[中篇]隱藏係香港地底既秘密──點解要我去發掘？: 照鏡潭

這一覺起來已經是中午，我醒過來時剛好嗅到煮好的飯香，便從沙發上爬起來，就看到堂哥、德叔和列天欣圍坐飯桌邊。列天欣看到我醒來，招了招手：「快啲去洗個臉，過黎食飯啦。」
 
我應了一聲，到洗手間洗了把臉，感覺清爽了不少。出來時他們已經開始吃飯，我忙加入戰場。狼吞虎嚥過後，德叔執拾碗盤到廚房裡洗碗，我則摸著填飽的肚子坐著，有一搭沒一搭地跟列天欣聊天。堂哥忽而向列天欣說道：「唔係新娘潭度，我要再去埋照鏡潭。」
 
「吓？唔係搞掂喇咩？」我嚇了一跳。
 
「新娘潭果個墓冇我想要既野，」堂哥轉向我：「雖然確實有我需要既袐籙，但就冇我地原先想搵既野。既然唔係新娘潭，就一定係照鏡潭。」
 
「咁點解尋日唔去埋搵？而家仲黎唔黎得切？」我一疊聲地急急問道。
 




堂哥睨了我和列天欣一眼：「考慮到你地既體力問題，我決定帶左你地翻黎先。同埋，今日會落大雨，果班人唔會過去照鏡潭，我地仲有時間。列天欣，握機陣應該就係照鏡潭度，我需要你既幫助。」
 
列天欣倒是爽快：「冇問題，我同左邵益謙夾左口供，再留多晚都得既。」
 
我呆在一旁：「即係我唔使去？」
 
堂哥點了點頭：「你本來連新娘潭果個都唔使去。反正我已經攞到你既血，足以應付握機陣。」
 
「點解係我既血？我既血可以應付握機陣？咩意思？」
 




「你既血好特別。」堂哥好像想隱暪什麼，說話含糊起來：「我都未曾親眼見識過握機陣，冇辦法同你講點樣用你既血黎對付，但我知道要用到你既血。」
 
我滿腹疑惑。堂哥明顯有什麼不肯說出來，這讓我感到非常別扭。我居然比他還不清楚自己的血有何特別？但無論怎樣追問，堂哥總是繞圈子。列天欣也似乎無意幫我撬開堂哥的嘴巴。我只能選擇最後一個方法。
 
於是不久之後，我們就在德叔的私家車上，沿著吐露港公路行駛。經過我死纏爛打說要跟去後，堂哥終於猶豫著答應了。在堂哥的大略說明後，我還是得到了一些資訊，比如說，照鏡潭和新娘潭的古墓都是出自同一人的手筆，那樣堂哥和他父親想得到的東西就藏在其中一座。堂哥說新娘潭古墓裡頭原本應該也放著那件東西的膺品，上一批人很可能就拿走了膺品。
 
「我估計佢地冇咁快發現係膺品，始終佢地唔知道真品有握機陣保護。」堂哥坐在前座，淡然地說道。
 
「即係佢地唔係單純既盜墓賊？」我問道。
 




「我唔確定。」堂哥聳聳肩，頓了一頓，然後目光投向車內後視鏡裡的列天欣，問道：「果場雨幾時會開始落？」
 
列天欣回答：「就快架喇，同埋你放心啦，今日果度我算到會冇乜人，有都係去新娘潭果邊，照鏡潭應該冇人。」
 
我詫異地看向列天欣。她抿嘴一笑：「你仲未訓醒既時候我就算過喇。睇黎我都係高估左你堂哥，咁都唔怪得佢，又唔係專學六壬或者太乙，尋日算得出有車禍都算幾犀利架喇。」
 
「即係三腳貓功夫既唔係你而係堂哥？」我看看列天欣，又看看前座的堂哥。
 
德叔咳了一聲，說道：「我同呀前一日最多算一次，第二次就唔準。」
 
「我就冇次數限制喇，不過就成日失手……」列天欣不好意思地摸摸鼻頭，又急忙說道：「不過呢次我算左幾次都係話會落雨，一定唔會失手！你睇個天已經黑左成朝，應該就快落雨！」
 
她話音未落，車窗外忽而響起隆隆雷聲，車窗表面立時沾上濛濛雨絲，不消片刻便已成滂沱大雨。我看得口瞪口呆。列天欣則露出獲得勝利的表情，狠狠拍了我肩頭一下：「都話實準架啦！我好歹都算係學過六壬神課喎！」
 
我揉了揉肩頭：「教我得唔得？考DSE既時候算啲MC答案實爽到爆。」




 
「……」列天欣白我一眼：「好心你咁大個人就唔好咁多妄想啦。」
 
我訕笑著轉過頭去，看著窗外雷雨交加。此時車子已轉入汀角路，我遠眺著公路邊空無一車的單車徑，回想起昨晚踩單車踩到筋疲力盡，不禁深深慶幸今天路面平安。
 
沒多久，我們就來到昨天藏單車的地方。德叔把車停下，讓我們下車，他在車上探頭出來說道：「你地有四個鐘頭時間，我六點會黎接你地。」
 
堂哥點頭，然後德叔便開著車子走了。我拉了拉他衣角問道：「點解德叔唔同我地一齊去？佢係度，你所謂既握機陣應該易啲解決架喎。」
 
堂哥目送著德叔的車遠去，直到消失在遠方，好像沒聽到我的話，但良久之後，才慢慢地說道：「因為呢個責任，已經落到我呢一輩既身上。」