人來人往,你為甚麼要回來找我...: 23
早上八時，我們在校內操場裡等候著旅遊巴的到來。
車來到後，我走上車找到個位子坐下。
「啊子良，等我坐你隔離啦。」羅船長在我身旁坐下。
「哦。」
「係咪仲係好唔明朗？」他撞我一下。
「我同周子若？」
「緊係啦，他瞇著眼：「唔通你同侯紹龍咩？」
我忍不住笑了起來。
「喂點啫？」
「咪又係咁……啊，」我驀然想起：「尋日佢無啦啦打左個電話比我。」
「佢主動打比你？點解既？」
「我都唔知點解。」
「吓？咁你地講左啲咩黎呀？」
「我地咩都無講。」
「邊有人打黎唔講野架？」
「尋晚發生左啲事，」我說：「我無機會同佢傾。」
「發生左咩事？」
「我呀媽入左醫院。」
「吓？咁伯母佢而家點啊……」
「佢無咩野，有我啊哥同啊姨睇住佢。」
「所以你到而家都係未知佢尋晚打比你做咩？」他問。
我轉身望向後面。
「喂，」羅船長拍我一下：「你而家問黎有咩意思啫？」
「況且佢呢排神神化化咁，」他說：「問完都唔一定問到啲乜。」
「咁……」
「仲咁咩丫咁，黎緊三日兩夜大把機會，而家先係出發啫。」他搭著我的肩膀：「睇你尋晚都無覺好訓架喇，依家比自己好好咁休息下先啦。」
我聽他的，倚著窗一直睡到下車。
我們在深圳灣口岸過關後，到了廣州黃埔軍校和豐田車廠參觀。
太陽差不多下山的時候，我們啟程前往開平。
吃過晚飯後，老師替我們辦理酒店的入住手續。
「好喇，搞掂晒喇。」張晞易望著自己手上的名單。
「咦，呢度睇落環境都唔係想像中咁差啫……」
「你唔好話丫，可能入到酒店房會嚇你一跳呀。」
「唔好嘈住先，」張晞易說：「靜一靜，比我講啲野先。」
「而家呢，我就會分啲匙比你地，你地記住要搵人保管好佢呀，唔見左既話呢，係要賠錢既。」
我們靜默下來。
「聽到自己名既人就行出黎拎匙啦。」
張晞易逐一讀出我們的名字。
「陳子良，侯紹龍。」
甚麼？我沒有聽錯吧。
「哼，」侯紹龍冷笑一聲：「同你？」
「我都唔係咁想架咋。」我蹶蹶嘴。
「陳子良侯紹龍，」張晞易提高聲量：「叫緊你地呀，你地係咪耳殘呀？」
「你出去攞。」侯紹龍剔剔頭。
「攞咪攞。」我上前領了鑰匙。
慢著，剛剛我豈不是聽他使喚了嗎？
「子良乖。」侯紹龍伸手想要摸我的頭。
「乖你個頭。」我攘開他的手。
真搞不清楚究竟侯紹龍想些甚麼。
「好喇，咁大家而家可以上返自己果間房擺低啲野先，一陣記住跟返自己果組落黎搵自己果組既老師喇。」
侯紹龍……
「聽唔聽到呀陳子良侯紹龍？」
「聽到。」
我倆走著走著，不時打量一下對方。
「陳子良。」
「侯紹龍。」
「陳子良。」
「侯紹龍。」
「竟然要同個咁既人一間房……」侯紹龍嘆口氣。
「你估我又好想同你一間房架？」我望著升降機紅色的數字：「組又要同組，而家仲要同房添。」
升降機到了，我們擠進裡面，沒有再爭辯。
到了我們所屬的樓層，我倆步出升降機。
「你啊，唔好以為接力贏左我就好似好勁咁，唔好唔記得我四百米贏過你。」
「乜係呀？」總不能在舌頭上敗給這個侯紹龍。
「你接力贏我係靠你啲隊友咋。」
「贏就係贏，輸就係───」
周子若從轉角處走出來。
我和侯紹龍不約而同地裝作看風景。
