人來人往,你為甚麼要回來找我...: 8
在星期五的晚上，電話響起了。
是周子若，找我找得這麼突然。
「喂陳子良，聽日得唔得閒呀？」
「吓，聽日？得閒既，做咩？」
「陪我去買衫。」
「陪你去買衫？」
意思是約會嗎？
「欸呀，係啦啦隊衫呀，諗左去邊呀你？」
「買啦啦隊衫都要我陪？」
「緊係啦，又係你提議話買淨色衫既。」
「咁……」
「仲咁咩呀？聽朝十一點屯門站等啦。」
比相約的時間早了一點到達，就等一陣子吧。過了十一時正，為甚麼還未見到周子若呢？
在這條天橋上面有不少人往來，卻不見她的身影。
掏出手機，看見周子若的來電。
「喂，你係邊？」她問。
「我到左喇。」
「到左？唔見你既。」
「我都唔見你。」
「你係邊？」
「我？我係條天橋上面。」
「咪住先，你係市中心落左車？」
「係呀。」
「你……你落錯車啊。」
「吓？」我環顧四周：「呢度唔係市中心咩？」
「係就係，不過我而家唔係你果邊。」
「咁，咁點算啊？」一陣不安的感覺由腳底冒上來。
「你而家係邊？」
「我……我行左入個商場入面。」
「商場入面？」她把聲線壓低：「拿，跟住落黎，聽我講。」
我停住腳步：「係。」
「你而家見到啲咩？」
「我左邊係粉紅色既化妝品鋪頭，前面係條天橋，寫住屯門市廣場。」
「唔好過條天橋，轉去你既左手邊，見唔見到聖安娜？」
「見到。」
「行果邊，再前啲好似係豐澤，再過埋條天橋。」
「等我一陣。」沿著她所說的路線走，愈走愈著急。
「過左天橋喇。」我說：「我見到Starbucks……仲有小雲川。」
「無錯喇，繼續行啦。」
「到錦薈坊。」
「錦，咩話？錦薈坊？」
我不敢再向前走。
「你行過左龍。」她說：「返轉頭，留意住你既右邊，有條天橋，穿出去。」
真的像她所說那樣，推門而出，離開了室內，一陣風撲在臉上。
「向前行之後向右轉，一直行就會行到黎Vcity架喇。」
聽到她這樣說，我好像放心了一些。
走過一條長長的走廊，步上一條電梯，往右邊一看，正是周子若口中的「Vcity」。
「我入左Vcity喇，而家見到周生生。」
「你沿住右邊走就無錯架喇。」
冷氣噴在我這個急得像熱鍋的身體上，叫我感覺愈發昏亂，要是找不到周子若……
「見到你喇。」耳邊傳出她的聲音。
眼前站著一個女孩，穿著滿佈白色圓點的黑色短袖棉衣，藍色的短褲，臉上掛住熟悉的甜笑。
幾經辛苦終於找到她了。
「對唔住。」
「唉，咁都搵得到黎算你犀利。」她說：「行啦，買完衫之後去食飯。」
「係喎。」我站住。
「得啦，我早就撳定錢。」她步進面前這家服裝店。
「其實點解要係度買衫既？」
「你話淨色嘛，既然係淨色就緊係UNIQUO啦，上次淘寶果啲衫買返黎著到甩晒色，搞到趙尚文都無眼睇。」
我們找到了純綠色的短袖綿衣。
「喂，若呀。」我用手臂撞了撞她的肩膀。
「唔？」
「你知佢地咩碼咩？」
「知，點會唔知啊？」她邊說邊將一件件的衣服疊在懷裡。
忽然間一個從轉角處冒出來的理貨員撞在正抬頭望著貨架的周子若。
「啊。」周子若禁不住向後傾，我伸手扶著她的肩膀。
幸虧周子若並非身輕如燕的女孩，被撞個正著的她用手臂緊緊地抱著懷中的綿衣。一個勁兒撞在她身上的女孩反而跌坐在地上。
