人來人往,你為甚麼要回來找我...: 10
踏入了十月的第一個週五，是課外活動開展的日子。
「喂啊子良，你揀左啲咩呀？」
「畫畫。」
「嘩，真係夠晒多餘智能喎。」
「多咩餘呀？畫畫不知幾好。」周子若走過來。
她帶著我走到繪畫班的課室。
「隨便揀個位坐低先啦。」站在黑板前的女老師向我和周子若和藹地笑笑。
老師簡單地介紹了自己，然後說明了繪畫班成立的目的和接下來一整年會做的事。
「好喇，跟住落黎，就到你地自己畫畫既時間。」畢老師頓一頓：「不過呢，我想你地分成兩個人一組，畫畫之餘仲可以認識下大家。」
我的將目光移到周子若身上，怎料她水汪汪的大眼睛也在看著我。
我倆相覤而笑。
「互相認識下喎。」周子若笑著說。
互相認識嗎？我靦腆地笑一下。
「你地自己出黎攞畫紙啦，出面仲有唔同既工具，你地有需要既可以出黎攞。」畢老師說。
周子若拿來了一盒木顏色筆和一支鉛筆。
「咦，一支鉛筆？」
「係呀，我畫，你上色。」
就是說，在她完成之前我只能呆呆地看著她。
「你畫緊……屯門河？」
「係呀。」
「乜屯門河真係咁……」
「都唔係架，只係我一時間淨係諗到屯門河，咁咪畫屯門河囉。」
她下筆相當肯定，紙上的線條看不出絲毫的抖動。
「陳子良……」她專注地看著手底下的紙。
「唔？做咩？」
「無野，」她說：「係呢，你覺得啊全佢點啊？」
為甚麼周子若會突然這樣問呢？是對鹿仔有興趣的意思嗎？
「佢份人？」
「嗯。」
「我覺得……」
「照直講啦。」
「點解咁問既？」
「因為……呃……我知喇，你以為我對佢有意思？」
我深深的吸了口氣。
「欸，唔係你諗咁架。」她笑著說。
「咁即係───」
「你答左我先啦。」
呼。
「我覺得佢同一般人唔同。」
「同一般人唔同？」
「呃即係……我唔係貶低佢既意思，我係想講佢諗野既方式有啲特別，有時會好搞笑。」
「嗯。」
「佢諗到乜就會講乜，有時又會講錯野。」
「我都覺。」
「點講都好，佢份人幾易相處既又。」
「有樣野想搵你幫手。」
「吓，幫咩？」
「綴合啊全同埋逸茵。」
「哦乜係……吓，鹿仔同黃逸茵？」
「係，」她把頭靠近：「啊全佢鐘意逸茵。」
「咁，咁應該點做？」
原來這個就是周子若煞有介事的原因。
「就係唔知應該點做先問你咋嘛。」
我無奈地笑笑。
「唉，算啦，到時到候就會自己搞掂架啦。」
「咁你搵我想我點幫你？」
「欸，咁啱諗起啫。」她說：「畫好喇。」
她將畫紙轉過來，上半邊是天，下半是河，中間的是一條橋。
「條橋係……」
「公園果條呀。」
「咁都比你諗到，好靚。」
「話晒我都係綠社美術喎。」
我被逗笑了。
「唔準笑。」
「唔笑。」
「上色啦你。」
我凝神端詳著這條注滿線條的屯門河，然後選了紅色、橙色和黃色。在水平線上用橙色框出一大個半圓，圓形裡填滿黃色，在天空掃上一陣淡紅，在湖面抹下更淺色的倒影。再用橙色和黃色補上夕陽映照在湖水中的餘暉，最後用黑色塗去多餘的空白，留住日落的餘溫。
我滿意地放下顏色筆。
「你用色真係用得好勁。」
「乜係咩？」
「我甚至聽得出屯門河既寧靜添呀。」
「有無咁誇……」
這時在我們身旁經過的畢老師忽爾停下。
「咦？喂唔錯喎，」她彎著腰：「認真唔錯。」
「咁多位同學你地睇下。」她拿起畫作：「呢幅畫既著色好有觸覺，最大力，最深既唔係橙橙黃黃，反而係黑色。偏偏咁樣既黑色竟然可以襯托出淡淡既暖色，我覺得呢位同學做得相當之唔錯。」
