呃Like 呃出人鬼戀(完): 第三十九晚：阿克殘存嘅善良？嫁孽反噬！
「哈哈，想救番個女仔，無咁易。依家部手機碎哂，人魂將會進入遊離狀態。到時師太捉佢就易如反掌。」東寶拎住把鎚仔，俯視住部已經變成碎片嘅手機狂笑。
「可惡！只喺差一步，差一步咋。」我自言自語。
我拖住虛浮嘅身體，再次企番起身。我感覺到半邊面濕哂，喺血呀！雖然流咗好多血，但喺，奇怪我唔覺得痛，只喺個心好似有一個窿，深入見底。
「哼！細路，玩完啦。我對你無興趣，依家即刻走我仲可以放過你。」東寶回頭見到我，冷笑回應。對佢嚟講，一切已經落幕，佢成功咗啦，有師太喺到，三魂入法只喺遲早嘅事。
我完全聽唔到東寶喺到講咩，我只喺唔想依個人企得咁近小雅嘅肉身。
「......」我亦都講唔到嘢，我憑直覺向住東寶果個巨大嘅身體，衝埋佢。
「不自量力。」東寶輕輕鬆鬆，㩒住我個頭，將我推番落地。
「......」我開始都睇唔到嘢啦，但喺我竟然知道東寶就喺我後面，所以我一個轉身，一頭就撞埋去。
「啊......你個低能仔，咁想死！」俾我撞到正肚腩，東寶悶哼一聲。
我死命咁攬住東寶，可惜佢嘅氣力真喺大得驚人，一手將我抨起然後重重咁撻開咗。
雖然成身散哂，但喺我唔可以依家瞓喺到，我雙手不停摸索，一定要起番身。
突然，右手摸到一啲嘢！我諗都唔諗，一手就拎起咗佢。
「細......路......放低把刀先，有事慢慢講。唔通你想殺咗我咩？」東寶把聲有少少退縮。
刀？原來我拎起嘅喺把刀！一定就喺頭先阿克掉喺地下果把。
我雙手緊握住手柄，刀尖直指向東寶，然後再次向住佢衝埋去。
「......」我無大叫吶喊，靜靜咁不斷向東寶揮刀。
「停手呀！哎呀......」東寶為咗迴避我嘅刀，左閃右避，然後我感覺到有樣嘢跌咗落地嘅震動。
東寶一時著急，差咗腳成個人趴咗喺地下。
刀尖已經居高臨下，對正東寶心口。
「等......等，我可以俾錢你，你殺咗我都無用架。個女仔醒唔番，佢無可能醒得番架啦。」東寶拉大喉嚨嗌哂救命，依種暴力集團嘅人，平時得個惡字，死到臨頭原來都只喺一個懦夫。
「......」本來，只差一步，小雅就可以醒得番，就喺依個人自私自利，先會搞到今日嘅田地！
我雙手用力，令刀尖筆直咁向下插落去。
東寶驚到大叫大喊。
你驚咩？俾妳害成咁嘅小雅都一樣好驚，但喺你有冇放過佢？
刀繼續無情地滑下。
一個人影突然閃過！
「求下你，放過佢啦。你真喺要搵個人填命，咁就搵我啦。」人影撲喺東寶嘅身上。
「阿克？」東寶喊到眼淚鼻涕直流。
刀尖緊急煞停，但喺還是喺阿克面上畫咗一條小小嘅傷痕。
「所有嘢都喺我錯！打傷個女仔喺我，搶手機嘅亦都喺我。求下你放過我老豆！求你！求你！」阿克跪喺我面前。
「阿克.....仔......點解到依家你仲要救我，我......」東寶心知自已先至喺罪魁禍首，佢不甘心自己嘅一切都要讓俾其他人，包括自己個仔！
對面俾自己害到不似人形嘅親生仔，對面危急關頭仲肯走出嚟保護自己嘅親生仔......東寶覺得原來真正嘅廢柴喺自己。
「我錯啦！」東寶終於都認錯啦。
就喺依個時侯，阿克突然全身抖震，無數黑氣喺佢嘅眼，耳，口，鼻衝出，然後喺後堂之上徘徊一陣，竟然全數衝哂入去東寶身體裡面。
東寶阿克兩父子就咁暈咗喺到。
而我，仍然緊緊咁拎住把刀，守喺小雅嘅床邊。
＊＊＊＊＊＊＊＊＊＊＊＊＊＊
當潮哥，老麥一行人趕到嚟後堂時，完全理解唔到依家嘅狀態。
只有思源一眼就睇到已經醒番嘅師太，坐咗喺後堂嘅一邊。
思源叫潮哥放低佢，然後一個人行埋師太身邊。
「叛徒！妳依家滿意啦。我嘅心血全部毁於一旦。」師太狠狠咁盯住思源。
「師父......唔喺......定喺我應該叫你做......媽媽？」思源微笑。
但喺，師太嘅反應就啱啱相反，全身一震。
「妳......妳發咩神經。」師太故意移動塊面唔望思源。
「當潮哥破咗我功嘅時侯，我感覺到一生嘅罪孽亦都同時消散，我就知道啦。易命嫁孽必需要至親血脈，如果到依家我仲未知，咁真喺枉廢妳廿年嘅教導。」
「無錯，我都講過，妳就喺我嘅孽，就喺因為當年有咗妳，我嘅功力先至會停滯不前，我好後悔，所以我一定要親手扭轉自己嘅命運。真正要進行易命嫁孽嘅，由始至終只有我一個，我表面上喺到幫東寶，其實我喺利用佢幫我準備好所需嘅一切。」既然都瞞唔住，師太決定豁出去。
思源靜靜咁聆聲，依位從來無承認喺自己母親身份嘅人自白。
「不過，東寶都唔喺咩好人，所以我早預備左三條毒餌，最後一條我喺留嚟對付佢架：嫁孽反噬！佢同我一樣都要承受番所有嘅罪啦。」師太苦笑。
「媽媽......不如我地一齊生活啦。過得簡簡單單都可以好開心架。」思源向師太伸出手。
師太望住思源呆咗，知道哂真相之後，佢竟然無怪負自己，仲可以接受自己？
不過，師太就喺唔可以接受自己，所以先行到今時今日咁嘅地步。
師太無接受思源嘅好意，靠住牆慢慢企起身，然後粒聲唔出離開咗。