人來人往,你為甚麼要回來找我...: 19
隔天回到學校的時候，身旁的周子若好像起了些甚麼變化。
「喂周……周子若。」
「唔？」
「究竟前日發生咩事……」
「唔好提。」
「點解？」
「唔該你唔好再問。」
那麼之前一個多月所發生的事又算是甚麼？
怎麼對我的態度可以轉變得這樣的快？
「如果我地仲係朋友既話……」她勉強地壓著眼眶：「就唔好問。」
我並不是想要把你弄哭。
我只是想知道答案……就算是一個簡單的答覆，總比現在好。
「唔，我明白喇。」
根本就完全不明白。
「多謝你。」她用手背壓著鼻尖，然後緩緩地離開自己的座位。
「喂，表成點？」羅船長走到我身旁。
「不如一陣食飯先講。」
要將這件我也搞不清楚的事表達出來其實是件難事。
「照舊啟豐啱唔啱？」羅船長問。
「好啊，啊草都一齊呀？」
「佢都有份架，」羅船長笑了笑：「坐低先講坐低先講。」
這天的餐牌好像挺難選擇。
「我跟你啦。」我說。
「喂喂，乜你好似無黎精神咁架？」羅船長一拳捶在我的手臂上。
「頂你認真架？」我捂著自己的手臂。
「快啲自己揀，」羅船長指著餐牌：「唔準跟我呀拿。」
勉強選了個能吃的。
「好喇，咁我地而家開始啦，我地『良若行動』既第一次秘密會議。」羅船長雙手交疊，凝重地望著我。
「喂幾時改埋啲咁低能既名架？」啊草輕輕地拍一下桌子。
「咁拉埋陳子良同周子若既行動，唔叫『良若行動』唔通叫『子子行動』呀？」
「算啦，唔好係度拗埋啲咁既野。」我說。
「咁你開始講啦，表白表成點？」
我深深地吸一口氣……實在太難啟齒了。
「講啦。」
「我……我比佢拒絕左。」
「吓唔係呀嘛？無理由架……照計───拿你搞清楚先，」羅船長以雙掌對著我：「由始至終我都係真心想幫你既，我唔係有心想害你。」
「我知。」
「咁依家……呃，你介唔介意講下果日發生左啲咩黎？」
「我前日同佢去左新北江───」
「樂湖果個？」羅船長問：「點解既？」
「果度我最熟丫嘛，我由細到大都住係果度。」
「哦，即係果度係你主場啦？」
「可以咁講既……我同佢係商場入面行，一齊買衫，一齊食飯，算係普普通通，無咩特別事發生。」
「係咪你成棵聖誕樹咁呀？」
「吓，聖誕樹？」
「即係你唔夠主動呀。」
「我咁都仲叫唔夠主動？」
「喂你比啊良講埋先啦。」啊草插口。
「好，你講你講。」
「我諗……都無架喇，食完飯之後行多陣就搭輕鐵返屯門───」
「喂表白呢？表白呀，成趟行程裡面最重要果樣野去左邊？」
「到左屯門之後，我同佢係美樂落車。」我說：「我拉住佢隻手，烏低身，係佢耳邊同佢講果四隻字。」
「跟住呢？」
「跟住張卓蓉突然間打比我。」
「矮妹？點解佢會無啦啦打比你架？」
「無，佢叫我還書啫。」
「好叫唔叫呢個時候黎叫人還書，阻鬼住晒。」
「咁又唔怪得佢。」我說。
「你繼續講。」羅船長攤著右手。
「之後周子若突然間搶走左我個電話，佢唔知同張卓蓉傾左啲咩黎之後就收左線，還返部電話比我。」
「之後佢就拒絕你？」
「係……佢同我講，我地唔可以係埋一齊。」
為甚麼……
每次想起這句在我腦海裡繚繞不停的話時，心裡總會湧出十萬個為甚麼。
「呃又會咁既？」羅船長緊皺著眉，猛然地抓著頭髮：「問題出係邊呢？」
「我自己諗極都諗唔明。」
「之但係我硬係覺得有邊個地方有啲奇怪。」他的頭一直轉，手指由耳背抓到後腦勺。
「咪住先。」啊草忽然開口：「點解佢會話『我地唔可以係埋一齊』既？」
「咪因為佢唔鐘意───啊！」
