《港男FF妄誌》: [Day 12－現在過去] PART 5
同阿月由西鐵轉到去東涌綫，一路上都有傾有講～
呢種感覺好特別，好似同緊已經遺忘左既自己傾計咁～
好多話題、好多道理好似一早就已經明白、了解，只係遺忘左...放低左...
但同阿月一路傾，我就好似將以前放低喺路上既道理、認知、想法一一咁拎返喺手～
「點丫～黎到東涌，應該肚餓啦係嘛？」阿月一出閘就轉個靚身，對我莞爾一笑～
『都真係有D肚餓～』阿月真係我好了解我呢～
「咁好啦～去東薈城食D野先啦～」阿月帶住我行。
『呢道無野好食架喎...』我記得呢頭D野食真係麻麻...又貴又難食...
「趕時間丫嘛～」阿月好似唔多理會我既睇法...
阿月揀左去和民食～好彩平日無乜人～又未到放飯時間～等都唔使等就有得入去～
一坐低之後，阿月已經急不可待咁睇Menu～
睇黎阿月好似好肚餓咁喎～
我就唔等阿月慢慢揀，立即手快快叫個靚仔侍應過黎先～
『我想要個六色刺身～但隻蝦可唔可以轉轉其他野？』我指一指住個Menu。
「得～可以幫你轉多三舊八爪魚～」靚仔侍應點點頭。
『嗯～咁就幫我轉轉八爪魚啦～仲有要個魷魚燒～多春魚燒～鮭魚刺身～要多份金槍魚刺身添丫唔該～一杯Maccha Cookie and Cream Latte～一杯凍既Maccha Latte～唔該晒～』我簡單又快捷咁落好晒單～
靚仔侍應同我覆返一次之後，轉身離開。
呢個時候，阿月帶上匪夷既眼神望住我...
『做咩？做咩咁望住我？』俾阿月咁樣望住，我周身唔自在咁...
「做咩自把自為叫野食？做咩要轉走隻蝦？」阿月盯實我...
『我知你鍾意食燒物，特別係魷魚燒同多春魚燒～不過你又怕食多春魚會好唔優雅，總會三心兩意揸唔定主意，所以我幫你叫埋～你鍾意飲Maccha～更鍾意有Cookie同Cream～咁叫個Maccha Cookie and Cream Latte俾你就滿足晒你既需要啦～而你就最鍾意食生勾勾既刺身～不過...你就對蝦敏感！食親蝦都會抖唔到氣...嚴重起黎要入院瞓返晚！但你自己又唔知自己對N咁多樣野敏感！你知唔知咁樣好危險架！』阿月係對好多野都有敏感...
我記得好耐之前阿月食蒸魚，佢對條魚就無敏感，但對D豉油就有...
結果半夜三更夜麻麻要坐的士去醫院...
唔止...仲有對一大堆藥物有敏感...
基本上要病起上黎都幾麻煩...
醫生俾佢張藥物過敏紙又唔知有無帶喺身...
真係有咩事入醫院，都唔鬼知佢對邊D藥物過敏...
「做咩丫？擔心我丫？我好識照顧自己～」阿月點一點頭～
『你識鬼～你成日都要人擔心～』我就係最擔心你嗰個...
「係你唔放心姐～」阿月繼續反駁...
『就係因為你唔可以令人放心，所以先有咁多人擔心你～』成日都以為自己好獨立...
「我有幾令人唔放心丫？」阿月打量左我一眼...
『仲好講...你睇下你丫～廿幾歲人仲係唔嗲唔吊咁...』我又打量阿月一眼...
「我又點樣唔嗲唔吊呢？」阿月疑惑咁問...
『好心你就正正經經搵返個人啦...』咁大個人，仲要喺道追尋D虛無飄渺既戀愛...
「我又有幾唔正正經經呢？」阿月攤一攤開雙手...
『你又有幾正正經經呢？』我又攤一攤開雙手...
「我一直都好正正經經咁搵緊我既幸福～」阿月點一點頭...
『你咁樣都叫正正經經搵緊你既幸福？你而家好似係撼頭埋牆多D喎～』我恥一恥笑阿月～
「喺你眼中，我係撼頭埋牆～但喺我內心中，我撼個頭埋枕頭道～觀點與角度姐～」阿月擰一擰頭。
『咁你個枕頭都幾硬喎～』我譏諷一下眼前既羅海月！
「嗱～個枕頭硬唔硬唔係你話架～而家係邊個撼埋去先？」阿月對我莞爾一笑…
聽到阿月咁講，我當堂啞撚左...
無錯喇...而家又唔係我撼埋去，我點可以話阿月撼緊嗰個枕頭一定係硬呢？
可能對我黎講真係有D硬，但對阿月黎講就十分之軟...
只係每個人既感覺都唔同...
我地唔可以用自己既感覺，去評估人地既感受...
