《一位明星，在自己的「生前喪禮」上死了》: Chapter 20

Chapter 20 


「唔單只陳校長，連 Aaron 都係返『鹽光社』架。我之前同你提過喇，『鹽光社』係有錢人教會嚟架嘛。」 

「照咁講，即係 Vincy 之前好大可能都係有去『鹽光社』啦，係咪？我記得尋日你問過 Aaron 點樣認識 Vincy，佢話因為大家返同一間教會，所以係由細玩到大，係直到後來入咗行做歌星之後 Vincy 先無再返教會。 

同一間教會，係咪即係『鹽光社』？」 

「嗯，我未證實到，但好有可能係。」 





說到這裡，Erica 腦海中閃過一連串資料： 
Vincy 的水晶棺，是『鹽光社』教友捐出來的。水晶棺內有疑似機關，可能是導致 Vincy 死亡的原因； 
Vincy，陳校長，鄺牧師，Aaron，四人都跟『鹽光社』有關，都是教徒； 
Vincy，陳校長，鄺牧師，Aaron，四人都有『永生號』的後台通行證。 
到底『鹽光社』，跟 Vincy的死亡有沒有關聯？ 
殺 Vincy 的兇手，會不會是四人其中之一？ 


正當 Erica 往這一條線索推論得入神，Nicole 也扮起神探來推測誰是兇手。 






「其實呢，以我縱橫娛樂圈咁多年經驗，我睇人都有番咁上下嘅」 

Nicole 用手指托一下眼鏡，很有把握地說：「—— 我嘅直覺話我知，兇手係 Vincy 嘅女友 Rosemary！」 

「吓？點解呀？」

「你睇 Rosemary 近呢幾年咁霉就知喇。佢爸爸係做啲偏門生意嘅，唔太見得光，所以 Rosemary 好少同爸爸見面同接觸。但我知道Rosemary 爸爸上年生意失敗，欠下好多巨債，有債主於是周圍喺鬧市貼大字報，大大隻字寫明『歌星Rosemary親生爸爸欠債不還錢！父債女還！』，仲有埋 Rosemary 張相嘅。好似正正係因為呢件事影響名聲，同 Rosemary 拍咗拖幾年嘅有錢商人霍公子就咁就飛咗 Rosemary。 
Rosemary 最近一年咁高調同 Vincy 復合，我估係想喺 Vincy 最無助嘅時候，扮晒好關心佢好照顧佢咁，乘機攞著數，揾錢還債。」 





「你係指...... 佢想分 Vincy 份身家？」 

「無錯。Vincy 身患不治之症，相信都唔捱得幾耐。我估計 Rosemary 係想透過喺最後一段日子，表現出好愛護 Vincy 咁，希望 Vincy 會當佢係伴侶，繼而將一部份身家，分配俾佢。」 

「頭先喺生前喪禮之上，Vincy 已經公佈咗佢嘅遺產分配喇，Rosemary 將會得到 Vincy 10% 遺產嘛。10% 好多架喇喎！如果係咁，只要等到 Vincy 死，遺產就可以得手啦，咁點解 Rosemary 要殺 Vincy？佢嘅動機係咩呢？」 

「可能佢趕住要筆錢呢。我估佢確定咗 Vincy 遺產自己有份之後，就設計殺害，盡快拎遺產幫屋企還債。」 


Erica 沉思了一會，「又或者...... Rosemary 其實唔鐘意 Vincy，唔想同 Vincy 結婚，所以趁舉行同性婚禮之前殺咗佢？」 


「都有可能。同個只淨低一兩年命嘅人結婚，俾我都唔制喇，之後成世要做寡婦喎，以後都唔駛旨意同其他人結婚，甚至連拍拖都唔會有人同你拍。」 







「如果真心相愛的話，就唔會介意嘅。但 Vincy 同 Rosemary 係咪真心相愛，我就真係唔知喇。 

不過講開又講，其實點解當年 Vincy 同 Rosemary 會分手嘅？你知我無留意開娛樂新聞。」 

「話咗你啦，細個又唔好好地睇多啲娛樂新聞，而家『書到用時方恨少』喇！」 

Nicole 嘗試想講笑，但當她看到 Erica 一面認真，只好沒趣地自己繼續說。


「其實當年 Vincy 同 Rosemary 拍拖甚至之後同居，已經係全世界都知嘅『公開的秘密』，不過兩個女藝人拍拖，始終唔係個個都接受到，所以各自嘅唱片公司都下令，佢兩個要維持地下情，唔准公開，只能夠話對方係『好好嘅朋友』。 

