《港男FF妄誌》: [Day 12－現在過去] PART 6

「好～係時候要挑戰一下自己喇～」阿月一落車就紮起條高馬尾，孭起個背囊彈一彈～就好似小學生去秋季旅行咁，興致勃勃～

我望一望沿路...左望望...右望望...呢種膠遊景緻...究竟我可唔可以上到山架？

我望住眼前呢座山...就好似企左喺豬兜木朗馬峰咁...有D渺小...好撚渺小...

我指係我好撚渺小...

企下企下...我真係有D動搖...仲要有D腳震震...唔係好相信自己有咁既能力去征服眼前呢個山峰...



好日都唔運動下，家下就話要上山...仲要上大東山...

「喂～仲唔行？我地要趕喺日落前，去到爛頭營架～契弟走得摩～」阿月已經行到大東山入口，回頭向我揮揮手...

『哦哦...黎緊黎緊...』幾大就幾大，燒賣就燒賣...死就死啦！

跟住阿月身後行，面前既阿月好似一D壓力都無，輕盈自在咁彈下跳下咁上山...

我一路都係注視住阿月，一直都覺得好奇怪...



起初我仲以為阿月只係口行行，大隻講～睇佢行唔夠幾米就叫晒救命...

但而家跟住阿月後面，睇佢就算遇到幾窄既路...幾斜既石級...幾爛既泥地，佢都係輕輕鬆鬆鄧子峰咁，彈下跳下咁越過困難...

就咁睇阿月呢種女仔，你又點會估到佢係咁有活力呢？

某程度上，有時我仲會覺得阿月有D...林黛玉Feel...

我就唔知有幾多人有睇過中國四大名著之一——《紅樓夢》喇～(差D打左金瓶梅...)



不過，我諗就有唔少人都聽過林黛玉呢個人物～

事關，男神黃子華曾經有喺佢個Show入面有介紹過～

如果你連黃子華個Show都無睇過既話，唔緊要～等我簡單直接咁介紹一下林黛玉係一個點樣既女仔～

林黛玉，自小就體弱多病，弱不禁風～

平日唔係瞓喺張床道，就係行步路都擺下擺下～

成日都可以借D易挨落去賈寶玉身上～

絕對係鄰家少女、楚楚可憐Feel～

林黛玉既外表，大致上就係咁～但都未算係特別喎～



最特別係咩？係佢既內心戲～

林黛玉，最成名既莫過於《黛玉葬花》～

《黛玉葬花》係一首詩詞～

全首詩詞共有五十二句，三百六十八字～

咁多字呢～我就緊係唔Copy晒落黎啦～放心放心～

我就簡單Copy幾句，解釋一下～

儂今葬花人笑痴 他年葬儂知是誰



試看春殘花漸落 便是紅顏老死時

一朝春盡紅顏老 花落人亡兩不知

一朵凋謝左既花姐...都要走去幫佢埋葬...都唔緊要喇～

但你竟然喺朵凋謝左既花身上，聯想到自己坎坷既身世都不單止！仲要睇到自己同賈寶玉既未來都係早夭收場...

一個多愁善感自難忘既奇女子...你真係唔死得既話，一定係大作家～

嗱～阿月正正就喺呢種喇～

阿月既外表柔弱，總有一種令人擔憂既感覺...

而且又係多愁善感，成日都會帶住一副憂鬱既神色喎！



講D野仲鬼死咁高深，又鬼死咁有詩情畫意...

你話佢仲唔係林黛玉既化身？

不過又好奇怪喎...阿月總會做好多高難度既事...做一D唔似做得到既事...

而且仲要做得到...仲要做得好好...

阿月從來都係好似唔會俾自己既軀殼局限住，誓要將內在潛能爆發晒出黎咁！

講到呢道...

『阿...阿月...等等先...抖抖先得嘛…嗄...』我已經頂唔順...扯晒蝦...



「乜你咁弱架～」阿月叉住條小蠻腰，擰擰頭咁行返過黎...

『大姐...我平日真係無...嗄...無乜點運動...嗄...你叫我行到...行到...咁...咁...咁耐...嗄...算係咁喇下...下...下話...嗄嗄…嗄～』我挨到舊石道，抖一抖順條氣...