只係...
『我見到你咁，我有D難受...』無錯喇...雖然我唔知阿月係唔係好享受撼個頭埋枕頭道既感覺...但我見到佢咁...我真係好難受...
阿月聽完我咁講，眼定定咁望住我...
做咩呢？
阿月既眼神有D奇怪...
好似有D迷惘咁...
係唔係我又講錯D乜呢？
係唔係我觸動到阿月既敏感神經呢？
係唔係我觸動到阿月既傷口呢？
「你又何嘗唔係...有人見到你咁樣...內心都係充滿難受呢...」阿月笑裏帶住點點哀愁咁望住我...
有人會為我難過？
有乜好難過呢？
我只不過都係好似一般既人咁，我愛既人唔愛我，日日都係抱住遺憾咁過...
我係知道，就算我有幾愛佢，為佢做幾多野，就算要我挖埋個心俾佢，佢都唔會愛上我...
你估佢唔知咩？
佢知！仲要好清楚！
但佢就係唔會愛上我...咁又可以點？
你愛佢，佢愛佢，佢愛你，你唔愛佢...時時都會發生架啦～
喺呢個世界上，好多人都係咁架啦...
好慘咩？
係囉...人地睇我就以為我係撼頭埋牆，但對我黎講，我只係覺得自己撼個頭埋枕頭道姐...
「六色刺身轉八爪魚既～」靚仔侍應放個六色刺身落黎，切一切斷左我同阿月之間既眼神傳意...
「好野～有野食～好肚餓丫我～」阿月拎起筷子，快速夾起塊八爪魚。
『點解你咁大食都係唔得肥架...』我冷眼望一望阿月...
「呵～呢D叫天生麗質難自棄～你識條鐵咩～」阿月繼續食佢既鮭魚刺身...
『你唔好咁得戚～睇你過左廿八之後，會唔會變欣宜丫喇～』我都唔執輸～快快手手夾舊金槍魚刺食下先！
「你詛咒我丫？」阿月冷眼望一望我...
『唔使我詛咒你，你都會舐硬野架啦～』我又回返個冷眼俾阿月～
「呵～睇下點～睇下到時係我變欣宜定係你變林雪～」阿月對我莞爾一笑…
『林雪都不知幾型～我覺得佢仲型過古天樂～』我拍一拍自己個肚臍～
「咁你做飽佢啦下～」阿月懶理我，繼續食佢既刺身...
『到時你唔好愛上我～』
「嘿嘿～」
莫講話林雪...就算我有古天樂咁型咁靚仔，吳彥祖咁好老公，阿月都唔會再一次愛上我...
究竟阿月心中既青鳥係點既樣架呢？
我真係唔知道...
而事實上...我又真係好想知道...
可惜既係...我仲係無辦法知道...
但假如真係有機會俾我知道，我又有無可能辦得到？
或者我就連“扮”既資格都無...
「唔好成日諗咁多啦～你再唔食，就俾我食晒架喇～」阿月用對筷子喺我面前指下指下...畫下畫下...
『大食月～』唔好成日諗咁多…
同阿月享用完個日本菜，嘆埋杯Maccha後...
「係時候起行喇～」阿月興致勃勃咁孭起背囊，行出和民。
同阿月一路行...一路行...一路孭住個大背囊，行去巴士站期間，阿月都係咁精神煥發～
十足十一個過度活躍症既小女孩...
真係好難想像，一個外表好似咁柔弱既女仔，孭住咁大個背囊，都好似若無其事咁行下行～彈下跳下～
就連一D呼吸急速既情況都無...
至於我喇喎...我就已經覺得有D攰...
「喂～你好似好唔掂咁喎～乜你仲係咁弱架～一D進步都無～」去到巴士站，阿月放一放低D野喺地下，恥一恥笑我...
『咩唔掂咁丫？我都不知幾掂～』喺阿月面前，講就係咁講...唔可以衰俾佢睇架嘛...
但事實上...我已經抖晒大氣...上氣唔接下氣...
仲要流到成身都係汗...
我已經唔係大隻嗰D，仲要咁樣流一流汗，好快變人乾架喎...
死喇...我既體能咁差，等陣間會唔會未上到一半就已經收皮架？
唉...要怪就只好怪我平日唔多做運動...唔係返工，就係瞓覺...
鬼咩！日日都朝九晚十二，邊鬼道有時間姐？
個無能政府又係多鳩餘！乜春日日運動半個鐘？想瞓多半個鐘都難啦！
不過又難怪既～做得政府既，個個都係好撚Hea～
邊道會知出面D打工仔有幾撚慘丫～
你睇下財爺同凸手就知啦～
唔係話自己係中產，就問何不食肉糜～
而家我就日日食屎，再係咁落去，遲下真係連屎都無得食...
「你一陣唔好要我孭你上山～我一定唔會理你～」阿月不可一世咁望住我...