後來，香港政府因為就『禁止歧視同性戀』立法，呢啲政治嘢你一定清楚過我啦，總之就係因為咁，Vincy 覺得自己身為同志，有責任出黎發聲，所以公開承認自己同志身份，仲成立『大愛聯盟』，大力推動同志平權。 





而 Vincy 公開出櫃呢個決定，就係導致佢哋被迫分手嘅原因。 

Vincy 出櫃之後，Rosemary 被公司威脅，如果繼續同女仔拍拖，就會被雪藏。 
當年Rosemary 為自己星途，否認同Vincy 嘅戀情，然後揾咗個男藝人拍拖，不過唔夠半年就散咗。 

後來，Rosemary 同霍公子拍拖，即係好有錢嗰個呢。自從呢段戀情公開咗之後，佢過去兩年都無再唱歌，淡出娛樂圈，一心一意準備嫁入豪門做少奶奶。不過之後有傳聞話霍公子今年又鐘意咗另一個女 model，加上頭先講過因為爸爸欠債被人貼街招，所以同 Rosemary 分手。 

之後，Rosemary 就喺 Vincy 個吿別演唱會度憑歌寄意，成功同 Vincy 復合。」 


「照你咁講，Rosemary 似乎真係啲好勢利嘅女仔，邊個有錢就同邊個拍拖。」 


「咁公道啲講，我覺得佢當時對 Vincy 其實係真心嘅，你睇番佢哋拍拖時候，佢哋兩個唱嘅歌，真係全部都好 sweet 架。 





只不過自從被迫同 Vincy 分手，格硬揾咗個男人拍拖之後，可能佢覺得：橫掂都係要揾自己唔鐘意嘅男人，點解唔揾個有錢啲，可以令佢生活好啲嘅男人？而講真，Rosemary 又真係一個靚女，要揾的話，大把有錢人爭住要啦。 

而因為 Rosemary 唔肯認 Vincy 係自己女朋友，令到好多本來支持佢嘅粉絲，都覺得佢係『負心人』，因而唔再鐘意佢，佢形象變得非常負面，廣吿商都唔敢揾佢拍廣吿，自此 Rosemary 喺娛樂圈就退為一粒無人要嘅『暗星』。」 

Nicole 不住搖頭，用朗誦腔調說： 
「唉，真係...... 明明絕配，犯眾憎，便放開～～～永遠的忍耐，永遠不出來，世界將依然不變改。只會讓更多罪名，埋～沒～愛～～」


「為咗筆遺產，為咗唔想同 Vincy 結婚留後路俾自己，兩個假設都係假定咗 Rosemary 對 Vincy 唔係真心，係為攞著數嘅。 

但係諗真啲，如果只係為咗遺產，Rosemary 本來已經肯定遺產有自己份，殺 Vincy 嘅事如果被揭發嘅話，反而會咩都無晒架喇喎。為咗早啲攞到錢，而冒一個可能咩都無晒仲要坐監嘅險，唔太值得喎。 

為咗唔想結婚，等自己唔駛咁後生做寡婦而殺人，呢個動機表面睇都合理嘅，但都係嗰個論點，如果被揭發嘅話，就咩都無晒架喇喎。 

再加上之前講過，『場合』嘅問題。點解要選擇喺生前喪禮上殺，而唔靜靜雞完咗先殺？ 





所以，我突然之間覺得，如果兇手知道自己有被揭發要坐監嘅風險，但都依然有動機去殺人的話...... 咁個動機所希望得到或者做到嘅，應該係一啲大過要坐監嘅風險嘅動機，唔應該係『錢』或者『唔想結婚』呢類咁自私咁膚淺嘅嘢，反而似係一啲就算被人揭發，要坐監，都唔會後悔嘅動機，先值得咁做。 

就好似我地懷疑鄺牧師，可能為咗反對安樂死而殺咗 Vincy 呢個支持安樂死嘅名人。呢個動機就係一個好『大』，好『高層次』嘅動機。 

我諗緊...... 兇手會唔會可能係出於善意，出於愛而殺人呢？」 

「出於愛而殺人？即係點呀？」Nicole 疑惑。