雖然這室內倒是沒甚麼風景可以看。
「你兩個做咩仲企係度啊？」周子若問。
「唔知佢，」我聳聳肩：「我而家就返房先。」
「我都係。」侯紹龍說。
我取出鑰匙把門打開。
「快手啲啦，慢吞吞咁。」
「咪開左囉。」
「唉，呢兩晚竟然要咁樣過，」侯紹龍將背包一把擲在床上。
「我都唔係咁想訓係你隔離咋。」
「閘住，我呢一張床，你果一張床，無人要同你孖鋪。」
「你夜晚唔好諗住對我做啲咩呀。」
「我驚你多啲喎。」
「我對男人無興趣。」我說。
「大家咁話。」
「擺低啲野就好行，一陣遲到又比裝槍話。」
「裝槍？邊個裝槍？」
「張晞易咪叫John Cheung。」
「裝槍……」侯紹龍不禁笑一下：「呢啲咁無聊既野係得你地五信啲人先諗得出。」
張晞易向我們簡介了一下明天會做的事情。
「好喇，大致上係咁多。如果無咩問題既話可以返上去沖涼訓教，」他說：「記住唔好玩咁夜呀。」
一整天下來，終於可以好好地休息了。
「一陣你沖涼先啦，」侯紹龍說：「讓下你啲咁既細路仔。」
「你沖先。」我又怎麼會是小孩子？
「話左讓你沖先就係讓你沖先啦。」
我打開門。
「咁好，」我說：「總之我就唔係細路。」
「係你就認左佢啦……」
「我唔係。」
「我話你係就係。」
「你好煩。」
我沒他好氣，從背包裡面取了衣服和沐浴露等東西便走進廁所。
一陣溫暖的水灑在我的頭頂。
母親她應該沒甚麼事吧……
「唔好沖咁耐啊，聽唔聽到呀？」侯紹龍隔著門大喊。
「得喇煩。」
如果想要找周子若問個明白的話，甚麼時候才是適當的時機呢？
我將水龍頭關上，望著掛在牆上的衣服。
對了……毛巾呢？
「喂陳子良你係咪漏左條毛巾係床邊啊？」
「係。」不得不承認。
「你開門我攞比你喇。」侯紹龍在門外說：「你放心喎肯定唔會偷睇你。」
總是很不放心。
「係咪驚比我睇到你太細所以唔敢開門呀？」
「你就細！」
侯紹龍竟然會說這些話……
我把門微微打開，門隙之間探進了一條毛巾。
「唔該。」
我關上門，擦乾自己的身子，換上衣服。
「侯紹龍，」我從浴室走出來：「啱啱……唔該晒。」
「唔洗客氣，」他擺擺手：「舉手之勞啫。」
感覺上侯紹龍好像有些不同了。
「到我沖。」他拿著衣物走進浴室。
「攞毛巾呀。」
「知啦，你估我係你咩？」
我搖頭苦笑。
洗過澡後的他只穿著褲子走出來。
他的小腹上竟然有肌肉……
「望望望，有咩咁好望呀？」雙手擦著頭髮的他看看自己的小腹：「哦，想要呀？」
「想要咩？」
「你想要咩咪咩囉。」只穿著褲子的他雙膝跪在床沿，雙手按著床。
「你想做咩呀？」
「有乜野所謂啫？」他竊笑起來：「呢度得我同你兩個人……」
「唔好亂黎啊，」我身子往後靠：「我嗌架。」
他的臉愈靠愈近，愈靠愈近……快要碰到我的鼻尖了。
「白痴。」他冷笑一聲，然後爬下床。
剛剛他該不會是想……
「你唔係以為我真係會錫你呀嘛？」侯紹龍穿上衣服：「我錫周子若都唔鍚你啦。」
可惡。
「咩呀？唔抵得呀？你睇，我又大隻過你，又靚仔過你，就算點計呀，都係我贏啦。」
「唔會。」
「唔會係點？」
「周子若鐘意果個唔會係你。」我所認識的周子若就算喜歡上誰，都一定不會喜歡上侯紹龍。
