呃Like 呃出人鬼戀(完): 第四十晚：尾聲

喺我失去意識期間，原來仲發生咗咁多事。

「但喺，小雅點解妳可以醒得番？喺咪思源重新幫妳搵整哂三魂？」我仍然有太多太多疑問。

「嘻！傻瓜。你嘅血唔喺一早已經滴咗落部手機啦咩。」小雅一邊小跳步，一邊跟住我行。

「吓？邊有呀？」我不斷回想，都仲未諗到，唔通啲記憶未番整嚟。

「仲記唔記得小宜俾師太落咗咒果陣，佢用石頭要撼爆部手機，你咪用手擋住呢？果陣你流嘅血已經一早浸咗入部手機到啦。」小雅用感激嘅眼神望住我。





原來喺果陣時！估唔到錯有錯著，痛都值得啦。

不過？仲有太多不過啦......

「我明啦。不過？小雅點解......妳可以記得我？唔喺話靈魂嘅記憶，返到肉身時就會遺忘？」依家嘅現實，實在太唔真實，我仲喺有啲驚。

「喺呀。我醒番果陣，真喺咩都唔記得。不過，你唔喺話一切上天都早有安排咩？真喺師太嘅空間裡面，你將我由張自拍照到召喚出嚟，估唔到連埋我嘅靈魂記憶都備份左喺張相果到。」小雅眼定定望住我，笑一笑。

「當我醒番之後，小宜同老麥就不斷同我講番哂你嘅事，可惜我當時真喺一啲都記唔起。所以，老麥就提議，叫我從新去認識你啦。佢俾咗你嘅Facebook我，我就由你第一日開帳戶果陣開始睇，你嘅開心事，你嘅傷心事，你嘅日常我都統統睇哂。前至有一日，我睇到一張用嚟呃Like 嘅相，我遺忘咗嘅一切記憶，就好似重新上載。」





「原來一切都早有安排。」我不得不驚嘆，依啲就喺傳說中嘅緣份。

突然，小雅跳到我前面，一手按住額頭，做出一個可愛嘅敬禮姿勢。

「好啦，等我從新自我介紹，我叫方雪雅，多多指教。」小雅單單眼，伸伸脷，做番自拍影果陣嘅表情。

「啊......我叫阿澤囉，多多指教。」等等......好似有啲唔好嘅預感......

「唔得呀！第一次要嗌全名。」





「唔講得唔得呀？」

「唔得呀！」

點解？阿爸阿媽你地要咁玩我呢。

「我......我叫曾澤楠。」我嘅人生玩完啦。

「吓？真宅男？」小雅忍笑，忍到面都紅哂。

「唉......喺喺。」

「真宅男！咁行快啲啦，你要遲到啦！」

「喺喺。」





「真宅男！你再唔快啲，我唔等你啦。」

「喺喺。」

「曾澤楠！我鐘意你呀！」

「喺喺......吓？」


故事到此告一段落。
不過，若果有一晚，你嘅電話都喺兩點十五分突然響起，請拎出你嘅膽量接聽，或者又喺另一個完全唔同嘅故事啦。

（全文完）