我係網上面識左個女仔: 第八章-見面

星期六話咁快就到，呢幾日我地都有傾下計嘅，都係講下LOL咁……

我十二點鐘就起左身，為今日嘅見面做準備，話曬第一次見，留個好印象好重要架嘛。

首先要刷牙洗臉，刷牙要刷得乾淨啲，我刷左兩次，洗臉要洗得乾淨啲，我偷偷用左阿媽啲洗臉奶，然後順便gel gel個頭。跟住係著衫，格仔恤衫配牛仔褲就夠普通得黎又不失帥氣，雖然我都知我係唔會著得「帥氣」……更加重要嘅係其實我冇恤衫，除左校服。T-shirt牛仔褲都得嘅，我見得人嘅上衣就得幾件，灰色淨色加logo，深藍色底米奇老鼠公仔，白色底海賊王公仔有帽，校服，但係其實件件都唔係太ok，最後，我著左淨色，加外套遮住佢。外套方面，我揀左件黑色風褸，鞋方面就普通波鞋，最後係袋，咩背囊好似怪怪地，都係斜咩袋啦。

形象終於搞掂，其實都搞左成個幾鐘，然後就先食野填填肚。

樓下有大家樂大快活M記同茶記，理所當然我去做最有人情味嘅茶記。





今日唔食豆腐火腩飯，「老細A餐凍檸茶少甜！」。

然後就係返屋企等。

期間Anna都有搵我。

「Frog～～」
「？」
「你記得今日要出黎個何？？」
「sure la」




「其實我有少少期待見到你真人XD」
我唔止少少添，我第一次俾女仔約呀！好向左走向右走緊張添！

「me2 haha」
「:)」

然後我就呆等到兩點幾，然後出發，早到都係好重要。

終於，14：40我就到左，我開左數據，同Anna溝通。





「我到左啦」
「咁早！？我仲未出門口【笑喊】」
「你班朋友到左未？到左你話我知」
「未呀」

14：45。

「Frog！！不如你比你whatsapp我？我手機冇facebook，出左門就搵唔到你！」
比唔比好？又係呢條問題，唉，同一條問題答案都只得一個，我思考左陣就答佢。

「6×××1×××」
「我係9×××7×××呀:)」

跟住電話就響起，9×××7×××傳信息給我，「我係Anna呀～hi～～?」
我即刻set番個聯絡人名，就同佢Whatsapp，依家係14：48。





「Hi~你依家係邊?」
「就到啦！！我著粉紅色T-shirt藍色短褲～～」
「我著黑色風褸牛仔褲」
「我見到你啦～～?」

我抬頭，望下左邊，見唔到，右邊，都見唔到，下面，Anna話「玩你咋XD我未到，就快到～」
Hi！

14：51。

佢到左，我睇過佢張相，認得佢個樣，但佢唔係著粉紅色衫藍色褲，而係藍色T-shirt粉紅色短裙，其實…都幾可愛，不過，想fake我？我fake翻你！我入左男廁，係角位可以望到佢。

whatsapp：
「又話到左？？人呢！！！？」




「係你後面呀」
佢真係望左去後面。

「你唔係以為我會上當丫嘛？？」
事實係你上左當，加上你回頭呢個動作，我已經肯定你係Anna。然後佢咁啱望住另一面，睇唔到我，我就走左去佢後面。

「你再望下啦，我真係係你後面」
「我唔會再上當！！」
「你認左你頭先上當啦？」
呢句唔係係whatsapp send嘅msg，係我企起佢後面係佢耳邊講嘅。

佢梗係俾我嚇親啦，佢一拎轉頭，我地四目相投，呢次，係我地第一次面對面。