「咪睇下點。」
日出後，我們一行人吃過早餐，乘車到開平的立園參觀。
然後我們到了赤坎古鎮，這裡的建築風格真的別樹一幟……
或許實際上是我見識太少吧。
「喂，難得一場黎到，影返幅全家幅先啦不如。」羅船長說。
「全家幅？」
「班相呀。」
「頭先咪影左囉。」
「果啲又點同啫，拿，而家呢度圍內八個……」羅船長指著遠處：「果度張長凳影啦。」
我們走到長凳前，讓幾個人坐下，我和另外幾個人站在背後。
「影相呀你地？」張卓蓉走過來。
「係呀，」羅船長刻意提高聲調：「矮妹你觀察力真係強既啫。」
「呵……」張卓蓉盤起雙手：「你串我？」
「你既判斷力都好強。」
「唔好咁串人啦。」我說：「係咪影架？」
「我又要影啊。」張卓蓉忽然挽著我的手臂。
「好喇好喇，」趙尚文將鏡頭對準我們：「我影架喇……一、二、三。」
「喂，」我看著身旁的張卓蓉：「你做咩無啦啦───」
「陪我去果度影相丫。」張卓蓉不住地搖我的手肘。
為甚麼她會這樣……
「張卓蓉，究竟你有啲咩瞞住我？」
一直拉著我走的她停住了腳步。
「瞞住你？」
「係。」
「唔……」她雙手交疊放在身前，微微頷首，身子緩緩地左右擺動：「你覺得呢？」
「我，」我深深地吸口氣：「我就係唔知先至問你。」
「你真係想我講？」張卓蓉水汪汪的大眼睛注視著我。
差不多整個月了，那個讓我百思不得其解的迷團……
可是張卓蓉會這般容易就告訴我嗎？
「陳子良，我，我……」她探頭靠近我耳邊，輕聲地說：「我鐘意你。」
「咩話？」我往後退一步。
「你仲想我講多次呀？」她的臉蛋愈來愈紅了。
「唔係咁既意思……」
「其實我想知既係，」我用手背頂著自己的眉間：「你同周子若之間既秘密。」
「乜，原來……係咁啊。」
望著張卓蓉茫然若失的樣子，感到有點不知所措。
「你啱啱先講既野，係唔係真架？」
「你，」她轉身背向著我：「你話呢？」
原來張卓蓉對我有這樣的深意……
「如果係真既……好對唔住，」我咬咬唇：「我鐘意既人唔係你。」
「你鐘意既人……係咪周子若？」
「係。」
背向著我的張卓蓉沒有再說一句話，漸漸遠去。
這天我和張卓蓉之間的氣氛變得很尷尬，吃飯的時候不知道該說些甚麼，走路的時候會有種莫名其妙的沉寂。
晚上回到酒店，張晞易跟我們交代了明天回香港的安排，便讓我們回房間休息。
「喂，」侯紹龍撞我一下：「係周子若。」
「我見丫。」
周子若一個人站在升降機門前等待著。
「你企係度，我而家就要證明比你睇，我贏你。」
侯紹龍走上前：「周子若。」
「啊，侯紹龍？」
「有件事想問下你。」侯紹龍展示出他最具自信的笑容。
真是有些受不了……
「問咩？」
「你可唔可以做我女朋友？」
「吓？呃……」周子若的目光移到旁邊。
啊，為甚麼要猶疑？該直接拒絕他啊。
「唔可以。」
這樣就對了。
「點解？」
「因為我───」
「因為你鐘意陳子良？」
侯紹龍這樣一問，周子若和我同時間抽了一口氣。
侯紹龍望著我。
周子若察覺到了，轉過身來看著我。
「咁，」他攤手聳聳肩：「咁好啦，我認輸。」
侯紹龍走轉身離去。
剩下對望著的我和周子若。
我走到她的面前。
「唔……」我將拳頭貼在嘴唇前。