我雙手拍在桌上，坐直了身子。
「我明喇。」羅船長右拳一下打在左掌心上：「離奇就離奇在點解佢唔係話『我唔鐘意你』。」
「更何況你連好人卡都無收，」羅船長伸手過來搭著我：「呢場波仲有機會打落去。」
就是說，她只是因為某種特殊的原因而被逼要拒絕我。
「子良，知唔知想當年，車仔對雷丁果場波係點贏架？」
「點贏？」
「係半場落後一比二既情況底下，完場前三十分鐘排出四一五既戰術，之後連追三球反超四比二。」
「你既意思係……」
「進攻，進攻，同埋進攻。」
「我諗啊浩既意思係叫你無論如何都一定要搵個答案出黎。」
「無錯，你有咁既實力同機會，就應該繼續上全力上。」
「多謝你。」我一把擁著羅船長。
感謝你給我這麼明確的指示。
「傻啦。」他拍拍我的背。
接下來我要做的事……就是將周子若和張卓蓉所隱瞞的秘密查個水落石出。
「喂朱咕力，幫我去拎啲雪糕筒出黎丫。」黃老師將鑰匙拋給巧克力。
「今堂玩雪糕筒呀PE Wong？」
「玩你個頭，跑九分鐘呀。」黃老師說：「快啲去熱下身拉下筋先啦你地。」
「喂，你知九分鐘係咩黎架可？」羅船長在我的身邊跟我一起跑著。
「知，點會唔知呢？」我說：「我本身間學校都有體育堂架。」
「呀又係喎。」
「好喇，」黃老師拍拍手：「熱完身就兩個人一組啦。」
「我地一齊啦啊子良。」羅船長說。
「吓，哦。」
羅船長的成績是十六個圈。
「到你跑喇。」他跟我擊掌。
剛開始的時候，見周子若走在前面，於是我加緊腳步追上前。
「周子若，」我說：「講出黎，我知道件事，一定有啲咩秘密。」
她沒有望我一眼：「你都知係秘密，你叫我點講出黎。」
「用口講。」
「放棄啦。」
「我唔會放棄。」
她不再講話，我依然隨在身旁。
在我倆之間傳遞著的，就只剩下呼吸聲。
重複發問同樣的問題恐怕也不會得到答案，就這樣等著吧……等她開口。
她的口不住地呼氣，卻沒發聲。
九分鐘過去了。
「周子若，十七個圈。」
「唔……十七個，幾好幾好。」黃老師點點頭。
「陳子良，十七個。」
「又係十七個……下次唔好再做陪跑員喇。」
呃，陪跑員。
「話緊你呀聽唔聽到啊？」黃老師笑著說。
「係。」
「你兩個係我堂入面耍花槍吓嘛。」
我望著周子若。
「粒聲唔出……下次唔好咁明顯喇知道未呀？」
「哦。」我尷尬地點點頭。
周子若轉身離去。
「若。」我走上前。
「唔好再係咁。」她突然回頭，指著我：「唔係既話我唔再理你。」
我停在原地，目送她的背影。
睡前電話傳來一個訊息。
「有無事啊你？今日見你好似好唔掂咁喎。」
沒想到張卓蓉也會問候我。
「無乜野。」
「仲係因為果件事？」
被她說中了。
「唔好成日諗住果件事啦。」她說：「咁樣唔係辦法。」
至少目前為止我還未想到任何可行的辦法。
「我淨係想知個答案。」
「咩答案？」
「周子若───」不對，周子若拒絕我的原因是因為她和張卓蓉的對話。
我把「周子若」三個字刪掉。
「果日你地兩個講左啲咩黎。」
「我講過好多好多次，真係唔講得呀。」
又是這樣。
「既然周子若佢都唔肯講比你聽，咁我又點會講？」
這根本就是個死胡同。
當天交談的人只有她倆，除此以外，便無跡可尋。
「唔好咁啦……」
就算是找上啊敏，找上羅船長，也不會有進展。
我關上電話的屏幕。
怎麼辦……
電話再次亮起來：「其實你問黎做咩喎……」
因為這件事，一定跟我有關。
我將電話擱在枕邊，沒有再理會它。
手按在自己燙熱的額上……
睡不著。