個像嚇一嚇，咪左手大大力摙醒條死仔囉…
「唔好呀，唔好呀！」阿明成頭汗，一起身就咁講，條友仔梗係唔知發緊咩惡夢。
之後，我哋一齊行返埋自己位，但係我始終諗唔明頭先係咩人推我入去。
另外，可能我真係嚇咗一嚇，連點解有個咁嘅像喺飛機上面都冇問。
我坐返定咗，聽咗一陣歌，諗住應該就到啦，我望出去窗外面，原來天都黑齊嚧，出面漆黑一片。
我望咗一陣，望到前面有D一點點嘅橙色燈光，應該就快到喇…
我再望望個天空，見到有D嘢好似郁來郁去，覺得好奇怪，咪用心望清楚D囉…
似係個波，好似有D 飛絮嘅嘢，飛來飛去好似搵緊D嘢咁，唔通係UFO！？
之後「佢」飛咗去後面，我俟埋D個頭去玻璃度望，突然…
個UFO飛過，之後見到佢一直飛去下面D橙色燈光度，但係…
我冇望錯嘅話…頭先…我見到嘅…好似係…眼﹑耳﹑口﹑同鼻……
(待續)
下集預告︰
「…前面，個樣好恐怖，面無人色嗰隻嘢…」