「始終都係咁。」
「唔。」
「陳子良。」
「唔？」
她一把將我摟住。
真的……很溫暖。
「啱啱……侯紹龍問你既問題───」
「已經答左你。」她的手沒有鬆開過。
「咁點解之前要───」
「因為張卓蓉。」
「張卓蓉？唔通你一早就已經知道───」
「係。」
「點解你要咁傻？」我輕撫著她的長髮。
「我覺得咁會對你好啲啫。」她從我的背往上摸，摸到我的髮根。
「一啲都唔好。」我說：「既然你鐘意既係我，我鐘意既係你，咁點解要因為其他人而搞到咁樣……」
「良……」
「若。」
終於可以在一起了。
經過了這麼多的事情，終於可以將周子若抱在懷中。
這時羅船長從轉角處走出來，他看見了我倆。
他給我一個姆指。
「船長……」
周子若望向背後：「羅銘浩。」
「恭喜晒喎。」羅船長走過來。
「多謝你。」我說。
「客咩氣丫，小意思啫。」
他的心裡一定很難受……
我鬆開抱著周子若的手，一把扣住羅船長的肩膀。
「啊子良你做咩啊？」
「真係好多謝你。」雙眼開始看不清楚了。
「洗唔洗呀？」他拍拍我的背。
「要既。」我忍著淚：「好兄弟，我既好兄弟。」
「唉怕左你……想喊就喊啦。」
我伏在羅船長的肩膀上。
「好喇好喇，記住要好好對人呀知唔知啊？唔好枉我一番心……心機啊知唔知啊？」他的聲音漸漸模糊：「我頂你你條友仔，而家整喊埋我喇，安樂啦？」
「哈哈。」
「仲要笑。」他捂著鼻子：「好喇我走先喇唔阻你地兩個。」
「一齊行啦，」周子若說：「你認為我地仲有咩可以做啊？」
「唔知架，呢度又係酒店……」羅船長擠擠眼眉。
「丫你個羅銘浩……」周子若用手肘撞羅船長一下。
「咁有好多野可以做架嘛，例如係談心。」
「好呀，陳子良，」周子若牽起我的手，轉動一下手腕：「我地而家就談心。」
「啊，」羅船長擋住自己雙眼：「救命呀，快啲搵人比副黑超我。」
「行啦，仲係度玩。」周子若走進升降機。
「多謝你。」
「夠喇，同一句野講三次你煩唔煩啲呀？」
「因為我除左多謝之外真係唔知應該講咩好……」
「我到喇，你同羅銘浩慢慢談心啦。」周子若揮揮手：「聽日見。」
「聽日見。」
「羅───」
「好喇好喇，在心中啦。」羅船長捶捶自己的胸口。
「嗯。」
回到自己的房間，看見侯紹龍背靠著枕頭，盤著手坐在床上。
「返黎喇？」他望向我。
「唔。」
這情況有點尷尬。
「你贏左喇。」他說。
「點解要係我贏左？」
「點解贏左既人要問點解？」
「因為我唔明點解一定要分勝負。」我坐在床沿。
「你追到周子若就自然係你贏。」
「我從來都無贏過你，」我說：「因為你根本就唔係鐘意周子若。」
「你咁講咩意思？」
「我覺得由始至終，係你唔忿氣。」
他被自己的好勝心蒙蔽了。
「你鐘意既只係贏，而唔係周子若。」
「我……」
「唔係咁咩？」
「你講得啱。」他咬一下唇，然後說：「由細到大我乜都要同啊哥爭，偏偏成日都爭輸比佢。」
「爭黎又有乜謂？」
「經你咁講一講，其實又真係幾無謂既……」
「咁就唔好再爭落去喇，因為好似你咁不可一世既人，真係好乞人憎。」
「我……我明喇。」他將拳頭仲向我：「多謝你。」
「唔洗。」我跟他碰拳。
「仲有，恭喜晒。」
「多謝。」