呃Like 呃出人鬼戀(完): 第三十八晚：迎向悲劇嘅結局？希望粉碎？
我雙手懸空咗好耐，因為我一放開，就要承認小雅已經消失嘅事實。
不過，我亦都知道唔可以再拖。
依家師太暈咗，我要把握最後機會，喺東寶果班手下趕到過嚟之前，我一定要完成哂所有步驟。
我衝番入布幕，首先再用界刀喺手指頭到篤出少少血，然後滴咗幾滴喺小雅肉身嘅左手手掌心，放上紅燈籠，再喺燈籠上邊又滴上幾滴鮮血，我見到燈籠喺到微微震動。
而另一邊，我都需要做番相同嘅步驟，喺小雅右手手掌中滴下幾滴血之後，我正想將手機放上去時，突然，其中一邊布幕撕裂開咗，走咗個人入嚟，阿克。
我見到阿克雙眼好腫，全身打震，而且佢仲拎住把睇起嚟好鋒利嘅匕首。
「你......你唔好旭，快啲俾部電話我呀，唔喺我對你地唔客氣。」阿克聲嘶力竭大喝，不過我亦睇得出佢好驚。
當我知道咗阿克嘅事，我已經無咁憎佢，其實，仲有少少可憐佢添。所以，我無諗住同佢再抖纏，佢拎住把匕首喺我眼中，並唔喺諗住攻擊我，反而似喺保護自己，一啲威脅都無。我只喺望咗佢一眼，之後，就繼續依家最應該做嘅做。
正當我準備將電話放上去小雅肉身右手手掌心時......
「澤，可唔可以俾我同佢講句說話？」手機傳嚟小雅嘅聲音。
「唔好理佢啦，小雅，而家最重要喺叫番醒妳呀。」我緊張咁叫，依家喺分秒必爭，何必仲同佢講啲咩！
「澤，你都知道，當我醒番嘅時侯，我會咩都唔記得哂，所以有啲嘢我好想依家同佢講。」
「嗯。」小雅咁講，我真喺駁唔到佢。
阿克聽到小雅把聲，已經成個震哂，果把匕首更加震到唔知指咗去邊。
「阿克，我已經唔再怪你啦。我希望你都唔好再怪自己，咁樣做人好辛苦。你諗清楚，永遠活喺爸爸陰影之下，你唔會有幸福。我相信你仲有良知，收手啦。」面對一個曾經想殺死自己嘅人，小雅竟然可以咁平靜，而且仲咁大量，可以原諒佢。
「我......我真喺唔想架，我無心害妳，果陣時我好似俾啲咩控制咗咁，我......我......對唔住，我真喺唔想架。嗚......」匕首墜地，阿克縮到去柱邊抱頭痛哭。
我見到佢咁痛苦，其實都好心酸，一直都俾爸爸利用，然後做盡錯事，受良心負備。
「唉，小雅以後就睇佢自己揀啦。唔好理佢，妳仁至義盡啦。」我輕嘆一聲。
小雅亦都無再講任何嘢。
我再認真咁睇下部手機，一部二手手機，幾經波折之後，已經唔算新啦，仲有條裂痕喺個機頂到。不過，你喺我一世之中最慶幸能夠得到嘅一部手機，並唔到因為佢喺生果5S，而喺當中有妳，小雅。
「再見啦。」我好唔捨得咁，將手機放喺手掌心位置，然後指頭血珠慢慢凝聚。
「再見啦，阿澤，你一定要追番我。其實我有時都好任性，你要應承我，要死纏爛打！一定要呀。」小雅笑中有淚。
「放心，我最唔要面。」
「再見啦。」手機傳出小雅最後一句說話。
「再見啦。」我望住手指頭嘅血珠，差不多就要滑落啦。
「再見啦！」喺我背後突然傳嚟一聲怒吼！邊嗰？
我都不及回頭，頭部受到一下重擊，我成個人就趴咗喺地下。
我眼神散亂，只能夠睇到有限境像，一部電話俾人重重掉咗落地，成個屏幕都爆裂哂！
小雅？你做咩？停手呀！停手呀！但喺我連一啲聲都叫唔到出嚟。
然後，眼前有個大鎚仔，一下搞落去部手機到，機殼爆破，連裡面嘅生銹鐵屑都全部飛散；再一下重擊！原本已經非常脆弱嘅機板，被一分為二，二分為四。一切嘅希望就同機板一齊粉碎。
只差一步，明明只差不步。點解？
唔喺嘅！喺發夢嚟啫！喺夢！夢！一切都只喺夢......