「行左有幾耐丫～都無半個鐘～仲要行得鬼死咁慢～咁點可以喺日落之前，上到去爛頭營喔？」阿月叉住條小蠻腰，谷起塊面豬登咁望住我...

裝可愛嘛？

阿月裝起可愛既時候，一D都唔可愛...就只有一份悽美...

『做咩...嗄...做咩...嗄...急住要喺日落之前...嗄...之前...之前趕到上爛頭營...嗄...姐？嗄...扮...扮Eason...丫？人...人地...嗄...人地Eason係朝早影架...』唔好話山又長水又遠過黎登膠，就係為影張Eason相咁硬膠～好多硬膠黎登膠都係為左咁架咋～

講開又講～有好多人都唔知有大東山爛頭營，但就知道有陳奕迅山～

大東山之所以響到朵，好大因素係因為陳奕迅上過黎呢道影CD封面～

喺陳奕迅上黎之前，大概就只有真係愛行山既人先識得大東山～

你話係唔係真係好搞笑～呢D咪就係本末倒置到極致囉～

但呢個世界就係咁，你有幾叻係無撚用～無隻伯樂遇上你，就算你識得飛，都無人識得你～

懷才不遇大概就係呢D...

「Eason影日出，我就梗係要影日落啦～人取我棄～人棄我取丫嘛～」阿月挨到埋我身邊，拎出支水慢慢飲...

我就俾人棄喇...又唔見你取我...

「更何況，我地要D時間紮營架嘛～越上得高就會越大風，夜D就更加勁～唔早D上去，入夜都紮唔起個營就大件事喇～」阿月遞一遞支水俾我...

做咩？俾我飲？

我接過阿月支水...猶猶豫豫咁放到埋嘴邊...膽戰心驚咁飲一啖...

呢種味道...

呢種收埋左喺我內心既味道...

係阿月既味道...

呢一啖水，勾起左我同阿月第一次接吻既感覺...

我同阿月第一次接吻，係喺我屋企樓下...

係阿月第一次以我女朋友身份...上我屋企之前...喺我屋企樓下...同我接吻...

「我想搞清楚...種感覺...」阿月既聲線，令我唔知我係處身於過去，定係現在...

『下？』呢句話...

「一種喺面前...但又捉不緊既感覺...」阿月望一望我...眼裏充滿說不出的字句...

我真係唔係好明，阿月呢句說話既意思...

因為我真係望唔透阿月眼裏既字句...

「喂喂～唔好飲晒D水丫～上面無補給架～我地要慳住飲架～」阿月拍一拍我膊頭...

『哦哦...對唔住...對唔住...』我俾返支水阿月...

其實我拎住支水，都只係飲左一啖...

阿月既味道，實在太震撼...

而事實上，之前我同阿月接吻既次數唔算多，可以話係寥寥可數…

但阿月既味道，就深深咁刻喺我內心深處...

直至到而家再接觸到，勾起返心中對呢種味道既感覺...

曾經擁有，但遺失已久...

總有一份窩心...又痛心...

呢種係一種愛？

如果真係愛既一種，咁又屬於咩野既愛呢？

「休息完未丫～打壞書生～」阿月已經孭返起個背囊，準備好繼續向目標進發。

『嗯嗯...我唔係打壞書生丫～』我都抖返順條氣，跟住阿月背後行...

跟住阿月背後行，一直跟住阿月背後行...

路雖然話有D斜...有D崎嶇...有D難行...有D危險...但沿途既景色都算優美～

大自然喔～大自然～平日真係好少接觸呢～

之前就話無時間，遲下就唔知有無機會喇...

話說，我地偉大既發展局局長陳茂波大人話喎～「發展郊野公園用地的課題以往被視為禁忌，但今天是否完全不可踫、不可談？」

你話丫～呢D咁唔經大腦既說話都噏得出既人，都可以做到局長...

仆你個街，香港係唔係已經無晒人才？

唔怪之得要搞埋D乜春專才移民啦～

你唔好話我又拉左去政治方面丫～

呢D野真係同我地息息相關架！

嗱～好簡單架姐～無左郊野公園，就無左今日我同阿月上山影星空既情節，咁咪無故睇囉！

再遲下屋都無得住，連想同阿Wing一齊沖涼都無機會，咁仲點甜呢？

搞下搞下，Emma既李氏家族覺得香港無得做，要將成個家族轉移到上大陸發展既話...