沒想到連畢老師也讚不絕口。
多元智能課程的課節完結後就是放學，不過今天放學是綠社的啦啦隊排練時間。
「大家記唔記得上次我地練果啲動作呀？」鹿仔問。
「喂，啊鹿，」背後傳來一把女聲：「其實啲舞改唔改得架？」
我轉身一看，那個發聲的女孩個子長得太小，只能隱若地看見她紮著高高的馬尾。
「你想改咩先？」
「你扭扭下果幾個動作係就係幾好，不過我硬係覺得唔夠型。」
看到了，這個臉蛋圓圓，戴方框眼鏡的女生是副社長林惠喻。
「我就覺得應該做個型啲既開頭，」林惠喻走出來：「拿，首先呢，就交叉手，垂低頭望住地下。之後音樂一起呢，就咁樣，之後咁樣……」
「又好似幾好咁喎。」有人開始贊成這個提議。
「咪住先咪住先，」周子若說：「不如比返啊全佢諗啲舞步啦，始終佢先係啦啦隊隊長。」
「點解淨係佢先可以諗舞？我地全部人都係綠社架嘛。」
「如果咁樣既話，會搞到好亂架。」
「可以有幾亂？我地都係想比啲意見啫。」
周子若和林惠喻各執一詞，氣氛變得緊張起來。
「喂，唔好嘈住，」鹿仔舉起雙手：「其實我就無咩所謂既。」
「喂啊全你───」
「周子若呀，而家人地啦啦隊隊長自己都話無所謂啦，你仲咁固執做咩啫。」
周子若不忿地望著林惠喻。
「其實呢，我地大家都係為個社好啫，唔洗搞到咁既。」林惠喻上前搭著周子若的肩。
周子若垂下頭。
「做咩啫，一齊諗又好，鹿仔諗又好，唔好傷和氣至得架。」羅船長走出來。
「咁，大家一齊傾下可以點排啦。」鹿仔說。
接下來林惠喻建議了幾套動作，我覺得挺好的。
「開頭就咁樣，去到分開四行踎低果陣時，四拍就第一行既人起身咁樣轉，之後第二行，第三行相反方向，第四行跟住。」
一連串的動作簡單而且有板有眼，我們很快就學起來了。
「跟住落黎不如練返啊鹿上次教果啲丫。」
「咁好啦。」鹿仔說：「仲有無人記得上次果啲動作點做呀？」
我的記憶亦有點模糊了。
「不如啊茵你出黎試下丫。」
「我？」
「我唔係針對你，比啲信心自己，你做到既。」
黃逸茵遲疑地走出來。
舉手，右腳小跳步，左右手繞過後腦勺和頭頂，彎下腰，轉右臂，轉左臂……
雖然動作略嫌生硬，不過勉強過得去。
「跳得好好。」
「真係架？」
「係呀，不過雙手係前面拉手掙果個動作呢，對手可以高啲。」鹿仔執起黃逸茵的小手。
「咁樣啱唔啱呀？」羅船長將雙手擺在胸前。
「咁樣呢，係唔啱既。」鹿仔當然知道羅船長是在戲謔他：「雙手，應該放到鎖骨咁高。」
「咁樣？」黃逸茵比羅船長認真多了。
「嗯。」鹿仔點頭：「跟住落黎跳返兩人果part，不如啊茵你同我一齊跳丫。」
「吓？小全你唔要我喇？」羅船長故意將聲線壓得很嬌媚。
「我諗過架喇，我地多左出黎果個人負責拎社旗，無理由要啊茵佢拎社旗架係咪？」
「咁好啦，」羅船長高舉右拳：「揸旗呢啲咁既重任就交比我啦。」
我們跟著鹿仔和黃逸茵的動作練習，直至入黑。
「好喇，時間差唔多喇。」鹿仔說：「上次啊良同啊若你地去買果啲衫係咪而家派？」
「係呀。」
周子若和我一起將衣服分給他們。
「咁褲呢？」突然有人問起。
「著返運動褲得啦，幫個社慳返啲錢。」周子若一邊派一邊說。
「好，如果無咩事既話拎左衫既可以走先。」鹿仔說：「唔好整唔見呀。」
「啊茵，可唔可以唔好走住，想同你傾幾句先……」鹿仔走到黃逸茵身邊。
「喂，快啲派完衫好走喇我地。」周子若悄悄地說。
我倆很快就收拾好然後離去。