「好痛啊。」那個矮小的女孩接著自己的額，一道水平線的劉海，方框眼鏡底下清澈明亮的瞳孔，還有小圓鼻和小嘴。
「逸茵？」周子若扶起她。
「係你地？」黃逸茵站了起來。
「點解你係度做既？」
「我……」她迅速地察看一下四周。
「係咪唔係咁方便講？」我也往周圍瞥瞥。
「唔係既，而家做緊野，不如等陣食晏先同你地坐低慢慢傾丫。」
「好啊。」周子若說：「喂，呢度啲衫，有無折先？」
「呃……有，」她從口袋中摸出一張卡：「拎住呢張野埋去比錢，佢會計平啲比你架喇。」
「多謝喎。」
「一陣間我放晏打比你丫。」
「好啊。」
跟著周子若去櫃檯前結賬，然後替她拿著一大袋的衣服。
「重唔重呀？」
「得啦。」
「欸，幫你拎幾件喇。」步出店外，她停了下來。
「做咩？」
「無，諗緊一陣間去食咩好啫。」
「要等埋黃逸茵丫嘛。」
「咁啱晒喇今次就，」她用食指點著我的鼻尖：「你正正式式咁陪我行街啦。」
「吓。」真的嗎？
「吓咩吓，乜而家我好失禮你咩？」
「咁又唔係。」
「咁行啦。」
在這個像迷宮一樣的大型商場內，看來除了跟著她的腳步外，沒有別的辦法可以找到出路。
「喂，我地要去邊？」
「唔知架，行到邊咪去到邊囉。」
「一陣黃逸茵會唔會搵唔到我地架？」
不過，這樣子挺好的。
「一陣先算啦唉。」
她用溫暖的手輕輕地扣著我的手肘，帶著我走在這個迷宮。她彷彿知道我不想走得太快，並沒有把我拖行著。
「走返屯市好唔好？呢度啲野食好似太貴。」
其實我也不懂分辨。
剛剛為了尋找她，焦急地踏過這條路，現在和她並肩經過這來時的路，有一種不同的感覺。
周子若的電話響了起來。
「逸茵？」她側著頭講電話：「我地返左屯市果邊呀。」
細心察看一下周遭的環境，我發現自己經已失去了方向。
「我同陳子良而家係二期果邊呀。」
身邊是一間間的珠寶店。
「食味千？好呀，咁我同佢搵定位等你丫。」
周子若拍拍我。
「一陣見。」她掛掉了電話。
「味千點去架？」
「落電梯。」
等得黃逸茵到了，我們點了一些吃的。
「點啊？講得未？」
「唔？」
「你同啊全啲野呀。」周子若把臉往前靠。
「吓，我？我同陸裕全？」
「呃……我……我係指社呀，啦啦隊呀。」
「又關陸裕全事，」黃逸茵皺眉：「唔關佢事囉好唔好。」
「咁上次你做咩無啦啦走左去既？」我忍不住開口。
「其實果次……係我唔啱。」她垂下頭：「咁啱屋企發生左啲事。」
「所以要趕返屋企？」周子若問。
「唔係。唉，其實係我屋企呀媽，呀媽佢份工辭左職。」黃逸茵嘆口氣：「咁屋企又有細佬要養，我走出去搵份兼職啫，咁又話唔啱。又話讀書讀書，讀乜鬼啫，我都唔係讀書既材料啦。」
我和周子若都答不上半句話。
「我呀，係綠社入面，係個文書仔黎啫，咁都要叫埋我去跳乜鬼野啦啦隊。」她愈講臉容愈繃緊：「我已經好努力去跳架喇，偏偏跳黎跳去都係……」
我聽得鼻子也酸酸的。
「其實啊全佢唔係有心話你架。」周子若說。
「我，我明白……」
「我地都係想幫你。」
黃逸茵頜首。
「其實，有咩問題都可以同我地傾，尤其是係啊全。」
「吓？」
「佢一定會盡力去幫你。」
「陸裕全佢會幫我？」
「唔好睇佢傻下傻下咁，佢只係唔識點去開口啫。」
為甚麼周子若總是要強調鹿仔呢？或許據她的瞭解，他能夠幫得上忙吧。