《一位明星，在自己的「生前喪禮」上死了》: Chapter 21
Chapter 21
「出於愛而殺人？即係點呀？」Nicole 疑惑。
「其實即係安樂死，更準確啲講應該係『mercy killing (仁慈殺人)』。出於愛，唔想 Vincy 病得咁辛苦，所以幫佢安樂死解脫。」
「但係咁又點解釋 Vincy 好明確表示自己暫時唔想安樂死，佢生前喪禮上有話陳校長一日未死一日都唔會安樂死喎。同埋，Rosemary ，Aaron 同歐陽牧師都證明 Vincy 秘密計劃同 Rosemary 喺生前喪禮之後結婚，咁點解釋？」
「咁...... 有兩個可能。第一個可能，係 Vincy 本人想安樂死，但因為唔合法，唔想害咗幫佢手安樂死嘅人，所以就同兇手合謀做場戲。兇手設計殺佢，而 Vincy 就公開話自己無計劃安樂死，又扮晒嘢話秘密搞個同性婚禮，咁就有證據 Vincy 無諗過想死，而扮到唔知點解自然病死咁。第二個可能，係根本 Vincy 本人無話過想安樂死，但個兇手就出於好心，自把自為幫 Vincy 安樂死。」Erica 一邊想，一邊說出自己的推論。
「如果當兇手嘅動機係善意嘅，只係好單純咁希望 Vincy 佢早日脫離疾病煎熬，咁好多人都有咁嘅動機，Rosemary 有可能，Amanda 都有可能。」Nicole 說。
「陳校長都有可能，唔可以排除佢。如果講最愛錫 Vincy 嘅人，全宇宙應該陳校長認第二，就無人敢認第一啦。」
「但佢係 Vincy 阿媽喎！！！」Nicole 的反應很大，讓 Erica 意想不到。
「阿媽出於愛，幫個女安樂死，好合理呀，唔得架咩？」Erica 試圖反駁。
「唔單止因為佢係 Vincy 阿媽。更重要嘅原因係，佢係一個好虔誠嘅基督徒喎！Vincy 都話，佢唔選擇安樂死，好大原因係因為陳校長係一個虔誠基督徒，對安樂死呢件事好反感嘛！」
「宗教上嘅教義，相比起自己個女每一日所受嘅痛苦，邊一樣更重要呢？我呢幾日同陳校長相處，都唔覺佢係啲咁守舊嘅人呀。」
「陳校長對基督教教義真係睇得好重架！你梗係無睇過之前 Vincy 出櫃時嘅娛樂新聞喇。
之前咪話 Vincy 公開出櫃承認自己係同性戀嘅，陳校長即日因為呢件事，係各大報紙同傳媒發公開信，話如果 Vincy 唔『改過』，變返一個『正常人』，就以後都唔認 Vincy 係自己個女呀！」
「吓？因為個女係同性戀，就唔認佢做女？咁都...... 真係好『錫』個女喎。」Erica 難以置信。
「唉，有部分教徒係咁架啦，『信仰』呢啲嘢，我哋外人又點會明白呢？
不過，後來當 Vincy 證實患上 ALS，陳校長就同 Vincy 和好如初，廿四小時貼身照顧起居飲食，甚至大小二便。
陳校長真係好錫 Vincy 架，無可能會係兇手啦。」Nicole 很有信心的說。
「唔...... 如果陳校長係一個連同性戀都唔能夠接受嘅教徒，咁安樂死呀，殺人呀，就更加唔能夠接受啦。」
「咁仲有無其他人有嫌疑？Amanda 呢？關於 Amanda ，我都有啲八卦資料可以爆架喎。」Nicole 自豪的奸笑。
「係咩呢？」
「Amanda 今年都差唔多四十歲，典型女強人。我知道其實好多有錢佬同男明星都曾經追過佢，但咁多年來都無聽過 Amanda 有拍拖。講真，Amanda 都算係靚女一名呀，分分鐘靚過好多女明星添，點會無拍拖呀？
所以有傳聞話，其實 Amanda 暗地裡鐘意 Vincy，但又唔夠膽表白，所以多年來安分守己，做 Vincy 嘅經理人，做 Vincy 背後嘅女人。」
「哈哈哈，你啲八卦消息真係呀，無證無據，點吹都得架啦！咁同 Vincy 嘅死有咩關係先？」Erica 笑著說。
面對 Erica 的嘲笑，Nicole 立刻很認真的回應：
「梗係好大關係喇！！！我而家就咁諗，都諗到兩個殺人動機。
第一，佢嬲 Vincy 完全無分遺產俾佢；第二，頭先話佢可能係暗戀 Vincy 嘛，咁假如佢知道Vincy 計劃生前喪禮之後同 Rosemary 舉行婚禮，當然要阻止個婚禮啦，自己暗戀嘅人準備同第二個結婚喎！」
「唔...... 多謝你嘅分析，我地唔可以排除有呢個可能嘅......」Erica 勉強地說，同時用手拿起剛才寫了六個名字的那張紙。
「最有嫌疑嗰六個人，我地都已經推敲過佢地各自有可能殺 Vincy 嘅動機喇，除咗 Aaron。但我暫時真係諗唔到有任何動機殺 Vincy。」
「佢唔算同 Vincy 好熟，只係細個時返同一間教會，應該未至於出於善意而幫 Vincy 安樂死。佢有頭有面，又有錢，大好前途，又係『永生號』嘅擁有人，照計喺自己架船上有人死，對佢絕對無好處。我都諗唔到有咩理由佢會殺 Vincy。」Nicole 和應。
Erica 繼續定神望著那六個名字。
「我地兩個傾咗咁耐，到底而家有啲咩結論？估唔估到邊個係兇手？」Nicole 問。
「其實無。無結論。估唔到。」
「吓？？？」Nicole 大吃一驚。
「係呀，我地只係記者，仲要只係娛樂記者，無辦法可以好似警察咁主動搜尋證據，只能夠坐喺度，根據我地所得到嘅資料去推敲。
而有一點我地要留意：有動機殺人，唔代表一定係佢做，只係有較大機會係佢做；相反，無動機嘅人，一樣可以係殺人兇手。所以一切要睇證據。
但以暫時情況，我個人覺得，鄺牧師同 Rosemary 兩個會有較大嘅動機去殺 Vincy。」
突然，房門外有人敲門。
Nicole 從防盗眼一看，原來是警察先生。
「想問你地有無見過鄺牧師？」一打開門，警察先生便喘著氣問。