『你顧掂你自己先啦～你碌落山既話，我係唔會救你～』假如你真係碌落山既話，最多等我為你墊屍底...
「你又詛咒...」阿月冷眼望住我...
『又係你講先既...』惡人先露股...
講真一句，我又點忍心詛咒你？
假如世上真係有詛咒既話，我甘心情願為你背負...為你承受...
阿月無我咁好氣，選擇笑一笑，挨喺個鐵欄道～
猛烈既陽光照射到阿月既雪白肌膚上，反射出淡淡光芒...
而家面前既阿月，十足十足中一既時候，第一次見到好似天使降臨凡間一樣既阿月...
『係天使丫…』
無錯喇...喺我有生以來，第一個遇見既天使，正正就係阿月...
我人生之中，第一次遇上會發光既女仔...
阿月身上所發出既光芒，不單止唔刺眼，仲好溫暖...
就好似要為世人抹走黑暗，驅除寒意...
但如果要我深入描繪一下呢一個天使既話，我會話阿月係一位代表憂鬱既天使...
因為喺阿月既面上，總會帶住淡淡憂鬱...點點哀愁...
無時無刻，任何時候都會有呢種感覺...就算係佢瞓著左既時候...
點解會咁架呢？
喺聖經故事裏面，好似從來都無描繪過有咁樣既一位天使...
究竟呢位天使喺天堂上面發生過咩事呢？
點解當佢落到黎凡間之後，面上總會帶著點點哀愁？
係因為喺天堂做錯事，被上帝打落凡間？
面上既哀愁，就係罪行既烙印？
定係喺天堂上面，仲遺留住一D對呢位天使黎講好重要既野？
一樣令天使念念不忘既野...
你可能會話可以上網翻查一下神話故事中，有無記載住呢位天使既事蹟架嘛～
有既話咪知佢念念不忘D乜囉～
你都傻既～神話故事中就梗係無記載住啦～
點解我可以咁肯定？
都落左黎凡間咯～又點會有記載呢？
就同金莎既原理一樣咋嘛～
「好～上車～」當巴士駛埋站之後，阿月孭起背囊，好似蝴蝶一樣，翩翩起舞咁彈上車...
望住眼前又係天使，又係蝴蝶既化身既阿月...我真係望唔透...
「平日過黎真係少人好多～」阿月攬住個背囊，坐定定咁望出車廂外...
望住個背囊仲大過嬌小既阿月，真係幾得意～
就好似而家D小學生，孭住個大書包一樣～
『嗯～而家香港真係道道都係人...』我都唔知應唔應該用“人”黎形容嗰班侵略者...
「好多野都變晒喇...好多野都唔似得以前咁喇...」阿月依然注視出面既風景。
『嗯...變到好陌生...變到唔屬於我地...』如果係變好既就話姐...
「你話如果再揀過，會唔會再揀錯丫喇？」阿月望一望我...
『下？』我俾阿月突如其來既眼神接觸嚇左一嚇...
「時間過左去...發生左...雖然唔可以再返轉頭...但你估我地可唔可以揀返一條以前既路黎行？」阿月再將注意力放返喺窗外既風景...
阿月呢條問題有D深...
深到我要好好咁消化下佢想講乜...
過去既事已經發生左...時間既巨輪一直向前滾動...弱少既我地，無辦法將歷史改變...
咁我地又點樣可以揀返一條以前既路黎行呢？
揀返以前既路...
阿月口中所講既揀返以前既路係...
係喎！雖然話唔可以返轉頭，但都可以揀返以前既路黎行架！
未來既路，行返之前既方向，行返之前未行完既路...
假如以往既路係岩既話，再行一次又有咩問題？
我地可能可以行得更好，過得更順！
只可惜...
『假如真係要揀返以前既路黎行，我地就浪費左太多時間喇...』如果兜兜轉轉，到最後都係揀返之前條路，咁我地呢幾年黎所做既一切，豈不是白行？
阿月擰一擰頭：「無話浪唔浪費...人係由時間中...經驗中成長...我地行過既路，唔會係白行...今日既我地，就係由過去堆砌而成...」
望住笑面裏帶著點點哀愁既羅海月，眼裏充滿說話...充滿影像...充滿回憶...
呢一刻既阿月，究竟喺道諗緊D乜呢？
又會諗起邊個呢？
或者我一世都唔會知道...但就令我諗返起十幾年前，少爺占既一句說話...
“當你失戀既時候，千祈唔好覺得係個天收走你個情人，要你失戀，要你難受。其實可能係要俾一個機會你，俾你學習要點樣成為一個好情人。當有一日，你既真命天子出現之時，你就懂得如何可以令佢幸福快樂。”
真命天子...
假如有一日...一年又好...十年又好...一百年都好...真係有日俾我修成正果...
我既真命天女...可唔可以...再一次係...羅海月？