人來人往,你為甚麼要回來找我...: 22
「良啊，不如今晚我地出去食囉好唔好呀？」母親問。
「好呀，得我地兩個？」
「係啊，你唔記得左芳姨今晚去打牌咩？」
「咁去邊度食？」
「屯門市中心覺得點？」
「好啊。」
「我想行下吉之島，」母親揚起眉毛：「你地聽日咪上廣州玩既，咪睇下有咩需要買囉。」
和母親在市中心下車，走到商場內的吉之島百貨。
「嘩，乜原來呢度間吉之島咁大架？」
母親的雙眼就像小孩鑽進了遊樂場那樣透出光茫。
「之前咪黎過囉。」我掃視一下四周的環境：「同老───」
糟了。
「係喎，真係同你老豆黎過喎。」母親擠出一個微笑。
「同你老豆黎過，」她的鼻翼微微地煽動：「同你老豆……」
「媽。」我攬著她的肩膀。
望著雲白色的地板……我說了些不該說的話。
「啊良呀……」
「係。」
「你知唔知，係我生你呀哥果陣，差啲無左條命仔。」
「之後老豆佢趕黎醫院睇你丫嘛。」我說。
「呢樣我講過好多次，不過仲有樣野係你唔知既。」
還有一件我不知道的事？
「佢趕黎果陣時開緊一個好重要好重要既會，佢係佢老細同個大客面前丟低句『我老婆出左事』就走左去。」
「跟住呢？」
「個醫生好野，救返我條命之餘又保得住光仔。」母親搖頭淺笑：「我醒返之後你老豆先趕到黎。」
「咁……」
「實情係佢咁遠水路趕黎都晒氣。最後我就無事，佢就無左份工。」
「無左份工？」
「果次佢就咁走左去得罪左個大客，個大客脾氣好古怪，其實老細都唔想，之但係又無辦法……」
我也替父親感到不值。
「老細嘗試過同個大客解釋，最後都係被逼要炒左佢。」母親說：「不過咁……老細都算好人架喇，私底下比左一筆錢老豆。」
「而果筆錢就拎左黎───」
「係新北江開模型舖。」
這就是父親的故事……是我聽過最完整的版本。
難怪父親對開模型店之前的事一直住口不提。
或許是他覺得自己做了一個錯誤的決定吧……
不過，我很佩服他。
一個男人，為了自己的女人二話不說便撇下所有事情……
這已經證明父親有多麼愛母親。
「媽。」我掏出手機。
撥個電話給父親讓他們兩個人好好談一會兒吧。
「媽？」
忽然右手臂感到觸不著母親……
母親失去了平衡。
「媽！」我扶住她。
她失去了知覺。
我召了救謢車，陪著母親進了屯門醫院。
一路上母親也沒有醒過來。
發生了甚麼事？
「千祈唔好有事……」坐著的我彎下腰，雙手合十，手肘壓在大腿上。
父親當時焦急的感覺就是這樣嗎？
如果現在給父親一個電話，我相信他的選擇仍然會是一樣。
「喂？」
「老豆。」
「做咩事呀？」
「啊媽出左事。」
「吓？呃，咁你同佢而家係邊？」
「屯門醫院。」
「得我即刻過黎。」
果然沒有令我失望。
「姑娘，我係張悠燕個細妹張悠芳呀，想問聲我家姐而家係邊度啊？」芳姨來了。
「哦張小姐呀……請你等一等───」
「芳姨！」我揮揮手。
「哦，搵到喇，唔好意思唔該晒呀姑娘。」
芳姨走過來：「你啊媽依家佢情況點呀？」
「未知。」
「有無話要做手術呀？」
「無。」
「發生左啲咩事呀？」
「我自己都唔清楚，」我吁口氣：「同佢行行下街佢就無啦啦暈左。」
「無啦啦暈低？會唔會係有啲咩───啋！」芳姨猛然地搖頭：「唔會既唔會既，啊姐佢肯定會大步揇過。」