＊＊＊＊＊＊＊＊＊＊＊＊＊＊
「啊！」
當我醒番嘅時侯，原來我瞓咗喺醫院，而且仲喺一間私家醫院嘅獨立病房。
四周圍白茫茫嘅布置，反而有一種仲發緊夢嘅感覺。
發夢？喺呀，頭先發咗個惡夢，但喺一瞓醒咗，個夢就變得好矇糊。好似有樣好重要嘅事，唔記得咗。
我慢慢咁望向窗邊，原來有個人一直都坐咗喺到。
依個人斯斯文文，一頭黑髮梳得貼貼服服，而且仲好友善。
佢同我講，佢叫：阿克。
佢話我受傷昏迷，佢要負上最大責任，所有一切醫療費，住院費佢都會一力承擔。
嘩，咁好？我又唔驅呀，有人找數住多幾日先。
不過，我個心唔知點解有種好難受嘅感覺，喺有樣好重要嘅事，唔記得咗，但喺每次就快捉到啲皮毛嘅時候，個頭就劇痛無比。
＊＊＊＊＊＊＊＊＊＊＊＊＊＊
醒番之後果幾日，有好多人嚟探我。最令我震驚嘅喺，老麥同潮哥都喺暑假期間識到女朋友，而且，仲好靚添，究竟我喺昏迷依段時間錯過咗啲咩？
果兩個女仔明明喺第一次見，唔知點解好似同我好熟咁，不斷同我傾計，仲同我講左好多奇奇怪怪嘅事，可惜我就喺一啲印像都無。仲有一個人名，佢地開口埋口都提住佢，喺咩名呢？點解我記唔到？
當我話我真喺唔記得喎，佢地露出一個好悲傷嘅神情。
邊個？佢地講緊邊個？啊......我個頭又開始痛。
＊＊＊＊＊＊＊＊＊＊＊＊＊＊
住院依段時間，我都會發夢見到一個人，一個女仔！一個好可愛嘅女仔！
由我第一次夢見佢時唔喺好熟，可能只喺打個招呼，到之後我地每次見面都會去唔同地方玩，我地傾咗好多嘢，好多驚險嘅經歷，好多開心嘅回憶，但喺每一次臨走前，佢同我講咗佢個名之後，醒番我又會唔記得嘅。
每次都喺咁......
明明喺一個好重要嘅人，點解我會將佢忘記咗。
我真喺好掛住佢。
又瞓醒啦，我發覺自己流咗兩行眼淚。
＊＊＊＊＊＊＊＊＊＊＊＊＊＊
世事就喺咁。
估唔到我出院返到屋企之後，先知道自己DSE考得唔錯。
科技大學仲收咗我。
暑假餘下落嚟嘅日子忙到頭昏腦漲，話哂要面對一個全新嘅環境，全新嘅學習狀態，總喺有啲緊張。
不過無論點緊張都好，我都一定要保持有充足嘅睡眠，因為我想每晚都可以見到佢。
＊＊＊＊＊＊＊＊＊＊＊＊＊＊
眨下眼就到咗開學嘅日子，今日天氣好好，陽光普照。
我正慢慢咁行路返學。
就喺一個紅綠燈位前，我停咗落嚟。
等等？我唔喺掛住個女仔，掛到日光日白都產生幻覺嗎？
就喺對面馬路，我晚晚發夢都會見到果個女仔，竟然企咗喺到，仲伸出一隻手指，微笑咁指住我。
我諗，我真喺掛住佢，掛到有幻覺啦。
我走近個幻覺身邊。
「好心妳就休息下啦。」同個幻覺講完，我就繼續前進。
估唔到個幻覺又幾有恆心，竟然追上嚟。
「喂，傻瓜，你講咩呀？」幻覺笑得好甜。
「唉，其實我地晚晚都見啦，好心你日頭就休息一下，仲要變埋幻覺出嚟陪我，好攰架。今晚再見啦。」我憐惜啦摸摸佢個頭，又繼續行。
依個幻覺簡直有啲固執，仲要追番上嚟。
今次佢唔講嘢，舉起兩隻手掌左右夾擊，兩大巴拍落我塊面，搞到我「啫」起咗個咀，我都仲未嚟得切嗌痛......
兩塊濕潤有彈性，又帶有微微甜味嘅櫻唇就印咗上嚟。
我個腦突然好似俾雷劈中，無數無數嘅影像喺一個深層嘅記憶之中再次湧現。
我......
我......真喺......
「我真喺一個傻瓜 ！明明講好咗喺我追番妳，點解？點解？小雅！」我嘅眼淚缺堤般流出。
我要出盡全力咁擁抱住眼前依個女仔，確保佢唔喺幻覺！確保佢唔會突然消失。
「你梗喺傻瓜啦。明明講好咗你要追番我，點解變咗我去追你架。傻瓜，傻瓜。」小雅都忍唔住眼淚。
無錯，我真喺一個大傻瓜，竟然會將妳忘記咗！
但喺......果晚究竟發生咗咩事？最後一滴血，明明無辦法滴落部手機到？