咁就仆街喇！連大家最愛既Emma都走埋，到時你話政治影響大唔大？

所以話，遲下仲有無政治文睇？有無甜故睇？真係唔敢講喇～

跟住阿月背後行，一直跟住阿月背後行，望住阿月既背脊...

點解我都仲係一直都跟喺阿月既後面呢？

點解我點行都好，阿月好似都會喺我面前咁架呢？

點解阿月會一直都喺我眼前...

喺我眼裏面...

一個嬌小既背影...一個全身散發住光芒既嬌小背影...

你從來都無離開過我視線...

我一直都注視住你...

無論去到邊道...相隔多遠...有D乜野阻礙都好...我眼裏一直都只有你...

點解我好似除左你之外，其他乜都睇唔見？

係唔係我對眼出現左D乜毛病？

係唔係已經唔識得對焦？

唔係…唔係我對眼出現毛病...係我個心...

出現毛病既地方，係我個心...

“颼颼”

「好大風丫～」阿月企一企定個人，嬌小玲瓏既身軀就搖左一搖...

『喂～小心丫～』我扶一扶住阿月既背囊...

「放心喎～我唔會俾風吹落山既～」阿月企返穩個人，望一望四周既風景...

呢道真係好靚呢...

雖然上到山真係好大風...大風到吹得郁個人！但成個山頭都係綠草如茵～

風一吹，草輕擺...

擺下擺下，就好似少女舞動一樣，婀娜多姿...

唔怪之得就連陳奕迅都願花上兩個幾鐘，走上黎一睹少女既美態～

「呢道真係好靚呢～如果喺十一、二月上黎既話，呢道既芒草就會好似金色既稻穗一樣～成個山頭金光閃閃～」阿月橫視整個山頭。

金黃色既稻穗...

又令我諗返起何謂愛情既故事...

「柏拉圖有一日問老師蘇格拉底：“乜野係愛情？”蘇格拉底叫佢去麥田走一轉，要頭也不回咁走，喺途中要摘一棵最大最好既麥穗，但只可以摘一次。柏拉圖覺得好容易，充滿信心咁走出去，點知過左半日佢都仍然未返黎。到最後，佢垂頭喪氣出現喺老師面前訴說空手而回既原因：“好難得睇見一棵睇落唔錯既，但係又唔知係唔係最好，無辦法之下，因爲只可以摘一次，只好放棄，再睇睇有無更好既，到發現已經走到盡頭之時，先發覺手上一棵麥穗都無。"呢個時候，蘇格拉底同佢講：“呢個就係愛情。愛情係一種理想，好難得到，亦好容易錯過。”」阿月一邊口噏噏，一邊一步一步小心謹慎咁逆風而行...

愛情...

『又有一日，柏拉圖問蘇格拉底：“乜野係幸福？”蘇格拉底話：“我請你穿越呢一片田野，去摘一朵最美麗既花，但係有一個規則...你唔可以走回頭路，而且你只能夠摘一次。”於是柏拉圖走去做。過左好耐，佢捧住一朵比較美麗既花返黎。蘇格拉底問佢：“呢棵就係最美麗既花喇？"柏拉圖就話：“當我穿越田野既時候，我睇到呢一朵美麗既花，我就摘佢落黎，並認定左佢就係最美麗，而且，當我之後又見到好多好多好美麗既花既時候，我依然堅持住我手上呢朵最美既信念而不再動搖。所以我將最美麗既花摘返黎喇。"蘇格拉底頷首：“這，就是幸福。”』我企定定，一直望住向上行緊既阿月...

此時，阿月停左落黎...

“颼颼”風狂吹猛送下，阿月條馬尾擺下擺下...

阿月回一回頭，望一望我...

“颼～颼～颼！”風吹得更狠更猛...

我由下而上，一直望住眼前呢個站立喺陽光之下，面對狂風撲面，都面無懼色，仍然屹立不動既羅海月...

阿月...其實你一直都係清楚明白，自己係一直都追尋緊愛情，而唔係幸福呢...