拜託，母親千萬不能有甚麼事。
突然電話響起了。
周子若？
「喂？陳子良……」
「呃……你，」我嚥口涎：「你打黎做咩？」
「喂！」哥的喊聲嚇得我怔了怔。
「陳子良，」他指著站在他身旁的父親：「係咪你叫呢個人黎架？」
我捂著電話，對周子若說：「唔好意思，我一陣再打返比你。」
掛斷電話後，我站起來。
「係，係我叫佢黎既。」
「你叫佢黎做咩？」
「而家出事果個係我地啊媽呀。」
「你仲認佢做老豆？」
我望向父親，他一臉木然。
「啊媽佢而家點？」父親兩手撐在腰後。
芳姨走到他面前：「你個衰人仲有面返黎見啊姐？」
父親鼻孔噴著氣。
「咩呀？依家唔出聲就得架喇咩？」
「唔好嘈啦！」我大喝一聲：「呢度醫院黎。」
父親左手依然撐著腰，右手食指和姆指輕輕調整一下眼鏡。
他坐下來，盤起雙手。
「呢個咁既老豆呢，我就點都唔會認架喇，陳子良你自己諗清楚啦。」
我緩緩地抬起手，伸手指向分隔著母親和我們的那扇門：「其實，而家啊媽佢仲未醒返。」
「我，我……我緊係知啦。」芳姨擦一下眼角的淚。
「芳姨，你只係佢細妹，」我望向哥哥：「我地只係佢個仔，佢地先至係兩公婆。」
父親合上眼，撐起眉毛，然後睜開眼。
「點解屬於佢地兩個既事，要搞到由我地去決定？」我在父親旁邊坐下來。
「我相信，啊媽佢個心仲係好掛住老豆，」我搭著父親的肩：「老豆亦都係。」
既然兩個人的心是連繫在一起的，為甚麼不能待在一起呢？
這時醫生走出來：「想問你地係咪張悠燕既家屬？」
「係，我老婆佢點？」
「病人已經醒返喇。」
醫生讓我們進去看母親。
「健。」母親望著父親。
「老婆。」
「我好掛住你……」
「我戒甩左。」父親彎下身子，撥起母親額上的頭髮。
「對唔住……」母親抖著的手伸向父親。
「對唔住。」
「光、良，叫老豆啦。」
「老豆。」我說。
哥哥把目光移到別處，抓抓自己的後頸，擠了擠臉頰：「老豆。」
「芳。」
「得喇啊姐，我明架喇明架喇……」芳姨在自己的臉前擺一下手。
「係喇……喂，良仔仲未食飯架，仲有佢聽日就要上廣州。」
想不到母親這種情況下還惦記著我的事情。
「媽，咁你無事丫嘛？」我問。
「我無，醫生話我呃……壓力太大，操勞得滯啫。」
是因為父親吧……
「我陪啊良去食啲野先，一陣再送佢返富健執野啦。」父親說。
「好啊，有啊芳同啊光係度睇住我得架喇。」
父親伴著我吃了點東西，然後送我回到富健花園。
「到喇。」他說。
車停在這迴旋處，與上一次的位置相約。
不同的是，我覺得離自己的家更接近了。
「上唔上黎坐下？」我拉開車門。
「唔喇。」
「阻住你做生意？」我聳聳肩：「難得咁耐無見。」
「你要執野丫嘛，」他轉過身來：「有啲咩接返你媽咪返黎先再慢慢傾啦。」
「唔，咁好啦，」我拍拍墊在他背後的竹席：「我走喇。」
「拜拜。」
我走了兩步，背後傳來父親的聲音。
「仔，多謝！」父親隔著降下的車窗大喊。
我揚手目送他離去。
總算回到家了，收拾好行裝後只能小睡片刻。
不過這一切都變得不重要了。
我跟周子若可以像父親跟母親那樣嗎？
可以的，只要周子若對我還有一絲思念……
我倆的心一定可以連繫在一起。